“Muntu udi utantamana mu mateyi udi ne disanka”
1 Bena Kristo bonso batu bapeta ntatu. (2 Tim. 3:12) Badi mua kusama, nsombelu udi mua kubakolela, badi mua kupeta mateta anyi badi mua kubakengesha anyi kupeta ntatu mishilangane. Satana utu utukebela ntatu bua kutukulula, kutufikisha ku dilengulula mudimu wa buambi anyi mene bua tulekele kuenzela Nzambi mudimu. (Yobo 1:9-11) Mmunyi mudi kutantamena ntatu kutupetesha disanka?—2 Pet. 2:9.
2 Dilongolola bua ntatu: Yehowa mmutupeshe Dîyi diende didi ne muyuki wa nsombelu wa Yezu ne malongesha ende. Patudi tumvua mibelu ya Yezu ne tuyitumikila, tudi tukolesha ditabuja dietu ne nunku tudilongolola bua ntatu idi mua kulua. (Luka 6:47-49) Tudi kabidi tupetela bukole kudi bena Kristo netu, bisangilu bia tshisumbu ne mikanda ya kulonga nayi Mukanda wa Nzambi idibu bapatula kudi kasumbu ka mupika wa lulamatu ne wa budimu. Pashishe tudi tusambila Nzambi misangu yonso itudi basue.—Mat. 6:13.
3 Tudi kabidi ne malu adi Yehowa mutulaye. Patudi tukolesha ditabuja dietu mu malu adi Yehowa mutulaye aa, ditekemena dietu didi dilua bu ‘luongo lua muoyo wetu, didi dikuata bikole, didi dishindame.’ (Eb. 6:19) Ku kale, mazuwa kaavua mua kuasa luendu pavuawu kaayi ne luongo to, nansha pavua kulu kuimpe. Pavua tshipepele tshikole tshijuka diakamue, bavua bela luongo bua kukuata mazuwa bua kaayi kudikuma ku mabue. Biamuomumue, tuetu bakoleshe ditabuja dietu mpindieu, katuakutenkakana palua ntatu to. Ntatu idi mua kutukuata mu tshintuluntulu. Tshilejilu, nansha muvua bena Luseta bitabuje mayisha a Paulo ne Banaba, malu akashintuluka diakamue pakalua bena Yuda bavua baluisha bena Kristo mu tshimenga atshi.—Bien. 14:8-19.
4 Kutantamena ntatu kudi kupetesha disanka: Kutungunuka ne kuyisha nansha padibu batuluisha kudi kutuambulusha bua lungenyi luetu kuikalalu mu ditalala. Tudi tusanka bua mudibu batubala bakane bua kufuishibua bundu bua dîna dia Kristo. (Bien. 5:40, 41) Kutantamena ntatu kudi kutuambuluisha bua kupeta ngikadilu bu mudi kudipuekesha, kutumikila ne bua kunanukila too ne ku lufu. (Dut. 8:16; Eb. 5:8; Yak. 1:2, 3) Kudi kutulongesha mua kueyemena Yehowa, kueyemena malu adiye mutulaye ne kunyemena kudiye patudi mu ntatu.—Nsu. 18:10.
5 Tudi bamanye ne: makenga adiku anu bua tshitupa tshipi. (2 Kol. 4:17, 18) Ntatu idi itupetesha mushindu wa kuleja mutudi banange Yehowa. Patudi tuyitantamena, tudi tuleja ne: Satana mmuena dishima. Nunku, tuyayi batangile anu kumpala! ‘Muntu udi utantamana mu mateyi udi ne disanka; bualu bua pakamanabu kumujadika, neangate tshifulu tshia butumbi tshia muoyo.’—Yak. 1:12.