Tudi ne disanka dia kudifila mu mudimu wa Yehowa
1 Mupostolo Paulo uvua ne disanka dia ‘kudifila’ bua kumona mua kukumbaja mudimu wa Nzambi. (2 Kol. 12:15, MMM) Bia muomumue, lelu bena Kristo ba bungi mbadifile bikole mu mudimu wa bumpanda-njila. Bakuabu nansha mudibu ne majitu a bungi mu mêku abu ne bia bungi bia kuenza badi ne programe bua kuyisha lumingu luonso. Bamue badi basama bikole badi benza mudimu ne makanda makese adibu bashale nawu bua kuyisha midimu ya Bukalenge bua Nzambi kumpala. Bidi bitukolesha ku muoyo bua kumona bantu ba Yehowa bakulumpe ne bana ba nsombelu ya mishindu yonso badifila mu mudimu wa Yehowa!
2 Dinanga bua muntu netu: Patudi tuenza muetu muonso bua kuenzela Yehowa mudimu, tudi tuleja mutudi bamunange ne banange kabidi muntu netu ne bidi bituambuluisha bua kuikala ne kondo ka muoyo katoke. Bu muvua Paulo mudifile ne muoyo mujima bua kuyisha lumu luimpe, uvua mua kuamba ne disanka dionso ne: ‘Ndi nnuambila lelu ne: ndi mbingishibua ku mashi a bantu bonso.’ (Bien. 20:24, 26; 1 Tes. 2:8) Kuyisha bilondeshile makanda etu a mubidi kudi kutuepula ku dibanza dia mashi.—Yeh. 3:18-21.
3 Kudifila bikole bua kuambuluisha bakuabu kudi kutuenza disanka. (Bien. 20:35) Muanetu wa balume mukuabu wakamba ne: “Bulelela ntu ndiumvua mutshioke mu dilolo pantu mpingana kuanyi kunyima kua meme mumane kuenza dituku dijima mu mudimu wa Yehowa. Kadi ntu ndiumvua ne disanka ne ntu ngela Yehowa tuasakidila bua mudiye mumpeshe disanka edi didi muntu nansha umue kayi mua kunnyenga.”
4 Dinanga bua Nzambi: Tshitudi tudifidila mu mudimu wa Yehowa mbualu udi usankisha Tatu wetu wa mu diulu. Dinanga ditudi nadi bua Nzambi ke didi ditusaka bua kutumikila mikenji yende, kutumikila kabidi eu udi utulomba bua kuyisha ne kuvuija bantu bayidi. (1 Yone 5:3) Nansha padi bantu batuandamuna ne tshibengu anyi batuluisha, tuetu tudi tutungunuka ne kuenzela Yehowa mudimu mukole ne disanka.
5 Etshi ki ntshikondo tshia kulekela kuyisha to, bualu tudi mu tshikondo tshia dinowa. (Mat. 9:37) Tshidime utu wenza mudimu mêba a bungi mu tshikondo tshia dinowa bualu udi ne dîba anu dikese bua kupola biakudia biende bua kabinyanguki. Matuku adi matushadile bua kuenza dinowa dia mu nyuma mmabale ku minu. Tuikalayi bavuluke tshikondo tshitudi, ne tudifilayi tuetu bonso mu mudimu wa buambi ne tshisumi tshionso.—Luka 13:24; 1 Kol. 7:29-31.