TSHIBUTSHILU TSHIA MIKANDA TSHIA KU ENTERNETE tshia Watchtower
TSHIBUTSHILU TSHIA MIKANDA TSHIA KU ENTERNETE
tshia Watchtower
Tshiluba
  • BIBLE
  • MIKANDA
  • BISANGILU
  • km 1/08 dib. 3-6
  • ‘Manyisha bantu lumu luimpe’

Kakuena filme nansha umue mu tshitupa etshi to.

Tshilema ntshienzeke mu diambula dia filme.

  • ‘Manyisha bantu lumu luimpe’
  • Mudimu wetu wa Bukalenge—2008
  • Bintu bia muomumue
  • Manyisha buimpe bua Yehowa bikole menemene
    Mudimu wetu wa Bukalenge—2007
  • ‘Manyisha Dîyi dia Nzambi menemene’
    Mudimu wetu wa Bukalenge—2002
  • Tutungunukayi ne kumanyisha bakuabu malu a kukema a Yehowa
    Mudimu wetu wa Bukalenge—2004
  • Tshikondo tshia Tshivulukilu ntshikondo tshia kuvudija mudimu
    Mudimu wetu wa Bukalenge—2011
Tangila bikuabu
Mudimu wetu wa Bukalenge—2008
km 1/08 dib. 3-6

‘Manyisha bantu lumu luimpe’

1. Tudi tumanyisha bantu lumu luimpe kayi?

1 Tudi ne diakalenga dia ‘kumanyisha bantu lumu luimpe lua ngasa wa Nzambi’ mu tshikondo etshi tshidi bantu batamba kupeta anu ngumu mibi. (Bien. 20:24) Tshilejilu, tudi tumanyisha bantu ne: ‘matuku a ku nshikidilu’ akadi pa kujika ne Yehowa neateke bulongolodi bupiabupia muikala kamuyi ‘malu a ku mudilu.’ (2 Tim. 3:1-5; Buak. 21:4) Mu tshikondo atshi masama kaakuikalaku kabidi to. (Yesh. 33:24) Bantu bavua bafue nebabike ne nebasombe pamue ne balela ne balunda babu. (Yone 5:28, 29) Buloba nebulue mparadizu. (Yesh. 65:21-23) Ebi mbilejilu bikese bia lumu luimpe lutudi tumanyisha.

2. Bua tshinyi tshikondo tshia Tshivulukilu ntshimpe bua kuyisha lumu luimpe?

2 Netupete mushindu muimpe wa kuyisha lumu luimpe elu mu ngondo muisatu, muinayi ne muitanu. Bantu ba miaba ya bungi nebapete mushindu wa kuyisha bikole mu ngondo eyi bualu matuku atu male kupita butuku. Pashishe, netuikale ne bua kuenza Tshivulukilu tshidi tshikale tshisangilu tshinene tshia mu tshidimu mu Disambombo dia 22 a ngondo muisatu. Tutuadije kudilongolola ku mpindieu bua kuenza mudimu eu bikole.

3. Ntshinyi tshidi mua kuambuluisha bena mu dîku bua kuyisha bikole?

3 Udi mua kulua mpanda-njila muambuluishi: Udiku mua kudilongolola bua kuikala mpanda-njila muambuluishi bua ngondo umue, ibidi peshi yonso isatu anyi? Nudi mua kuyukila bualu ebu mu dilonga dienu dia mu dîku dia musangu walonda. Nuenu beleshangane diboko, bena mu dîku dienu ba bungi badi mua kulua bampanda-njila anyi nansha umue tshianana. (Nsu. 15:22) Nusambile bua bualu ebu ne Yehowa neanuambuluishe. (Nsu. 16:3) Nansha nuenu kanuyi bapete mushindu wa kulua bampanda-njila bambuluishi, nudi mua kudilongolola bua kuyisha bikole pamue ne bantu bikala bampanda-njila mu tshisumbu.

