Mukanda wa Kudi Kasumbu Kaludiki

BANA betu, tudi tulomba Nzambi ne muoyo mujima ne: ‘Banemeke dîna diebe’ anu bu muakalomba Yezu. Tudi tuleja mutudi basue kuenza malu bilondeshile dilomba dietu edi patudi ne nsombelu udi Ntemu wa Yehowa yonso ne bua kuikala nende. Kadi katuena amu ne bua kumanya dîna dia Nzambi nkayadi to. Tudi ne bua kudinemeka mu malu onso atudi tuenza. Bushuwa, kakuena tshintu tshikuabu tshidi tshipite tshia kuikala batubikila ne: Bantemu ba Yehowa to.​—Mat. 6:9; Yesh. 43:10.

Bilondeshile Musambu wa 110:3, bantu ba Yehowa mbadifile kakuyi muntu muenzeja ku bukole mu mudimu udiye mubambile bua kuenza. Kadi bua tshinyi bantu ba miaba yonso, bakulumpe ne bana badi badifila mu mudimu wa diyisha eu? Tshia kumpala, bualu mbanange Yehowa ne mbadilambule kudiye. Dutelonome 6:5, 6 udi utulomba bua kunanga Yehowa ne ‘mutshima wetu wonso, ne muoyo wetu wonso, ne bukole buetu buonso.’ Dinanga dia muoyo mujima edi ke didi ditufikisha ku difila dîba dietu, bukole buetu ne bintu bitudi nabi bua kutuma midimu ya Bukalenge kumpala. Umue wa ku midimu eyi ngua kuyisha lumu luimpe ne muetu muonso bilondeshile makanda etu.

Yehowa mmusue bua bambile bantu lumu luimpe lua Bukalenge buende pa buloba bujima bualu mmubanange. Ki mmusuaku nansha kakese bua muntu nansha umue afue, kadi mmusue bua bonso bakudimune mitshima yabu ne bapingane kudiye bua kupeta muoyo. (2 Pet. 3:9) Yehowa udi wamba ne: ‘Tshiena ne disanka bua lufu lua muntu mubi, kadi ndi nsanka bua muntu mubi umuke mu njila wende mubi bua ikale ne muoyo.’ (Yeh. 33:11) Patudi tuyisha, tudi tuleja bantu netu ne: Yehowa mmubanange. Bualu ebu budi butupesha disanka, tumvua bimpe menemene patudi tuenza mudimu wa mushinga mukole wa kuamba lumu luimpe eu.

Tudi tuleja kabidi mutudi banange Yehowa ku mushindu utudi tuangata malu adiye mufundishe mu Mukanda wende. Bu katuyi ne Bible, katuvua mua kumanya Nzambi ne kusemena pabuipi nende bu mudi Yakobo 4:8 utuambila to. Katuvua mua kumanya bua tshinyi tudi pa buloba apa ne tshiatuenzekela kumpala eku to. Katuvua mua kumanya ne: tatu wetu Adama ke udi mutukebele makenga onso atudi nawu aa to. (Lomo 5:12) Katuvua nansha mua kumanya ne: Nzambi mmutunange bikole bualu mmufile Muanende mulela umue bua kutupikula to. Yehowa udi kabidi utuambuluisha bua kupeta dimanya, meji ne lumvu luimpe lua malu mu mishindu mikuabu ya bungi. Bushuwa, Dîyi diende diakafundishaye ne nyuma wende ntshintu tshia mushinga mukole tshidiye mutupeshe! Bua kuleja mutudi banange Dîyi edi, tudi ne bua ‘kudisumbila tshikondo’ tshia kudibala, kudilonga ne kuela meji pa bidiye utuambilamu. (Efeso 5:15, 16; Mus. 1:1-3) Katunyingaladi bua dîba ditudi tupitshisha bua kubala Mukanda wa Nzambi dituku dionso to. Kadi dinanga ditudi banange Yehowa didi ne bua kutusaka bua kuwubala bua tuetu kumanya Yehowa bimpe ne kumunanga bikole.

Tudi balonge mu Bible ne: pakenza Adama bubi, wakakebela ndelanganyi yende yonso ne tuetu ba lelu aba diakabi dinene ditambe. Kadi Nzambi uvua ne mushindu wa kulongoluela bantu malu, kuenza bua tshikavuaye mulongolole bua buloba kukumbanatshi; ne ke tshiakenzaye.​—Gen. 3:15.

Kakuyi mpata, tudi bamanye ne: tuetu bonso tudi basue kutumbisha dîna dia Nzambi wetu. Patudi tumanya bimpe menemene Yehowa Nzambi wetu wa malu mimpe a dikema, tudi tufika ku dienza nende mudimu ne kuenza kabidi mudimu ne bulongolodi buende mu mudimu wa dimanyisha dîna diende ne bidiye mulongolole bua kuenza. Tudi bajadike bimpe ne: neatubeneshe mpindiewu ne bua kashidi ne tshiendelele mu bulongolodi buende bupiabupia.

Tuetu bana benu bena mu Kasumbu Kaludiki, tudi tunujadikila ne muoyo mujima ne: bushuwa tudi banunange nuenu bonso bana betu, ba balume ne ba bakaji. Tudi kabidi tunuela tuasakidila wa bungi bua munudi nudifila ne tshisumi tshionso bua kuambila bantu ba bungi lumu luimpe mu matuku adi matushadile bangabanga ne “dikenga dinene” kuluadi. (Buak. 7:14) Panudi nuenza nanku, badi bamona pabu mua kupeta dimanya dia Nzambi ne dia Yezu Kristo didi dipetesha muoyo wa kashidi anu bu munuvua penu badipete.​—Yone 17:3.

Angatayi muoyo wa kudi bana benu ba mu

Kasumbu Kaludiki ka Bantemu ba Yehowa