Programe mupiamupia wa mpuilu wa tshijengu

Mpuilu wa tshijengu wenzeka mu tshidimu tshia mudimu tshia 2009 neandamune nkonko minene eyi: Mmushindu kayi utudi mua kukandamena bantu badi baluisha ntendelelu mulelela ne luonji lukole? Bu mudi Satana ututeya ne wenza muende muonso bua tuetu kupingana mu bulongolodi buende, mmunyi mutudi mua kumutshimuna? Tshiena-bualu tshiende tshidi ne: “Wikale upita malu mabi bukole ku dienza dia malu mimpe.” (Lomo 12:21) Programe eu neikale ne malu adi alonda aa:

Mutangidi wa distrike neenze miyuki idi ilonda eyi: “Bakolesha bua kupita malu mabi bukole ku dienza dia malu mimpe,” “Tudimukilayi didieyemena!,” “Malu mabi onso akadi pa kujika!,” ne “Tukoleshayi ditabuja dietu bua kutshimuna ba pa buloba.” Mutangidi wa tshijengu neenze miyuki eyi: “Etshi ke tshikondo tshia kushala batabale!,” muangatshila mu Lomo 13:11-13, ne “Kuditekeshi mu dituku dia dikenga,” muangatshila mu Nsumuinu 24:10. Netushale kabidi bindile ne muoyo mujima muyuki wenzabu kudi mutangidi wa tshijengu udi wamba ne: “Tutangilayi majinga a tshijengu tshietu.” Muyuki mukuabu muimpe watukankamika newikale ne tshiena-bualu tshia: “Udiku mua ‘kuenza mudimu webe bimpe’ pa kuikala mpanda-njila anyi?” Umue wa ku miyuki ibidi ya bitupa bia bungi yenzabu newikale ne tshiena-bualu tshia: “Tukandamenayi mateyi a Diabolo.” Neutuambuluishe bua kumanya ne bua kuepuka mateyi a Diabolo adi mu bintu bidibu bapatula, mu dijikija dia lutetuku ne mu dilonga dia tulasa. Muyuki mukuabu wa bitupa bia bungi udi ne: “Tupetayi bukole bua kukandamena Satana mu matuku aa mabi,” neutuleje mushindu utudi mua kutumikila bimpe menemene mubelu udi mufundisha ku nyuma wa Nzambi udi mu Efeso 6:10-18.

Kutshimuna malu mabi anu ku ntuadijilu kuawu kudi kupetangana diakamue ne kuyisha kua mukenji wa Bukalenge bua Nzambi. (Buak. 12:17) Kabiena bitukemesha bua kumona mudi Satana wenda uvudija mateyi ende ne utungunuka ne kuteta Bantemu ba Yehowa. (Yesh. 43:10, 12) Kadi Diabolo neapangile, bualu tudi badisuike bua ‘kupita malu mabi bukole ku dienza dia malu mimpe.’ Udilongolole bimpe bua kuya ne kulonda bitupa bionso binayi bia mpuilu wa tshijengu eu.