4. Mmunyi mudi muntu mua kulua mpanda-njila muambuluishi nansha yeye muena mudimu?

4 Wewe mudilongolole bimpe, udi mua kulua mpanda-njila muambuluishi nansha wewe muikale muena mudimu. Tshilejilu, udi mua kuyisha panudi mu dikisha dia midi. Udi kabidi mua kulomba teritware udi pabuipi ne kuebe anyi ne muaba uudi wenzela mudimu bua wikale uyisha nansha dîba dimue kumpala kua kuya ku mudimu anyi paudi ukufuma. Udi mua kupeta kabidi dîba dia bungi wewe muteke bua kuenza malu adi kaayi ne mushinga mu ngondo mukuabu ne muyishe bikole matuku a ku ndekelu kua lumingu. Bakuabu batu bangata dikisha dia dituku dimue anyi abidi bua kuyisha bikole.

5. Mmunyi muudi mua kuambuluisha bakulakaje anyi bantu badi basama bua kuluabu bampanda-njila bambuluishi?

5 Wewe mukulakaje, usama anyi muikale ne butekete kampanda udi mua kulua mpanda-njila muambuluishi wewe uyisha ndambu dituku dionso. Lomba Yehowa bua akupeshe “bukole.” (2 Kol. 4:7) Muanetu mukuabu wa bakaji wa bidimu 106 wakapeta mushindu wa kulua mpanda-njila muambuluishi. Balela bende badi Bantemu ne bena mu tshisumbu bakuabu bakamuambuluisha bua kuyisha ku nzubu ne ku nzubu, kupinganyina bantu, kulonga Bible ne bantu ne kuyisha mishindu mikuabu. Wakambuluisha bua kutuadija kulonga Bible ne bantu dikumi. Udi wamba ne: “Pandi ngela meji bua diakalenga dimvua mupete dia kuikala mpanda-njila muambuluishi, muoyo wanyi udi uula tente ne dinanga ne dianyisha bua Yehowa, bua Muanende ne bua bulongolodi buende. Ndi ngela ‘Yehowa tuasakidila’ ne muoyo mujima.”

6. Mmunyi mudi balongi mua kuluabu pabu bampanda-njila bambuluishi?

6 Wewe muikale mulongi, udi pebe mua kulua mpanda-njila muambuluishi. Tshilejilu, udi mua kuyisha bikole mu matuku a ku ndekelu kua lumingu anu bu mutudi bambe bua bena mudimu. Amue matuku udi kabidi mua kuyisha nansha dîba dimue paudi ufuma mu kalasa. Udi mua kuyisha matuku adibu banupesha dikisha. Wewe musue kulua mpanda-njila muambuluishi, yukila ne baledi bebe.

7. Ntshinyi tshidi bakulu mua kuenza bua kuambuluisha bantu badi basue kuyisha bikole mu tshikondo tshia Tshivulukilu?

7 Mudi bakulu mua kuambuluisha bena mu tshisumbu: Tshilejilu tshia bakulu tshidi mua kuambuluisha bena mu tshisumbu bua kuyisha bikole. (1 Pet. 5:2, 3) Badi mua kulongolola bisangilu bikuabu bia mudimu wa buambi bua bantu badi basue kuyisha mu dinda menemene, bua badi bafuma mu kalasa ne bua bena mudimu. Mu ngondo ituenza mudimu wa pa buawu eu, mutangidi wa mudimu udi ne bua kulongolola bua bamanyishi badi bakumbane bikale balombola bisangilu ebi, bua kuikale teritware mikumbane, bibejibeji ne mikanda idi ikengela.

8. Tshivua bena tshisumbu kampanda benze tshidi tshitulongesha tshinyi?

8 Mu tshisumbu tshikuabu, bakulu bakatuadija kusaka bantu bua kuluabu bampanda-njila bambuluishi ngondo ya bungi kumpala. Lumingu luonso bavua bamanyisha mêna a bantu bavua bangate bumpanda-njila buambuluishi. Bualu ebu buvua bujadikila bavua basue kuyisha bikole ne: kabakupangila bantu ba kuyisha nabu to. Bavua balongolola bisangilu bikuabu bia mudimu wa buambi mu dinda menemene ne ku dilolo. Bualu ebu buakambuluisha bantu 53 bua kulua bampanda-njila bambuluishi mu ngondo muinayi, tuambe ne: bungi bua bamanyishi bonso ba tshisumbu bukosolola pankatshi ne pankatshi.

