Mukanda wa kudi Biro

Bamanyishi ba basuibue,

Tudi ne disanka dia bungi bua kumona mudi mudimu wetu muende bimpe mu teritware wa filiale wetu mu tshidimu tshia mudimu tshia 2007. Mu ngondo wa kumpala, ditunga dietu diakakumbaja bamanyishi ba lumu luimpe 138 273 ne bampanda-njila 10 765. Mu Congo-Brazzaville, bavua bafike pabu ku bamanyishi 5 406 mu ngondo muinayi. Mu ngondo 8 ya ku ntuadijilu kua tshidimu tshia mudimu tshia 2007, tuvua babikile bana betu 33 bua kuluabu bena mu dîku dia Betele. Tudi dijinga ne bena budisuile ba bungi mu bibambalu bishilashilangane bia ku Betele, nangananga mu tshibambalu tshia dikudimuna.

Tuvua babanye Ngumu ya Bukalenge No. 37 ivua ne tshiena-bualu ne: “Tshitendelelu tshia dishima tshikadi pa kufua!” mitue ku miliyo 8 mu teritware wa filiale wetu. Luapolo idi ileja ne: panyima pa bantu bamane kupeta trakte eu ne bamubala, bakela Bantemu ba Yehowa tuasakidila bualu malu avuabu bumvue mababulule mêsu. Bobu kumona mudibi bikengela kukeba bua kumanya tshitendelelu tshilelela. Bantu kutuadijabu kubuela mu bisangilu ne kuitaba bua kulonga Bible.

Tshipatshila tshietu patutu tuenza mudimu wa pa buawu wa mushindu eu ntshia kuambuluisha bantu ba muoyo muimpe bua kumanya tshitu Bible ulongesha bulelela. (Mat. 28:19, 20) Patudi tuyisha, katupu muoyo bua kufunda mêna a bantu bonso badi batuakidile bimpe ne kubapinganyina bua kutuadija kulonga Bible ne bantu badi ‘basungidibue bua kupetabu muoyo wa tshiendelele.’ (Bien. 13:48) Tudi ne disanka dia bungi bua kuenza nenu mudimu eu wa mushinga, ne tudi tunuela mioyo ya dinanga dia bena Kristo.

Bana benu,

Betele wa Congo-Kinshasa