‘Amba Dîyi dia Nzambi kuyi utshina’
1 Utuku welakana bua kuyisha imue misangu padi mpunga umueneka mu tulasa anyi ku mudimu anyi? Utuku umvua bikukolele bua kuyisha balela bebe, bena mutumba anyi bantu baudi kuyi mumanye patu mpunga umueneka anyi? Tshidi mua kutuambuluisha tuetu bonso bua ‘kuamba Dîyi dia Nzambi katuyi tutshina’ misangu yonso itudi tupeta mushindu ntshinyi?—Filip. 1:14.
2 Kuelakanyi to: Udiku mua kuelakana bua kuakuila mulunda webe wa pa muoyo anyi mulela webe udibu bashiminyine malu anyi? Yehowa ke Mulunda wetu munene. Pabi kukadi bidimu bia bungi bidibu bamushiminyine malu bibi bitambe. Nanku kuambila bantu malu a Nzambi wetu munene ndiakalenga ditudi katuyi mua kufuanyikija ne tshinga tshintu. (Yesh. 43:10-12) Tuetu banange Yehowa ne muoyo mujima, katuakumvua bundu anyi kutshina bua kuakula bua bualu buende to; kadi netuyishe katuyi tuelakana, netuambile bantu bulelela ne dikima dionso.—Bien. 4:26, 29, 31.
3 Mona tshitudi katuyi mua kupua muoyo: tudi tuambila bantu lumu luimpe. Padi bantu baluitaba, badi bamanya malu malenga abambuluisha kashidi ne tshiendelele. Tuetu tutamba kuimanyina anu pa mushinga udi nawu mudimu wa kuyisha eu pamutu pa kuditangila tuetu anyi baluishi betu, katuakutshina bua kuyisha to.
4 Tshilejilu tshia bakuabu: Bilejilu bia bantu ba Nzambi bavua bayishe dîyi diende ne dikima bidi mua kutupesha bukole ne muoyo mukole. Tshilejilu, Henoka wakambila benji ba malu mabi ba mu matuku ende kayi utshina ne: Yehowa uvua ne bua kulua kubashipa. (Yuda 14, 15) Noa wakayisha bikole bantu bavua kabayi bamona malu a Nzambi bu bualu. (Mat. 24:37-39) Bena Kristo ba kumpala bavua ‘kabayi bamanye mikanda, bavua bantu ba patupu’ bakatungunuka ne kuyisha nansha muvuabu babakengesha bikole. (Bien. 4:13, 18-20) Mu Tshibumba tshia Nsentedi ne mu Réveillez-vous! mutu kabidi miyuki ya bana betu ba mu matuku etu aa bavua bafike ku diyisha ne tshisumi kabayi kabidi batshina bantu to.
5 Tudi mua kupeta muoyo mukole patudi tukonkonona malu a batendeledi ba Nzambi ba kale bavua ntatu mikuate. (1 Bak. 19:2, 3; Mâko 14:66-71) ‘Bakakolesha mitshima yabu mu Nzambi wetu,’ bobu kuyisha ne dikima dionso. Ke tshitudi petu mua kuenza.—1 Tes. 2:2.