Programe mupiamupia wa mpuilu wa pa buende

Tshiena-bualu tshia mpuilu wa pa buende wenzeka mu tshidimu tshia mudimu tshia 2009 tshidi ne: ‘Udimuke bua mudimu uwakangata, bua wewe uujikije’; ntshiangatshila mu Kolosai 4:17. Tuetu bena Kristo tutu tuangata mubelu eu ne mushinga wa bungi. Tshipatshila tshietu ntshia kuenza mudimu wetu ne lulamatu anu muvua Yezu muenze. (Yone 17:14) Mupostolo Paulo wakatushila tshilejilu tshimpe tshitambe mu bualu ebu. Uvua muangate dipangadika dia kujikija lubilu luende mu mudimu wa diyisha.​—Bien. 20:24.

Mu muyuki wenza mutangidi wa tshijengu, nealeje mudi bamanyishi ba bungi batantamena ntatu mu mudimu wabu. Pashishe muyuki udi ne tshiena-bualu ne: “Tuipilayi bituvua bakune,” neuleje mushindu utudi mua kuambuluisha ‘bakadi basungudibue bua kubapabu muoyo wa tshiendelele.’ (Bien. 13:48) Ngamba-malu mukumbudi neenze muyuki udi ne tshiena-bualu tshia: “Mushindu utudi tudimanyisha bu bena mudimu ba nzambi.” Tshiena-bualu etshi ntshiangatshila mu 2 Kolinto 6:1-10 ne neumvuije tshitupa etshi mvese ku mvese. Mu mapingaja, neenze muyuki udi ne tshiena-bualu ne: “Tuangatayi mudimu wetu wa diyisha ne mushinga.” Miyuki idi ne biena-bualu bidi bilonda ebi neyikukankamike bikole: “Bansonga ne bakulumpe badi bayisha ne disanka” ne “Bansonga badi benza mudimu wa buambi.” Bantu bonso badi basue kutambula bua kuleja mitshipu yabu patoke mu mpuilu wa pa buende anyi wa tshijengu idi kumpala eku, badi ne bua kumonangana ne mutangidi muludiki kumpala kua dîba. Tshitupa tshinene tshia mpuilu yetu anyi mpungilu, tshitu tshia dilonga dia Tshibumba tshia Nsentedi. Ulue ne tshiebe tshibejibeji tshitualonga lumingu lua mpuilu wa pa buende alu.

Patudi tudienzeja bua tuetu kujikija mudimu wetu, tudimuke bua se: malu etu makuabu ne midimu yetu kayitupangishi bua kupeta dîba dia kukumbaja mudimu udi Yehowa mutupeshe nansha. Mibelu ya mu Bible yafilabu mu mpuilu wa pa buende wa dituku dimue eu, ituambuluishe tuetu bonso bua kumvua tshitudi ne bua kuenza bua kuikala ne mmuenenu muimpe wa mudimu wetu ne bua kuela meji pa mushindu utudi tuwenza bua kuujikija bimpe.