Tudi banange mudimu muimpe utudi tuenza
1 Kutuadijila anu ku kale, Yehowa utu upesha bantu bende midimu mimpe ya bungi. Uvua mubapesha midimu eyi kayi utangila bikalabu balume anyi bakaji, bakulumpe anyi bana, babanji anyi bapele. (Luka 1:41, 42; Bien. 7:46; Filip. 1:29) Ndiakalenga kayi didi Nzambi mutupeshe lelu eu?
2 Amue malu mimpe atudi bapete: Tudi ne diakalenga dia kuikala balongeshibue kudi Yehowa. (Mat. 13:11, 15) Mudimu mukuabu utudi nawu utudi mua kuangata bu diakalenga nkutumbisha Yehowa patudi tuandamuna mu bisangilu. (Mus. 35:18) Padibu batusungula bua kuandamuna mu bisangilu, tudi ne bua kuandamuna ne muoyo mujima. Bu mudibi nanku, tudi ne bua kuangata mudimu wonso udibu batupeshe bua kuenza mu bisangilu bu diakalenga ne kuwenza ne muoyo mujima. Dikuabu diakalenga ditudi nadi ndia kulama Nzubu wa Bukalenge ne mankenda. Utuku ne tshibidilu tshia kuenza mudimu eu bua kuleja muudi wanyisha diakalenga edi anyi?
3 Padi bantu bapite bungi badiebeja bikale Nzambi utu uteleja masambila abu, tuetu tudi ba diakalenga bualu Mutambe bunene wa mu diulu utu uteleja etu. (Nsu. 15:29) Yehowa utu udiumvuila masambila a basadidi bende yeye nkayende. (1 Pet. 3:12) Ki mmutukosele bungi bua misangu itudi ne bua kumusambila to. Tudi ba diakalenga dia dikema, bualu tudi mua kumusambila “misangu yonso” itudi basue.—Ef. 6:18.
4 ‘Benzejanganyi ba mudimu ne Nzambi’: Diakalenga ditambe bunene ditudi nadi ndia kuikala ‘benzejanganyi ba mudimu ne Nzambi’ bua kumanyisha lumu luimpe lua Bukalenge buende. (1 Kol. 3:9) Mudimu eu udi utupetesha disanka ne utukolesha. (Yone 4:34) Yehowa kêna dijinga ne bantu bua kukumbaja mudimu eu to, kadi mmutupeshawu anu bualu mmutunange. (Luka 19:39, 40) Nansha nanku, ki mbantu bonso badi Yehowa witabila bua kuenza mudimu eu. Bantu badi bayisha lumu luimpe badi ne bua kukumbaja malu kampanda ne kuikala ne ngikadilu idiye musue. (Yesh. 52:11) Tudiku tuleja mutudi banange mudimu eu pa kuikala kuwenza ne muoyo mujima lumingu luonso anyi?
5 Midimu idi Yehowa utupesha ne malu adiye utuenzela bidi bilengeja nsombelu wetu. (Nsu. 10:22) Katuamonu bu malu a mushinga mukese to. Patudi tuleja mutudi ne dianyisha bua midimu ne malu adi Tatu wetu wa mu diulu utuenzela, tudi tumutumbisha bualu yeye ke Mufidi wa ‘kupa kuonso kuimpe ne dipa dionso diakane tshishiki.’—Yak. 1:17.