Mukanda wa kudi Biro

Bamanyishi ba Bukalenge basuibue,

Ku ntuadijilu kua tshidimu tshia mudimu tshishale kuvua kupatuke tshijengu tshipiatshipia mu teritware wa filiale wetu. Nunku, tudi mpindieu ne bijengu 137 ne distrike 12 mu ditunga dietu.

Kuvua kuenzeke kabidi mudimu mukole wa kulongolola mpungilu ya distrike 92 ne mpungilu ya distrike mipidija 7 mu ditunga dietu dijima. Mpungilu eyi ivua mienzeke mu miakulu 11 (kusangisha ne muakulu wa tumama), pinapu mikuabu mienzeke mu programe mukepesha. Tudi tuela bana betu bonso bavua bende mitantshi mile bua kulua kubuela mu mpungilu eyi kalumbandi.​—Dut. 31:12.

Anu mu tshiotshi tshidimu atshi, bavua batuadije kabidi kuasa Nzubu Isatu ya bisasa bibidi ku Betele wa Tshinsansa. Nzubu eyi neyikale ne bungi busanga bua nzubu ya kulala 84. Tshia kumpala, bivua bikengela kulandakaja muaba wa kuashila mine nzubu eyi. Bivua bikengela kuambula tone ya nsoka 16 000, tuambe ne: tuminyo 1 000, bua kulandakaja muaba au bimpe.

Kumpanyi mukuabu wa luibaku ke udi wibaka nzubu eyi. Tshibambalu tshia luibaku tshia Betele tshidi tshienza mudimu wa kutangila bua se: bibake nzubu eyi bimpe menemene. Kudi dipetangana dimpe ditambe ne bena mu kumpanyi eu. Umue wa ku bena mudimu babu uvua muambe ne: “Eu muaba mmushilangane ne mikuabu! Bantu benu bonso badi batuela muoyo, too ne bamfumu benu badi bela anu bena mudimu betu muoyo, kabitu nanku mu miaba mikuabu itukadi bibake to.” Mukuabu pende wakamba ne: “Nzambi udi nenu bulelela, bualu mvula ki mmitutatshishe bikole patuvua tunulongoluela muaba wa kunuibakila nzubu mu tshikondo etshi tshibi bu mutuyi itutatshisha pa tshibidilu mu Tshinsansa emu to.”

Mudimu wa luibaku pamue ne mikuabu yonso idi yenda anu bimpe bu muvuayi milongolola. Tshikondo tshikala nzubu eyi mijike yonso, dîku dia bena ku Betele wa ku Tshinsansa nedikokeshe bua kuenzela bana betu bonso ba mu filiale wa Congo mudimu mutambe buimpe. Mudimu eu muenza ne tshisumi bua kutuma malu a Bukalenge kumpala ngwa kuelela kalumbandi! Netuanyishe bikole mfranga inuatuma bua mudimu eu. (Nsu. 3:9, 10) Yehowa abeneshe bionso bitudi tuenza mu buobumue bua kuikala “tutumbisha lumu luende.”​—Ef. 1:12, MMM.

Bana benu,

Betele wa Congo