Difila bikole mu diyisha
1 Mupostolo Paulo wakabela bena Kristo bua kuendabu mu njila wa Nzambi ne bua ‘kutamba’ kuendamu bikole. (1 Tes. 4:1) Ntshinyi tshidi bualu ebu butulomba? Bumue bua ku malu aa, nkutungunuka ne kukeba mishindu ya kuyisha bikole, kudienzeja misangu yonso bua ‘kukumbaja mudimu wetu wa Nzambi.’—2 Tim. 4:5.
2 Tshidi tshitusaka: Dijinga dia kuenzela Mufuki wetu mudimu ne muoyo wetu mujima ke didi ditusaka bua kuyisha bikole. Tudi basue kukola mu ditabuja ne kukeba mishindu ya kuvudija mudimu wetu. Programe muimpe muenza ne meji makane neatuambuluishe bua kukumbaja bipatshila bietu bia mu nyuma.—Mus. 1:1, 2; Filip. 4:6; Eb. 10:24, 25.
3 Bua kumona mua kuyisha bikole, tudi ne bua kuikala ne lungenyi lua kupa ne lua didipangisha amue malu. Bua kupeta lungenyi lua mushindu eu, tudi ne bua kuelangana meji bikole pa tshilejilu tshimpe tshia Yezu. (Mat. 20:28) Yezu wakapeta disanka dia bungi mu dikuatshila bantu mudimu pavuaye uyisha. (Bien. 20:35) Tudi mua kuidikija Yezu patudi tuleja mutudi banange bantu ne patudi tukeba mishindu ya kuyisha bikole.—Yesh. 6:8.
4 Mudimu udi nawu baledi: Bana badi mua kupeta dijinga dia kuenzela bakuabu mudimu ne dia kuyisha bikole anu patshidibu bana menemene. Bana batu bamona mudi bena mu dîku bakuabu benza mudimu eu ne tshisumi ne mudibu badienzeja bua kuuvudija. Muanetu wa balume mukuabu wakapeta dijinga dia kuenza mudimu bikole patshivuaye muana pavuaye wenza midimu ya mu tshisumbu ne kakuende. Pakamonaye muvua kakuende wenza midimu eyi ne tshisumi ne disanka, biakamusaka pende bua kukeba mishindu ya kuambuluisha bana babu. Patudi tuakulangana apa, udi musadidi wa mudimu.
5 Tudi dijinga ne bana betu ba balume: “Biasua muntu kuangata mudimu . . . , udi usua mudimu muimpe.” (1 Tim. 3:1) Mêyi aa adi akankamija bana betu ba balume bua kukumbaja malu malomba bua kuenza midimu mikuabu mu bulongolodi bua Yehowa. Bua kuenza midimu eyi kabiena bikengela kuikala ne dimanya kampanda dia pa buadi to. Muanetu udi musue kuwenza udi ne bua kukeba tshia kumpala Bukalenge bua Nzambi ne kuikala uyisha ne tshisumi. (Mat. 6:33; 2 Tim. 4:5) Udi ne bua kudienzeja bua kuikala tshilejilu tshimpe kudi bakuabu.
6 Pa buloba bujima: Yehowa udi wendesha mudimu wa disangisha dia bantu. (Yesh. 60:22) Nunku bidi bikengela bua bantu bonso badi balonda Yezu benze mudimu wabu ne tshisumi tshionso kabayi bajingakana. Luapolo lua mudimu lua pa buloba bujima bua tshidimu tshia mudimu tshia 2006 ludi luleja ne: bantu 248 327 bavua batambule. Mbienze anu bu ne: bantu bapite pa 680 bavua batambula dituku dionso edi. Tuetu bonso tukebayi mishindu ya kuyisha bikole menemene.