Bua wewe kulonda Kristo, leja kanemu
1. Mmunyi mudi tshiena-bualu tshia mpungilu wa tshidimu etshi tshiumvuangana ne dileja kanemu anyi bunême?
1 Mukanda wa Nzambi udi wakula bua Yehowa Mfumu wa diulu ne buloba, umuleja muenze bu muluate bunême. (Mus. 104:1) Yezu uvua misangu yonso wakula ne wenza malu anu bua kutumbisha Tatuende Yehowa ne ndongoluelu wa malu wa Tatuende. (Yone 17:4) Muntu yonso neapete mushindu wa kuidikija Yezu bua kutumbisha Yehowa mu mpungilu wetu wa distrike utukadi pa kuenza. Mpungilu eu udi ne tshiena-bualu ne: “Londa Kristo.”
2. Tudi tunemeka Yehowa patudi tudilongolola bua kubuela mu tshitupa tshionso tshia mpungilu mushindu kayi?
2 Tunemeke ntendelelu wetu: Tudi tunemeka Yehowa patudi tudilongolola bua kulua kuteleja malongesha adiye mutulongoluele. Ukadiku muyukile ne mfumuebe wa mudimu, mudilongolole kabidi bua kubuela mu mpungilu kutuadijila anu mu Ditanu too ne mu Dia lumingu anyi? Ukadiku mudilongolole bua kufika kumpala kua dîba, kupeta muaba wa kusomba, kuimba musambu ne kuteleja disambila dia ntuadijilu anyi? Ukadiku mudilongolole bua biakudia bia kudila anu muaba wa mpungilu pamue ne bana benu bakuabu anyi? Ku ntuadijilu kua tshitupa tshionso, padi mulombodi wa tshitupa atshi utulomba bua kusomba kumpala kua kuelabu mijiki, mbimpe tuetu kukosa miyuki yetu, kuya kusomba diakamue pa miaba yetu.
3. Mmunyi mudi kuteya ntema ku bidibu balongesha mu mpungilu kutumbishisha ntendelelu wetu?
3 Tudi tunemeka kabidi Yehowa patudi tuteleja bimpe. Tshilejilu, kamona-kamba mukuabu wakamba bua malu avuaye mumone mu mpungilu uvua muenzekele muaba uvuaye musombele ne: Tshidi tshikemesha bantu badi balue kutangila “nngikadilu muimpe wa bateleji, badi balonda bidibu bamba ne kanemu konso kabayi benza mutoyi, baleja mudibu banange malongesha a Nzambi.” Wakamba kabidi bua “bana bavua balue ba bungi menemene . . . , bonso basombe talalaa bateleja miyuki, bakuabu bakeba too ne mvese mu Bible yabu.” Dîba didi ngamba-malu wakula, ki ndîba dia kuyukila malu a tshianana to, anyi kufundilangana tu malu ku telefone, kudia biakudia anyi kubanda kupueka to. Mbimpe baledi basombe muaba umue ne bana babu bua babambuluishe bua kulonda miyuki yonso bimpe. (Dut. 31:12; Nsu. 29:15) Tuetu benze bionso ebi, tudi tuleja mutudi tutua malongesha adi Yehowa mutulongoluele mushinga ne mutudi tunemeka bantu netu.
4. Mbimpe tuetu kuvuala ne kudilengeja biakane patudi mu mpungilu bua tshinyi?
4 Mvuadilu wa kanemu: Bantu ba bungi bakasanka bikole bua mibelu ivuabu batuvuluije mu mpungilu wa tshidimu tshishale mu muyuki uvua wamba ne: “Bunême buebe bua muena Kristo bumueneke dîba dionso.” Bakatuambila mu muyuki au ne: bantu ba Nzambi badi ne bua kuleja kanemu mu mvuadilu wabu ne ku mushindu udibu balengeja yabu mibidi. Bidi bikengela kutangila tshilumbu etshi ne dîsu dikole tshidimu etshi kabidi. Mushindu utudi tuvuala ne tulengeja mibidi yetu udi uleja muaba utudi tuteka Yehowa ne mushindu utudi tumona diakalenga dietu edi dia kuikala Bantemu bende. Tuvualayi misangu yonso bileja mutudi bantu badi ‘bamba ne: tudi tutshina Nzambi.’—1 Tim. 2:9, 10.