9. Bua tshinyi tshikondo tshia Tshivulukilu ntshimpe bua badi basue kutuadija kuyisha?

9 Ambuluisha bakuabu bua kuyishabu: Padi bantu bapiabapia anyi bana balue bamanyishi, badi mua kuyisha pamue ne bamanyishi ba kale. Badi mua kupeta mushindu wa kuyisha ne bantu aba mu tshikondo tshia Tshivulukilu padi bantu ba bungi bayisha bikole. Udiku ulonga ne muntu udi uya kumpala bimpe ne ukadi mushintulule nsombelu wende bilondeshile mikenji ya Yehowa anyi? Udiku ne bana badi ne bikadilu bilenga ne badi baya kumpala kadi kabayi banji kulua bamanyishi anyi? Bobu basue kulua bamanyishi badi kabayi banji kutambula ne wewe mumone ne: mbakumbane, ambila bakulu. Mutangidi muludiki neambile bakulu babidi bua baye nebe bua kuyukila nabu.

10. Ntshinyi tshidi bakulu mua kuenza bua kuambuluisha bantu bakadi balekele kuyisha?

10 Ngondo eyi neikale kabidi mimpe bua bantu bakadi balekele kuyisha kutuadijabu kuyisha kabidi ne tshisumbu. Batangidi ba tusumbu tua dilonga dia mukanda ne bakulu bakuabu badi ne bua kudienzeja bua kuya kutangila bantu abu ne kubalomba bua kuyisha nabu. Bikalabu bakadi benze matuku a bungi kabatshiyi bayisha, bakulu babidi badi mua kuyukila nabu bua kumona ni mbakumbane bua kuyisha.​—km 11/00 dib. 3.

11. Nku tshinyi kudi Nzambi mutuleje bulenga buende budi kabuyi butuakanyine?

11 Dilongolole bua Tshivulukilu: Mulambu wa Yezu udi uleja “ngasa wa Nzambi” anyi bulenga buende budi kabuyi butuakanyine. (Bien. 20:24) Bantu miliyo mivule badi ne dianyisha bua mulambu eu nebadisangishe mu Disambombo dia 22 a ngondo muisatu panyima pa dîba dimane kubuela bua kuvuluka lufu lua Yezu. Tudi basue kubikila bantu badi banange bulelela ne kubambuluisha bua kubuelabu mu tshisangilu etshi tshidi tshileja bulenga budi kabuyi butuakanyine budi Nzambi mutuleje.

12. Mbanganyi batudi ne bua kubikila mu Tshivulukilu?

12 Funda mêna a bantu bonso baudi musue kubikila bu mudi: balela bebe, bena mutumba nebe, bena mudimu nebe ne balongi nebe, bantu bauvua ulonga nabu Bible ne bautshidi ulonga nabu ne bantu bautu uyukila nabu malu a Nzambi. Bantu baudi ubikila bobu bikale ne nkonko, udi mua kukonkonona nabu tshisakidila tshidi tshiakula bua Didia dia Mukalenge tshidi mu dibeji dia 206-208 dia mukanda wa Bible ulongesha. Udi mua kutuadija kulonga nabu Bible bualu udi mubaleje mukanda ututu tulongesha nawu bantu Bible.

13. Mmunyi muvua Yehowa muambuluishe bana betu babidi bavua babikile bantu mu Tshivulukilu?

13 Muanetu mukuabu wa bakaji wakafunda mêna 48 a mêku avuaye ne bua kubikila. Pavuaye wenda ubabikila, uvua wenda wenza tshimanyinu pa mêna abu ne ufunda dituku divuaye mubabikile. Biakamuenza disanka dia bungi pakamonaye bantu 26 bavuaye mubikile balue mu Tshivulukilu. Muanetu mukuabu wakabikila muena mudimu wende uvua mukalenge Abe kale. Muntu au kuluaye ne kuambaye pashishe ne: “Malu andi mulonge mu dîba dimue muaba eu mmapite amvua mulonge mu bidimu 30 bimvua muenze mu ekeleziya wa Katolike.” Matuku makese panyima pa Tshivulukilu, wakitaba bua kulonga Bible ku diambuluisha dia mukanda wa Bible ulongesha.

