“Newandamune munyi?”

1. Nntatu kayi idi nayi ba bungi ba kutudi?

¹ Udiku munange Mukanda wa Nzambi kadi muikale ne lutatu lua kuvuluka tumue tumalu tudimu anyi muaba mujalame udibu balonda bualu kampanda anyi? Udiku musue bua muanebe kumanyaye bimpe malu a mu Bible ne malongesha adimu anyi? Tshiena-bualu tshia ne: “Newandamune munyi?” (“Que répondriez-vous?”) tshidibu bapatula mu Réveillez-vous! wa ngondo yonso mu dibeji dia 31 tshidi mua kuambuluisha bakulumpe ne bana bua kumanya Mukanda wa Nzambi bimpe.​—Bien. 17:11.

2. Mmunyi mutudi mua kulonga ku diambuluisha dia tubiena-bualu tushilangane tua tshitupa tshia “Newandamune munyi?”

² Ntshinyi tshiudi mua kuenza bua tshiena-bualu etshi kukuambuluishatshi? Réveillez-vous! wa Tshiongo 2006 udi utupesha mubelu eu: “Anji tangila bimpe mu dibeji dia 31 . . . Amue malu adi mu dibeji edi adi mua kusankisha bana, makuabu adi mua kueleshisha bantu bakadi balonge Bible bikole meji. Tshiena-bualu tshia: ‘Mbuenzeke dîba kayi?’ (“Situez dans le temps”) netshikuambuluishe bua kumanya tshikondo tshivua bantu badi Bible utela ne muoyo, ne malu manene avua menzeke. Neupete mandamuna a nkonko ya tshiena-bualu tshia: ‘Mu nimero eu’ (“Dans ce numéro”) mu tshibejibeji atshi, kadi mandamuna a nkonko ya bungi mbaleje mabeji adiwu, mmafunda ne maleta matangile panshi pamutu pa kutangila mulu. Kuenaku mua kuanji kudikebela mandamuna a nkonko eyi mu mikanda yetu mikuabu kumpala kua kubala adibu bafile mu dibeji didibu baleje anyi? Tshitupa etshi tshidibu basakidile mpindieu tshia ‘Newandamune munyi?’ tshidi kabidi mua kunuambuluisha bua kulonga natshi Bible mu dîku dienu anyi kuyukila ne bena Kristo bakuabu.”

3. Mmunyi mudi tshitupa etshi tshiambuluishe amue mêku? Kadi ntutupa kayi tuudi wewe munange bikole?

³ Bena mu mêku a bungi mbele tshiena-bualu etshi mu dilonga dia mêku abu. Tshilejelu, muanetu wa bakaji mukuabu udi wamba ne: “Meme ne bayanyi tuakamona ne: mbimpe kuela ka tshiena-bualu ka ‘Bimfuanyi bia bana kukebabu’ (“Aux enfants de chercher”) mu dilonga dietu dia mu dîku bua kusankishadi kana ketu ka bakaji ka bidibu bisatu. Bidi bituenza disanka patudi tukamona kangata waku Réveillez-vous! katuadija kubulula dibeji ku dimue ku dimue too ne padiku kapeta tshivuaku kakeba.” Tatu mukuabu wa mu ditunga dia Brésil udi wamba ne: “Meme ne Moises wanyi (udi ne bidimu 7) tudi banange tshiena-bualu tshia mu Réveillez-vous! etshi bu bakufua. Ntshimuambuluishe bua kuteya ntema ku bidiye ubala, kukeba mvese mu Bible, kumanya tshidi bimfuanyi biumvuija ne tshikondo tshivua malu kampanda menzeke.” Ashley, udi ne bidimu 8 udi wamba pende ne: “Tuasakidilayi bua tshiena-bualu tshia ‘Ntshinyi tshiudi mua kuandamuna?’ tshidi mu dibeji dia ndekelu dia Réveillez-vous! Ntshingambuluishe bua kulonga malu a bungi a mu Bible.”

4. Mmunyi mudi bena mu dîku mua kulonga ku diambuluisha dia tshitupa etshi?

⁴ Kanuenaku mua kuikala nuangata imue misangu tshiena-bualu tshia “Newandamune munyi?” bua kulonga mu dîku dienu anyi? Nudi mua kuangata Index anyi Watchtower Library pa ditadi dia CD-ROM bua kukeba mandamuna a nkonko idi imueneka mikole. Panudi nuenza nanku, nudi nuambuluisha bana benu bua kumanya mua kukebulula malu mu mikanda yetu. Nuenu ne bana bakadi babandile, nudi mua kubela diteta dia kuandamunabu nkonko idi mu katupa ka ne: “Dianyi nnganyi?” (“Qui suis-je?”) anyi ka “Mbuenzeke dîba kayi?” kumpala kua nuenu kulonga mu dîku. Pashishe, balue kuleja mandamuna adibu bapete mu mikanda yetu panudi nulonga mu dîku. Kuenza mudimu bimpe ne malu adi mu dibeji dia 31 dia Réveillez-vous! ngumue wa ku mishindu idi baledi mua kulongesha bana Dîyi dia Nzambi ne kubambuluisha bua kumanya “Mukanda wa Nzambi” kutuadijila ku buana buabu.​—2 Tim. 3:15; Dut. 6:7.