5. Tudi mua kuleja kanemu mu mvuadilu wetu ne didilengeja dietu mushindu kayi muaba utuenzela mpungilu?
5 Tudi ne bua kuvuala ne kudilengeja bimpe ne kanemu anu patudi tuya mu mpungilu anyi? Katupu muoyo ne: bantu ba bungi badi batumona patudi base tumanyinu tua mpungilu mu tshimenga tshitudi tumuenzela to. Mvuadilu wetu ne didilengeja dietu bidi ne bua kushilangana ne bia bantu bakuabu bonso. Nunku, nansha patudi tujinga bua kuya kololokaku patupu anyi tuya bua kudia panyima pa mpungilu, mvuadilu wetu udi ne bua kuleja amu ne: tudi bena mudimu ba Nzambi badi balue mu tshimenga atshi bua kubuela mu mpungilu; nanku ki mbimpe kuvuala bilamba bu mudi bia jeans, tuputulu tua bitupa (kilote), anyi tupilu (polo) to. Bilamba nansha biobi bia mushinga mukese, kadi bikale bimpe bidi bileja kanemu. Tuetu benze nanku, netudiendeshile lumu luimpe muaba utuenzela mpungilu. Yehowa udi usanka padiye utumona tuvuala ne tudilengeja anu mudi bena mudimu bende ne bua kuenza.
6. Mmalu mimpe kayi atudi tupeta patudi tudileja mutudi bena Kristo ba kanemu?
6 Malu mimpe atuapeta: Kuikala ne kanemu kadi muena Kristo yonso ne bua kuikala naku kudi kutupetesha mishindu ya kuyisha padi mpunga umueneka ne kushiya bantu badi batumona ne mmuenenu muimpe wa tshitudi. Tshilejilu, munene mukuabu wa mu mbulamatadi wakamba ku ndekelu kua mpungilu kampanda ne: “Katutu banji kumona bantu ba bikadilu bimpe mushindu eu to. Mushindu unudi eu ke udi Nzambi musue bua tuikale.” Kuikala ne kanemu kudi kuleja mutudi banangangane ne kudi kabidi kutumbisha Yehowa. (1 Pet. 2:12) Kudi kuleja mutudi tutshina Nzambi ne mutudi ne dianyisha bua diakalenga dia kuikala bantu badiye ulongesha. (Eb. 12:28) Tuenzayi muetu muonso bua kuleja kanemu mu Mpungilu wetu wa Distrike wa “Londa Kristo.”
[Kazubu mu dibeji 5]
Malu a kuvuluka bua mpungilu wa distrike
▪ Mêba: Kutuadijila mu Ditanu too ne mu Dia lumingu, programe neatuadije pa dîba dia 9:20. Nebakangule biibi pa dîba dia 8 jajaja. Padi mijiki ituadija, tuetu bonso tudi ne bua kusomba pa miaba yetu bua mpungilu kutuadijaye bimpe. Mu Ditanu ne mu Disambombo, programe neajike mu 17:05, kadi mu Dia lumingu neajike mu 16:10.
▪ Dikuatshila miaba ya kusomba: Bantu baudi ne bua kukuatshila miaba badi anu aba banudi nubuela nabu mu mashinyi amue anyi banudi nabu mu nzubu umue.
▪ Biakudia bia mu midi: Mbimpe kulua ne biakudia bia midioku bidi mua kudisha mubidi bu mudi: mampa, mikata, bimuma (bibote), tumbele, benyi anyi kato. Bintu bu mudi mâyi, kafe anyi tshiayi nudi mua kulua nabi biela mu bintu bidi kabiyi mua kutayika to, bionso ebi bua kuepuka njiwu. Mbakandike bua kulua ne maluvu adi akuatangana mu mpungilu. Mbimpe kulua ne bietu biakudia ne bietu biakunua bua katuyi kubisumba kudi bangenda muaba wa mpungilu to. (Numanye ne: bapanyishi ba bintu kabena ne bua kubuela ne bintu biabu nansha kakese bua kubisumbishila muaba udi mpungilu wenzekela to.—Yone 2:13-17.) Bana betu badi balambila muaba wa mpungilu badi ne bua kuanji kulomba dianyisha kudi bana betu badi balombola malu a mpungilu. Tuikalayi ne budimu bua kuepuka njiwu.—Luka 10:38-42.
