Mbatupeshe tshiuma
1 Mupostolo Paulo uvua wangata mudimu uvua Nzambi mumupeshe ne mushinga, kuubikilaye mene ne: ‘Bualu bua mushinga mukole’ anyi tshiuma. (2 Kol. 4:7) Wakapeta ntatu mu mudimu au, kumukengeshabu kabidi bikole. Wakayisha bantu bonso bavuaye upetangana nabu kayi utshioka. Wakenza ngendu mivule ku makasa ne ku mazuwa a mâyi ivua ne njiwu ya bungi. Mmunyi mutudi mua kuidikija Paulo bua kuleja ne: tudi tuangata mudimu wetu wa diyisha ne mushinga? (Lomo 11:13) Tshidi tshiwuvuija tshiuma tshia mushinga mukole ntshinyi?
2 Ntshiuma tshia mushinga mukole: Biuma bia pa buloba ebu bitu misangu ya bungi bikebela bantu ntatu mivule ne bibapetesha anu masanka a tshitupa tshîpi. Kadi mudimu wetu wa kuyisha wowu udi utupetesha tuetu ne bantu bakuabu masanka a kashidi. (1 Tim. 4:16) Udi wambuluisha bantu bua kumanya Yehowa, kushintulula nsombelu wabu ne kutekemena bua kupeta muoyo wa tshiendelele. (Lomo 10:13-15) Patudi tuangata mudimu wetu wa kuyisha ne mushinga wa bungi, nsombelu wetu udi ulengela, tudiumvua bimpe bua bitudi tuenza ne tushala bindile matuku alualua ne muoyo mujima.—1 Kol. 15:58.
3 Leja muudi wangata tshiuma tshiebe ne mushinga: Tutu tuleja mutudi tuangata tshintu kampanda ne mushinga patudi tujimijaku bintu bikuabu bua bualu buatshi. Kuangata dîba dietu ne makanda etu atuvua mua kuenza nawu malu makuabu bua kutumbisha Yehowa si ndiakalenga dinene be! (Ef. 5:16, 17) Malu atudi tuenza adi ne bua kuleja ne: tudi tuangata malu a Yehowa ne mushinga kupita dikeba dia bintu bikuabu bia tshianana. Bu mutudi ne bualu bua mushinga mukole bua kuambila bantu netu, mbimpe tubuyishe ne disanka dionso ne katupitshishi mpunga yonso idi imueneka bua kuamba lumu luimpe to.
4 Kabatu basokoka tshintu tshia mushinga mukole to, kadi batu batshiteka kaba kadi bakuabu mua kutshimona. Tuetu tuangata mudimu wetu wa kuyisha ne mushinga wa bungi, netuuteke pa muaba wa kumpala mu nsombelu wetu. (Mat. 5:14-16) Tuidikijayi mupostolo Paulo, tuleje petu mutudi ne dianyisha pa kuyisha misangu yonso idi mpunga umueneka bua kuleja ne: tudi tuangata mudimu wetu ne mushinga wa bungi, muenze anu bu tshiuma tshitudi natshi.