Tutendelelayi Yehowa mu dîku
1 Ku kale mu tshikondo tshivuabu bafunda Bible, bena mu dîku bavua benza malu a bungi pamue. Bavua benza midimu ya ku mbelu pamue, kadi bualu bua mushinga mukole buvuabu benza pamue nkutendelela Yehowa. (Lew. 10:12-14; Dut. 31:12) Lelu eu, mu miaba ya bungi bena mu mêku badi benza anu tualu tukese pamue. Kadi bena Kristo mbamanye ne: kuenza midimu pamue mu dîku, ne nangananga kutendelela Yehowa pamue kudi ne mushinga wa bungi. Mufuki wa dîku neasanke bikole padiye umona benamu bonso bamutendelela mu buobumue.
2 Yishayi pamue: Padi bena mu dîku bayisha pamue, badi bakolesha malanda abu. Nunku, nansha mudi mukulu ne bua kuyisha ne bena mu tshisumbu bakuabu, udi kabidi ne bua kuikala ne tshibidilu tshia kuyisha ne mukajende ne bana bende. (1 Tim. 3:4, 5) Nansha mudi batangidi bena ngendu ne malu a bungi a kuenza, badi kabidi benza programe wa kuyisha ne bakaji babu.
3 Baledi badi bayisha ne bana babu badi ne mushindu muimpe wa kubambuluisha bua kuluabu bayishi ba nsongo. Bana nebamone mudi baledi babu ne disanka dia kuyisha, kumona kabidi mudibu baleja mudibu banange Yehowa ne bantu nabu. (Dut. 6:5-7) Baledi kabena mua kuimanyika kuyisha ne bana babu bualu bana bakolu to. Tatu mukuabu ne mukajende badi ne nsongalume isatu idi ne bidimu pankatshi pa 15 ne 21 batshidi anu batungunuka ne kuya nabu mu buambi pa tshibidilu. Tatu udi wamba ne: “Misangu yonso itudi tupatuka nabu, tudi tubalongesha bualu kampanda ne tudienzeja bua tshikondo tshitudi tuyisha nabu tshikela tshikondo tshia disanka, tshidi tshikolesha.”
4 Dilongololayi pamue: Bena mu mêku mbamone ne: kudilongolola pamue kumpala kua kuya mu buambi nkuimpe. Misangu ya bungi bana batu basue kuenza manaya a tshilejilu mimpe a bobu bikale baye kutangila muntu anyi bikale bantu badibu baye kutangila. Bamue bena mu mêku batu bangata minite mikese ku ndekelu kua dilonga dia dîku bua kuenza manaya aa.
5 Kuenza midimu ya mushinga idi isankisha pamue ne bantu batudi banange, kudi kuvudija disanka dietu. Bitu bienza disanka dia bungi padi bena mu dîku bayisha pamue ku nzubu ne ku nzubu, bapinganyine bantu bavuabu bayukila nabu ne balonga ne bantu Mukanda wa Nzambi. Wewe utendelela Yehowa pamue ne bena mu dîku buonso, udi mua kuamba ne disanka dionso ne: ‘Meme ne ba mu nzubu muanyi netukuatshile Yehowa mudimu.’—Yosh. 24:15.