Idikija Yezu Kristo mu mudimu webe wa diyisha
1 Yezu mmutushile tshilejilu tshia tuetu kulonda patudi tuyisha. Wakaleja muvuaye munange Nzambi ne bantu nende misangu ya bungi ne mu mishindu ya bungi. Wakayisha bantu bavua ne didipuekesha, kuambuluishaye bavua bakenga ne bavuabu batatshisha.—Mat. 9:35.
2 Tshilejilu tshia Yezu ne malongesha ende: Yezu kakalekela malu a tshididi anyi dikeba tshianana dia mushindu wa kulengejila bantu nsombelu bimupangisha bua kuenza tshiende tshivuaye muluile to. Kakitaba bua mudimu mukuabu nansha wowu muimpe bishi kumupangishawu bua kuteka mudimu wa kuyisha pa muaba wa kumpala to. (Luka 8:1) Wakayisha Bukalenge bua Nzambi ne muoyo mujima bua kuleja ne: anu buobu ke buajikija makenga a bantu kashidi ne tshiendelele. Yezu uvua ne mudimu munene uvuaye ne bua kuenza mu matuku makese tshianana. Pavua bena mu Kapênuma bakeba bua Yezu kushalaye muabu, wakambila bayidi bende ne: ‘Tuyayi kukuabu, mbambilaku [pabu] bualu bua Nzambi; ngakuluila bualu ebu.’—Mâko 1:38.
3 Yezu mumane kulongesha bayidi bende, wakabatuma ne kubambila bimpe tshivuabu ne bua kuenza ne: Nuyishe ‘nubambile ne: Bukalenge bua mu diulu budi pabuipi.’ (Mat. 10:7) Wakalongesha kabidi bayidi bende ne: Bukalenge bua Nzambi budi ne bua kuikala pa muaba wa kumpala mu nsombelu wabu. (Mat. 6:33) Pavua Yezu ulayangana ne bayidi bende kumpala kua kubandaye mu diulu, wakabaleja tshivuabu ne bua kuenza. Wakamba ne: ‘Ndayi, nuvuije ba bisamba bionso bayidi.’—Mat. 28:19.
4 Mushinga udi nawu Bukalenge bua Nzambi: Yezu uvua uyukila ne bantu nangananga anu bua Bukalenge bua Nzambi, kabidi wakambila bayidi bende bua kumuidikija. Bantu kabakukokesha bua kujikija ntatu itudi nayi eyi to. (Yel. 10:23) Anu Bukalenge bua Nzambi ke buatumbisha dîna diende ne kupetesha bantu masanka bua kashidi. (Mat. 6:9, 10) Kuyisha bantu badi ‘bapumuna [anyi bakenga ne] muoyo ne badila bua malu a bundu adi bakuabu benza’ kudi kubapetesha disanka ne nsombelu muimpe mpindieu, bashala bindile malu mimpe mu matuku atshilualua.—Yeh. 9:4.
5 Yezu utshidi mutungunuke ne kuenza bia bungi mu mudimu wa kuamba kua lumu luimpe lua Bukalenge bua Nzambi, kabidi udi utujadikila ne: udi utukuatshisha. (Mat. 28:20) Mmu malu kayi muutu pebe widikija Yezu mu mudimu wa kuyisha? (1 Pet. 2:21) Mu matuku a ku nshikidilu aa, tuenzayi bionso bitudi mua kuenza bua kuidikija Yezu bikole mu nyishilu wetu!