Tuambilayi bakuabu ditekemena dietu dia Bukalenge
1 Mu matuku aa makole a ku nshikidilu, bantu ba bungi kabena ne ditekemena to. (Ef. 2:12) Bakuabu mbele bua tshiomba musabu bualu mbeyemene bubanji, bakalenge ba pa buloba, bena malu a sianse ne bikuabu. Kadi tuetu tudi ba diakalenga bualu tudi ne ditekemena dilelela didi ‘bu luongo lua muoyo wetu, didi dikuata bikole.’—Eb. 6:19.
2 Mu Bukalenge bua Nzambi, buloba ebu nebulue mparadizu. Bantu batuvua banange bakadi bafue nebabike. (Bien. 24:15) Bupele, kansungasunga, masama, bukalaje ne lufu kabiakuikalaku. (Mus. 9:18; Mat. 12:20, 21; Buak. 21:3, 4) Aa ngamue a ku malu adi Yehowa mulaye akumbana mu matuku makese emu. Mbualu kayi buudi wewe mutambe kuindila?
3 Yisha lumu luimpe: Katuena mua kulama ditekemena dia Bukalenge buetu nkayetu to. Dinanga ditudi banange Nzambi ne muntu netu didi ditusaka bua kuidikija Yezu ne ‘kuambila bapele lumu luimpe; kuambila bena lukanu bualu bua dikopoka diabu, ne bafofo bualu bua kutabala kua mêsu abu, kupa badi batata budishikaminyi.’ (Luka 4:18) Mupostolo Paulo uvua uyisha lumu luimpe mu tshisalu ne miaba yonso ivuaye usangana bantu. Wakadifila bikole mu mudimu wa diyisha. (Bien. 18:5) Tuetu bidikije tshilejilu tshiende tshia kuyisha ne tshisumi, netudilame bua ‘meji a malu a pa buloba ne mashimi a biuma’ kabibuitshidiji ditekemena dietu to.—Mâko 4:19.
4 Ditekemena dietu dia Bukalenge kadiena dikepela patudi tupetangana ne bantu badi ne tshibengu, badi balengulula bitudi tubambila anyi badi batuluisha to. Kadi tudi ‘tulamata dijikula dia ditekemena dietu bua kaditshimbakanyi.’ (Eb. 10:23) Katuena ‘tufua bundu bua lumu luimpe.’ (Lomo 1:16) Bamue bantu badi mua kufika ku dituteleja padibu bamona dishindika dietu ne tshisumi tshietu.
5 Nansha mutudi tukoka ntema ya bantu ku nsombelu mubi udi pa buloba udi uleja mudi malu avua Bible mumanyishe akumbana, katuena tuyisha kabutu to. Kadi mudimu wetu mmuimanyine pa ditekemena dia Bukalenge ditudi nadi, mmumue ne: lumu luimpe lua Bukalenge bua Nzambi. Tuyishayi lumu luimpe elu ne dishindika dionso ne tshisumi bua ‘tupete tshiuwidi tshia ditekemena too ne ku nshikidilu.’—Eb. 6:11.