Tuendayi bu bena meji
1 Pakalomba Yezu balobi ba mishipa banayi bua kuluabu bayidi bende, kabakajingakana to, kadi ‘diakamue, bakaya ne Yezu.’ (Mat. 4:18-22) Bia muomumue, pakalua Shaula wa ku Tâso muena Kristo ne pakatuadijaye kumona tshiakabidi, kakaladikija malu to, kadi ‘pa dîba adi, wakabanga kuambila bantu bualu bua Yezu mu nsunagoga.’ (Bien. 9:20) Dîba didi diya ditangile anu kumpala, kaditu dipingana tshianyima to. Ke bualu kayi mbimpe tuetu ‘kuenda bu bena meji’ mu mushindu utudi tuenza mudimu ne dîba dietu.—Ef. 5:15, 16.
2 Malu adi mua kututulukila: Mishindu ya kuenzela Yehowa mudimu itudi nayi lelu idi mua kujimina malaba. (Yak. 4:14) Tuetu bonso tutu ne ‘bikondo bitu malu atutulukila.’ (Muam. 9:11) Kabidi, bu mutudi tuetu bonso batangile ku bukulakaje, kakuena mushindu wa tuetu kunyema ntatu itu “matuku mabi” a bukulakaje atuadila bantu ne idi mua kutupangisha mua kuenzela Yehowa mudimu mu ndongoluelu eu. (Muam. 12:1) Ke bualu kayi ki mbimpe kujingakana bua kudilambula kudi Nzambi anyi kuindila bua kumuenzela mudimu bikole anu palengela nsombelu to, kadi tudi ne bua kuenza tshionso tshitudi mua kuenza mpindieu. (Luka 9:59-62) Abalahama uvua ne ditalala mu matuku ende a ndekelu, wakafua yeye mumane ‘kulala panu muboboke, mupete diakalenga’ bualu uvua muenze malu ne meji mu nsombelu wende ne mudifile kudi Yehowa ne muoyo wende mujima.—Gen. 25:8, MMM.
3 Dîba ndishale dikese: Tudi kabidi ne bua kuenza mudimu bimpe ne dîba dietu bualu ‘dîba didi dienda dikepa.’ (1 Kol. 7:29-31, MMM) Mu katupa kîpi emu, bulongolodi ebu bubi bua malu nebushikile. Mudimu munene wa kusangisha bantu badi bu mikoko mu tshikondo tshia ‘kunowa bintu bia pa buloba’ neujike. (Buak. 14:15) Nunku tudi ne bua kuikala badimuke bua tunyinganyinga tua pa buloba ebu ne bua malu adi apesha bantu ditanaji kabilu kutuangata dîba ditudi mua kuenzela Nzambi mudimu. (Luka 21:34, 35) Netuikale ne disanka dia bungi patudi tutangila panyima ne tumona ne: tuvua badifile bikole mu mudimu wa kunowa.
4 Tudi ne bua kuikala tutangila bua katupangi mua kuenza midimu yonso mimpe idi imueneka katuyi tulekela nansha umue utuenda makasa to. Tudisuikayi bua kuenzela Yehowa mudimu ne muoyo mujima ‘patshidibi bibikidibua ne: lelu.’ (Eb. 3:13) Tuetu benze nanku, netuleje mutudi bena meji ba bushuwa bualu muntu “udi wenza disua dia Nzambi udi ushalaku tshiendelele.”—1 Yone 2:17.