Tungunukayi ne “kukuama mamuma a bungi”
1 Yezu wakadifuanyikija ne mutshi wa mvinyo mulelela, kufuanyikija Tatuende ne Tshidime, kufuanyikija bayidi bende bela manyi a nyuma muimpe ne matamba a mutshi wa mvinyo adi akuama mamuma. Mu mufuanu wa Yezu wa tshidime eu, wakaleja mudibi ne mushinga bua matamba kushalawu malamate bikole ku mutshi wa mvinyo. (Yone 15:1-4) Dilongesha didi ne: muntu yonso udi mu malanda mimpe ne Yehowa udi ne bua kuikala bu ditamba didi dishale dilamate bikole ku ‘mutshi mulelela wa mvinyo’ udi muikale Yezu Kristo. Tudi ne bua kutungunuka ne kukuama ‘mamuma a nyuma’ ne mamuma a Bukalenge a bungi.—Gal. 5:22, 23; Mat. 24:14; 28:19, 20.
2 Mamuma a nyuma: Diya dietu kumpala mu mudimu wa Nzambi didi mua kumuenekela ku mushindu utudi tuleja mamuma a nyuma. Utuku udienzeja bua kuikala ne mamuma a nyuma wa Nzambi pa kudilongela Dîyi dia Nzambi dituku dionso ne kuelelapu meji anyi? (Filip. 1:9-11) Kuelakanyi bua kulomba nyuma muimpe kudi Nzambi to, bualu nyuma eu udi mua kukuambuluisha bua kuikala ne ngikadilu idi itumbisha Yehowa ne idi mua kuambuluisha bua kutungunuka ne kuya kumpala mu malu a Nzambi.—Luka 11:13; Yone 13:35.
3 Kuikala ne mamuma a nyuma nekutuambuluishe kabidi bua kuikala ne tshisumi tshia bungi. Tshilejilu, dinanga ne ditabuja bidi bitusaka bua kuikala ne programe wa kuyisha nansha tuetu ne bia bungi bia kuenza. Ngikadilu bu mudi ditalala, muoyo mule, bulenga, lutulu ne didikanda idi ituambuluisha bua kuandamuna bimpe padi bantu batuluisha. Disanka didi dituambuluisha bua kudiumvua anu bimpe nansha padi bantu babenga kututeleja.
4 Mamuma a Bukalenge: Tudi kabidi ne bua kukuama mamuma a Bukalenge. Mamuma aa adi atangila kufila ‘kudi Nzambi mulambu wa kumutumbisha nawu, udi muikale mamuma a mishiku idi ijukula ditabuja dia dîna dia [Yehowa].’ (Eb. 13:15) Tudi tuenza nunku patudi tuyisha lumu luimpe ne tshisumi ne dikima. Utuku udienzeja bua kuikala ne mamuma a Bukalenge a bungi pa kudifila bikole mu mudimu wa buambi anyi?
5 Yezu wakaleja ne: bayidi bende ba lulamatu badi mua kukuama mamuma bungi bushilangane. (Mat. 13:23) Ke bualu kayi katuena ne bua kudifuanyikija ne bakuabu to, kadi tudi ne bua kupesha Yehowa tshietu tshimpe tshitudi natshi. (Gal. 6:4) Tudikonkononayi ne muoyo mujima mu nsombelu wetu ku diambuluisha dia Dîyi dia Nzambi bua dituambuluishe bua kutungunuka ne kutumbisha Yehowa pa “kukuama mamuma a bungi.”—Yone 15:8.