Tudifilayi bonso mu dibikila bantu mu Mpungilu wa Distrike wa ‘Londa Kristo’
Bamanyishi nebabanye kabidi mabeji a dibikila nawu bantu
1 Dibikila bantu mu Mpungilu wa Distrike wa “Lupandu luetu lukadi pabuipi!” divua diambuluishe balunda betu ba bulelela bikole. Bantu bakitaba bua kulua mu mpungilu eu bakamona mudi Bantemu bapeta malongesha bienze bu fete munene. (Yesh. 65:13) Bakamona bibenza disanka mudi bena Kristo bikale ne dinanga, bikale kabidi mu buobumue. (Mus. 133:1) Bua bantu ba pa buloba bujima kulua kabidi ba bungi mu Mpungilu wa Distrike wa “Londa Kristo,” netuabanye kabidi mabeji a kubabikila nawu.
2 Bipeta bia tshidimu tshishale: Luapolo lutudi bapete mu matunga onso ludi luleja ne: patuakabikila bantu mu Mpungilu wa “Lupandu luetu lukadi pabuipi!,” kuvua bipeta bimpe be! Bakakula bua mpungilu eu too ne ku bisanji ne mu bikandakanda. Tshilejilu, tshimue tshikandakanda tshiakafunda mu tshiena-bualu tshiatshi tshikuabu ne: “Bua kumanyisha muntu yonso kumpala kua dîba, Bantemu badi badifila bikole kupita ne kumpala: badi benza mudimu mêba a bungi, benda ntanta mile, bakula kabidi mu tshikoso menemene.” Mu tshimue tshimenga mene, diabanya dia mabeji aa diakakoka ntema ya bena bikandakanda ne bisanji, bobu kudiangatshila malu mu bianza. Bikandakanda bipite pa bisatu biakakula bikole bua mudimu eu kumpala kua mpungilu kuenzeka. Tshilejilu, kamona-kamba mukuabu wakafunda biena-bualu bile bia bungi mu tshikandakanda tshia Dia lumingu, bivua biangata mabeji mapite pa abidi majima. Uvua ufunda malu atudi tulongesha, mutudi basombe ne Bantemu netu, diabanya dia mabeji a dibikila nawu bantu, ne bua mpungilu. Ke bualu kayi pavua muanetu kampanda ufila dibeji adi ku nzubu mukuabu, muenaku wakamukosa ku mêyi umuambila ne: “Eyowa. Ndi mfuma ku dibala bua dibeji edi mu tshikandakanda anu mu katupa emu!” Mukuabu muntu mukaji wakamba ne: “Kaa, ndi mfuma ku dibala malu enu anu mpindieu, nukadi apa! Adi ndianyi dibeji anyi?” Wakamba kabidi ne: “Nuenu Bantemu ba Yehowa, bualu bunudi nuenza ebu mbualu buimpe be!”
3 Bantu ba bungi bakalua mu mpungilu ne mabeji abu awu ku bianza. Bamue mene bavua bumukila mitantshi mile ne mashinyi abu bua kubuela mu mpungilu. Bantu bavule bakalua mu mpungilu anu bua mudimu mukole utuvua bakuate bua kuabanya mabeji aa. Mu dimue ditunga, bia pa lukama 27 bia bantu bakalua mu mpungilu kupita bungi bua bavua balue mu tshidimu tshikuabu.
4 Dijikija teritware wetu: Nutuadije kuabanya mabeji aa mbingu isatu kumpala kua mpungilu kutuadija. Enzayi muenu muonso bua kuyisha kujikija teritware wa tshisumbu tshienu. Bua bisumbu bidi ne teritware mupite bunene, nudi mua kushila bantu badi kabayi ku nzubu mabeji muaba udi bapitshi ba njila kabayi mua kumona, lumingu lua ndekelu. Bisumbu biabanye bijikije mabeji aa onso, biabanye mu teritware wabi mujima padiku mushindu. Koku kushale mabeji makuabu, badi mua kuapesha bampanda-njila.
5 Tshia kuamba: Udi mua kuamba ne: “Tudi tuenza mudimu udi wenzeka pa buloba bujima wa kuabanya mabeji aa bua kubikila bantu mu tshisangilu tshietu tshinene tshienzeka matuku makese kumpala eku. Diebe dibeji ndiodi edi. Makuabu malu mbaumvuije mu dibeji edi.” Tuetu tuamba anu mêyi makese, netufike ku diabanya mabeji a bungi. Kadi muntu uudi upesha dibeji edi yeye ne nkonko, tudi mua kuanji kuyandamuna. Padi muntu ne dianyisha, funda dîna diende ne adrese wende, ne umupinganyine ne lukasa.
6 Mbimpe tuditatshishe bua kulonda Yezu bua lupandu luetu. (Yone 3:36) Mpungilu wetu wa distrike eu neambuluishe bantu bonso babuelamu bua kulonda Yezu. Tudi batekemene ne muoyo mujima ne: musangu eu kabidi, netuyishe bikole patuadifila kabidi bonso mu dibikila bantu mu Mpungilu wa Distrike wa “Londa Kristo.” Nunku, udienzeje ne muebe muonso bua kubikila bantu ba bungi menemene. Yehowa ikale nebe pawikala wenda ubikila bantu mu mpungilu eu.