Ikala ne bibidilu bimpe bua upete masanka mavule

1. Bua tshinyi mbimpe kukonkonona bibidilu biebe bia mu nyuma?

¹ Pautshivua uluilaku muena Kristo, uvua wenza muebe muonso bua kuenza midimu yonso ya mu ntendelelu wa Yehowa bu mudi: kudilongela Bible, kubuela mu bisangilu, kuyisha ne kusambila. Bionso ebi mbikuambuluishe bua bulunda buebe ne Yehowa kushemakanabu. Pamuapa kukadi ndambu wa bidimu katshia watambula. Utshidiku anu udifila mu malu onso a ntendelelu wa Yehowa bu muuvua wenza pautshivua uluilaku muena Kristo anyi?

2. Dibala dia Bible dituku dionso didi dituambuluisha ku tshinyi?

² Tangilulula programe webe: Utuku ne tshibidilu tshia kubala Bible dituku dionso anyi? Tudi tupeta masanka a bungi patudi tubala Bible dituku dionso. (Yosh. 1:8; Mus. 1:2, 3) Ku kale mu Isalele, mukalenge yonso uvua ne bua kubala mukanda wa mikenji ‘matuku ende onso’ a muoyo. Ntshinyi tshivuaye upeta? Mutshima wende kauvua mua kudibandisha, kadi uvua umanya mua kutshina Yehowa bua kubengaye kusesuka ku mikenji yende. (Dut. 17:18-20) Tuetu tubala petu Bible dituku dionso lelu eu, netushale bantu bimpe badi kabayi ne bualu mu bulongolodi ebu bubi. Netulue kabidi bakumbane bua kuyisha bimpe.​—Filip. 2:15; 2 Tim. 3:17.

3. Mmasanka kayi atudi tupeta patudi tubuela mu bisangilu pa tshibidilu?

³ Yezu uvua ne tshibidilu tshia kuya mu nsunagoga muvuabu bayisha Dîyi dia Nzambi. (Luka 4:16) Kakuyi mpata, bualu ebu buakamupesha bukole bua kutantamena ntatu ne makenga onso akapetaye. Malu atudi tulonga mu bisangilu adi atukolesha tuetu petu ne ‘tudi tusambibua munkatshi muetu.’ (Lomo 1:12) Kudisangisha ne bena Kristo netu kudi kutuambuluisha bua kutantamena ntatu ya mu matuku a ku nshikidilu aa. (Eb. 10:24, 25) Utshidiku anu ne tshibidilu tshia kubuela mu bisangilu bionso anyi?

4. Mmunyi mudi kuya mu buambi lumingu luonso kutuambuluisha?

⁴ Bible udi utuambila ne: bapostolo bavua bayisha lumu luimpe ‘ku dituku ku dituku mu ntempelo ne mu nzubu yabu.’ (Bien. 5:42) Biwikala kuyi ne mushindu wa kuyisha dituku dionso, kuenaku mua kuikala ne tshibidilu tshia kuyisha mu mushindu kampanda anyi kansanga lumingu luonso anyi? Wewe muenze nunku, neumanye mua kuyisha bimpe ne Bible, ne neumvue muoyo wa kuambila bakuabu bulelela budimu.

5. Bua tshinyi mbimpe kusambila Yehowa misangu yonso?

⁵ Nzambi wakafuta muprofete Danyele bualu uvua umuenzela mudimu “ku dituku ku dituku” matuku ende onso a muoyo. Uvua kabidi ne tshibidilu tshia kusambila Yehowa. (Dan. 6:10, 16, 20) Tuetu tusambila petu Yehowa ne muoyo mujima, neatupeshe nyuma wende. (Luka 11:9-13) Yehowa neatumvuile ne neasemene kutudi bua tuetu kudia nende bulunda bua katapula kateka. (Mus. 25:14; Yak. 4:8) Edi ndifutu dinene be! Nunku, tuenzayi muetu muonso bua kuikala ne bibidilu bimpe bia mu nyuma bua Yehowa atubeneshe.