Programe mupiamupia wa mpuilu wa tshijengu

Yehowa mmuakanyine butumbi. Mmunyi mutudi mua kumutumbisha? Ntshinyi tshitu tshipangisha bamue bua kutumbisha Nzambi? Mmasanka kayi adi bantu badi batumbisha Yehowa bapeta? Programe wa mpuilu wa tshijengu bua tshidimu tshia mudimu tshia 2008 neandamune nkonko eyi bimpe menemene. Udi ne tshiena-bualu ne: “Nuenze malu onso bua kutumbisha Nzambi.” (1 Kol. 10:31) Malu atualonga mu matuku abidi a mpuilu eu utuenza kumpala eku ngowu aa:

Mutangidi wa distrike neenze muyuki udi wamba ne: “Bua tshinyi kutumbisha Nzambi?” ne wa ne: “Ikala tshilejilu mu ditumikila mikenji ya Nzambi.” Neenze muyuki wa patoke udi ne tshiena-bualu ne: “Mbanganyi badi batumbisha Nzambi?” ne muyuki wa ndekelu udi wamba ne: “Tudi tutumbisha Nzambi mu buobumue pa buloba bujima.” Nealombole kabidi Kalasa ka Mudimu wa Nzambi. Mutangidi wa tshijengu neenze miyuki idi ne biena-bualu ne: “Ikala ne disanka dia kutumbisha Nzambi,” “Tutangilayi majinga a tshijengu tshietu,” ne wa ne: “Tushalayi ‘bajalame mu malu malelela’” udi muangatshila mu 2 Petelo 1:12. Netumanye kabidi “Mudi mudimu wa bampanda-njila utumbisha Nzambi.” Muyuki muimpe wa kumpala wa bitupa binayi newikale ne tshiena-bualu ne: “Tumbisha Nzambi mu malu onso audi wenza,” neumvuije tshidi mêyi adi mu 1 Kolinto 10:31 umvuija. Muyuki muibidi wa bitupa binayi udi wamba ne: “Enzela Yehowa mudimu wa tshijila bua kumutumbisha” newimanyine pa bibadi bishilangane bia ntendelelu wetu. Netuteleje kabidi tshikepeshilu tshia Tshibumba tshia Nsentedi ne diyukidila dia mvese wa ku dituku mu Dia lumingu. Nekuikale kabidi mushindu wa bantu kutambulabu.

Bantu ba bungi kabena bakonka Nzambi mu malu abu to. Malu adi bana ba bantu balaya bantu adi abapanyisha bua kuela meji bua butumbi bua Yehowa. (Yone 5:44) Kadi tuetu tudi bajadike ne: mbimpe kusomba ne kuela meji bua mushindu utudi mua “kuenza malu onso bua kutumbisha Nzambi.” Nunku dilongolola bua kuikala mu mpuilu eu ne kumuteleja bimpe kutuadijila anu ku dituku dia kumpala too ne dia ndekelu.