▪ Mapa: Bua kulongolola mpungilu wa distrike, makuta atu atuka a bungi. Bua kuleja dianyisha dietu, tuelaku makuta mu tushete tua mapa a mudimu wa pa buloba bujima tudi ku Nzubu wetu wa Bukalenge anyi tudi muaba udi mpungilu wenzekela.
▪ Diambuluisha badi bapeta njiwu: Bena mu tshibambalu tshia diambuluisha babedi badi badilakana bua mutu bana betu bababikila too ne bua tumalu tukese. Nanku padi bualu bua disama dikole bumueneka dîba diudi mu mpungilu, bikila muanetu udi wakidilangana udi pabuipi nebe bua amanyishe bena ku Tshibambalu tshia diondopangana.
▪ Dikuata mêyi ne bindidimbi: Katuena mua kuasa tshiamu nansha tshimue ku nshinga ya nzembu ya biamu bidibu benza nabi mudimu muaba wa mpungilu nansha. Nuenze mudimu ne bintu ebi mu mushindu wa kubenga kufila ditanaji kudi bakuabu.
▪ Dikuata foto: Paudi ukuata foto dîba ditudi munkatshi mua mpungilu, kutemeshi midilu anyi flashe to.
▪ Telefone ya ku bianza: Wenze muebe muonso bua kamu kebe kakafidi ditanaji to.
▪ Mankenda: Bidi bimueneka ne: bana betu batu baya kusumba biakudia kudi bapanyishi ba bintu bobu ke batu bimansha tubeji, mabeji, tubudimbu, tutotola ne bintu bikuabu bia buena ebi. Muntu yeye musumbe biakudia kudi basumbishi ba bintu (bu mudi mbombo, bisukuita, tuto, makopo a misanyi anyi bintu bikuabu), yeye ke udi ne bua kuela bizubu bia bintu ebi mu tshintu tshidibu babilongoluele pamutu pa kubimansha panshi. Kadi tuetu bamone bintu bu mudi tubudimbu anyi mabeji panshi, tubiangule, tubiele mu tshintu tshia kuela bintu bia butshiafu. Bana betu, tuenzayiku muetu muonso bua kulama muaba utudi tuenzela mpungilu ne kumpenga kuonso ne mankenda. Kulama muaba utudi tuenzela mpungilu ne mankenda mbualu budi butangila muntu yonso. Muntu yonso yeye muikale uditatshisha bua kushiya muaba wa mpungilu ne mankenda dituku dionso, muaba eu newikale amu ne mankenda. Tudi basue kuleja ngikadilu ya Nzambi wetu wa tshijila utudi tutendelela.—1 Pet. 1:15, 16; Ekes. 19:10; Dut. 23:14.
▪ Miaba itudi batudile: (1) Kanusombi anyi kanuladi bantu ba bungi mu nzubu padi muntu udi munuakidile kayi muanyishe to. (2) Wewe mumone ne: kuakuya muaba uuvua mulombe bua kutudila, manyisha kumpala kua dîba. (3) Kumpala kua wewe kulamba, lomba dianyisha kudi muena nzubu anyi kudi bana betu badibu bateke bua kutangila malu a miaba ya kulala ku Nzubu wa Bukalenge bua bakuleje tshia kuenza. (4) Enza malu ne nkatshinkatshi. (5) Batendeledi ba Nzambi bonso badi ne bua kuikala ne mankenda. Ikala ushiya muaba uuvua mulale ne mankenda kabidi mulongolola bimpe dituku dionso. Bikalabu balongolole bua bana betu badi bafuma kule kutudilabu ku Nzubu wa Bukalenge, badi ne bua kumulama ne mankenda. (6) Leja ngikadilu mimpe ya nyuma wa Nzambi kudi muanetu udi munuakidile ne kudi bana betu bakuabu banudi nabu muaba umue.—Gal. 5:22, 23.