Programe mupiamupia wa mpuilu wa pa buende

Tshiena-bualu tshia mpuilu wa pa buende bua tshidimu tshia mudimu tshia 2008 ntshiangatshila mu Yeshaya 64:8, tshidi ne: ‘Tuetu tudi dima ne Yehowa udi Mufumbi wetu.’ Mibelu ya mu Mukanda wa Nzambi yatupeshabu mu mpuilu eu neyituambuluishe bua kumanya bimpe mudi Yehowa muikale Mufumbi Munene udi ne meji, buakane, bukole ne dinanga.

Mutangidi wa tshijengu neenze muyuki udi wamba ne: “Tuikalayi bivuadi bia mushinga mu mudimu wa buambi,” ne muyuki eu neuleje mudi bantu bapite bungi benda bapeta diakalenga dia kumanya bulelela ne kubuambila bakuabu. Muyuki wa ne: “Dielangana meji nedikulame” neutuleje mudi kuela meji bikole pa mikenji miakane ya Yehowa kutulama. Ngamba-malu mukumbudi neenze muyuki udi ne tshiena-bualu ne: ‘Katudifuanyikiji ku malu a mu tshikondo etshi’ ne wa ne: “Tulekelayi Mufumbi Munene atufumbe.” Muyuki udi wamba ne: “Bansonga badi ne mushinga ku mêsu kua Yehowa” ne wa ne: “Mudimu munene udi nawu baledi mu difumba” neyambuluishe baledi ne bana. Nkonko yelabu bana betu ne manaya a tshilejilu enzabu nebituambuluishe bua kumvua ne kumona malu adibu benze mu mudimu wabu wa buambi. Bantu bonso badi basue kutambula badi ne bua kumanyisha mutangidi-muludiki kumpala kua dîba. Kupu muoyo bua kuambula tshiebe Tshibumba tshia Nsentedi tshituakonkonona lumingu lutuenza mpuilu eu wa pa buende.

Malu onso adi Mufumbi Munene musue kuenza, utu uakumbaja. Kadi muntu yonso ke udi usungula bikalaye musue bua kumufumbabu anyi kabamufumbi. Yehowa udi ufumba bantu badi batumikila mikenji yende ne muoyo mujima ne bitaba mibelu yende, ubalengeja ne ubavuija bivuadi bua mudimu muimpe anu bu mutu mufumbi wenza ne dima. Patudi tutumikila Yehowa, tudi tutumbisha bumfumu buende ne tupeta masanka a bungi.