Tumanyishayi Bulelela Dituku Dionso pa Kulonda Tshilejilu Tshia Yezu

¹ Pakalua Yezu pa buloba, uvua ne mudimu wa pa buawu wa kukumbaja. Eu uvua mupepele menemene: “Kufila bumanyishi budi butangila bulelela.” (Yone 18:​37, NW) Wakamanyisha bulelela pa bidi bitangila ngikadilu milenga ne malongolola bia Tatuende. Kudiye, mudimu eu uvua bu tshiakudia; nsombelu wende mujima uvua mushindamene pa mudimu eu mumuambika. (Yone 4:34) Luka wakamanyisha ne: Yezu ‘uvua uyisha mu ntempelo ku dituku ku dituku.’ (Luka 19:47) Yezu wakatumika ne dîba dionso divuaye nadi. (Yone 9:⁠4) Katupa kîpi kumpala kua lufu luende, wakafika ku diambila Tatuende ne: “Ndi mukutumbishe pa buloba, ndi mujikije mudimu uwakampesha bua kuenza.”​—⁠Yone 17:⁠4, NW.

² Bia muomumue, bikala mutshima wetu muujibue ne dianyisha bua bionso bidi Yehowa muenze, netudiumvue basakibue bua kuakula bua bualu buende dituku dionso. Apu netufuane bayidi ba Yezu bakamba ne bukitu ne: “Katuena mua kulekela kumanyisha bitudi bamone ne bumvue.” (Malu 4:​20, MMM) Bavua batungunuka ne kuakula bua Yehowa, bualu muyuki mufunda udi ushindika ne: “dituku dionso . . . bakatungunuka kabayi balekela.” (Bienz. 5:​42, NW) Udi ne bua kudiebeja ne: ‘Ndiku muidikiji wa Mulongeshi wanyi, Yezu anyi?’

³ Tuyishayi katuyi tujingakana: Yezu wakamba ne: pamanyishibua mukenji wa Bukalenge pa buloba bujima, “apu ke nshikidilu kushishaye kulua.” (Mat. 24:​14, NW) Ebi bidi ne bua kutusaka bua kumona mushinga ne dikengela mitalu bia mudimu wetu. Bamanye se: muoyo wa miliyo ya bantu udi mu njiwu, tudi bajingulule se: kakuena bualu bua nsongo ne bua mushinga kupita mudimu wa kuyisha. Bu mudi ndongoluelu wa malu eu usemena ku nshikidilu wende, tshikondo ntshishale tshîpi bua kujikija mudimu eu.

⁴ Luapolo idi ileja ne: Yehowa udi wambuluja disangisha dia bantu badi bafuane mikoko. (Yesh. 60:​22, NW) Mu bitupa bivule bia pa buloba, bantu badi bakukila mu mushindu muena dîna ku bulelela, bamba ne: “Netuye nenu, bualu tudi bumvue bamba ne: Nzambi udi nenu.” (Zek. 8:​23, NW) Mêyi a Yezu adi ne mushinga mukole lelu’eu: “Bia kunowa bidi bia bungi, kadi bena mudimu badi banya-banya. Nenku, nulombe kudi Mfumu wa budimi bua atume bantu mu mudimu wende wa kunowa.” (Mat. 9:​37, 38, NW) Ebi kabienaku bitukankamija bua kuleja mitalu, bu muakenza bayidi ba Yezu ‘bavua mu ntempelo ku dituku ne ku dituku batumbisha Nzambi’ anyi?​—⁠Luka 24:⁠53.

⁵ Tumanyishayi bulelela dituku dionso: Udi ne bua kuela meji dituku dionso pa mushindu uudi mua kumanyisha bulelela kudi bakuabu. Misangu ya kuenza nunku kayitu ipangika nansha. Udiku mua kuangata minute mikese bua kuela nshinga kudi mulunda kampanda peshi muntu kansanga mumanya uudi mumone se: udi mua kuanyisha bua kukuteleja anyi? Peshi, bua tshinyi kubenga kufundila muntu uudi mupangile kusangana kuende mukanda? Ukadiku muele meji bua kushiya trakte kudi ngenda-mushinga uudi usumba bintu anyi? Kakuyi mpata nansha, udi mua kuela meji pa mishindu mivule idi ikumuenekela dituku dionso bua kumanyisha ditekemena diebe kudi bakuabu. Biwenza madikolela ne biwadianya bukitu, Yehowa neakuambuluishe.​—⁠1 Tes. 2:⁠2.

⁶ Nenku, kumpala kua kutuadija midimu yebe ya matuku onso, udiebeje ne: ‘Nengangateku dipangadika dia kumanyisha ditekemena dianyi biapetekaku mushindu lelu anyi?’ Idikija ngikadilu wa Yezu, wakumvuija bua tshinyi uvua mutumibue pa buloba ne: “Ndi ne bua kumanyisha lumu luimpe lua bukalenge bua Nzambi.” (Luka 4:​43, NW) Biwajinga kufuanangana ne Mulongeshi webe, newenze bia muomumue.​—⁠Luka 6:⁠40.