14. Mmudimu kayi wa pa buawu utuatuadija mu 1 dia ngondo muisatu?

14 Mudimu wa pa buawu: Kutuadijila mu Disambombo dia 1 dia ngondo muisatu too ne mu dia 22 a ngondo eu, netuabanye mabeji a kubikila nawu bantu mu Tshivulukilu pa buloba bujima. Bamanyishi bonso badi ne bua kuenza mudimu eu ne muoyo mujima. Mbimpe kupesha muntu diende dibeji ku bianza pamutu pa kumushiladi muinshi mua tshibi. Kadi nuenu bikale ne teritware munene, bakulu badi mua kumona mushindu kayi unudi mua kushila bantu badi kabayi ku mabu mabeji. Mu Disambombo ne mu Dia lumingu, netufile kabidi ne bibejibeji.

15. Leja tshitudi mua kuamba bua kubikila bantu mu Tshivulukilu.

15 Bu mutudi katuyi ne dîba dia bungi dia kuabanya mabeji a dibikila aa, katuakudi mêyi a bungi to. Tuakule ne musangelu. Tudi mua kuambila muntu ne: “Tudi basue kukubikila wewe ne bena mu dîku dienu ne balunda bebe mu tshisangilu tshia mushinga mukole tshituenza mu dia 22 a ngondo muisatu. Diebe dibeji ndiodi edi. Mbafundamu malu onso adi atangila tshisangilu etshi.” Muntu udi mua kuela nkonko anyi kuangata dibeji ne kuleja mualuaye. Funda dîna diende ne keba mushindu wa kulua kumutangila.

16. Mbualu kayi budi buleja mudi kubikila bantu mu Tshivulukilu kuikale ne mushinga?

16 Tshidimu tshishale, musalayi mukuabu uvua mulue kusangana dibeji dia dibikila bua Tshivulukilu muinshi mua tshibi tshiende. Kuangataye dipangadika dia kuluamu, kadi uvua ne bua kuanji kulomba njila kudi mfumuende. Pakalejaye mfumuende dibeji dia dibikila, mfumuende wakanji kushala mupuwe ne pashishe kumuambilaye ne: “Baledi banyi Mbantemu tuvua tuya nabu mu bisangilu.” Kakamuitabila anu yeye to, kadi wakaya pende mu Tshivulukilu.

17. Mmushindu kayi utudi mua kuleja ne: tudi tuangata bulenga bua Nzambi ne mushinga?

17 Ikala ne dianyisha: Bu mu mukadi Tshivulukilu tshia 2008 tshisemene, tuelayi meji bua mudi Yehowa mutuleje bulenga buende budi kabuyi butuakanyine. Mupostolo Paulo wakafunda ne: ‘Tudi tunusengelela kabidi ne: Kanuangatshi ngasa wa Nzambi bu bualu bua patupu.’ (2 Kol. 6:1) Mmunyi mutudi mua kuleja ne: Tudi tuangata bulenga budi Nzambi mutuleje ne mushinga? Paulo wakafunda ne: “Kadi mu malu onso tudi tudimanyisha bu bena mudimu ba Nzambi.” (2 Kol. 6:4) Nunku tudi tuleja dianyisha dietu kudi Yehowa bua bulenga buende patudi ne bienzedi bimpe ne tuyisha lumu luimpe ne tshisumi. Tshikondo tshia Tshivulukilu etshi netshitupeteshe mushindu wa kuyisha lumu luimpe bikole.

[Kazubu mu dibeji 3]

Mbanganyi badi mua kulua bampanda-njila bambuluishi?

▪ Bena mu dîku bonso

▪ Bena mudimu

▪ Bakulakaje ne badi basama

▪ Balongi

[Kazubu mu dibeji 4]

Patudi tuabanya mabeji a dibikila nawu bantu mu Tshivulukilu:

▪ Katuakudi bikole to, tuikale ne musangelu

▪ Tufunde mêna a bantu badi batuakidile bimpe

▪ Tufile bibejibeji mu Disambombo ne mu Dia lumingu

    Mikanda ya mu Tshiluba (1982-2024)
    Patuka
    Buela
    • Tshiluba
    • Tumina bakuabu
    • Biudi musue
    • Copyright © 2025 Watch Tower Bible and Tract Society of Pennsylvania
    • Malu a kulonda
    • Mikenji ya mua kulama malu masokoka
    • Biudi witaba bua kuenzekabi mu tshiamu
    • JW.ORG
    • Buela
    Tumina bakuabu