Mukanda wa Kudi Kasumbu Kaludiki

Bana betu basuibue,

Mupostolo Paulo uvua uleja muvuaye munange bana babu bena kuitabuja bualu uvua ubela kalumbandi mu tshikondo tshionso tshivua mushindu umueneka. Wakafundila bena Kristo ba ku Lomo ne: ‘Ndi nsakidila Nzambi wanyi mu Yezu Kristo bua buonso buenu, bualu bua ditabuja dienu didi dimanyishibue pa buloba buonso.’ (Lomo 1:8) Bena Kristo ba kumpala bavua bamanyike mu tshipapu tshionso tshivua bena Lomo bakokesha bua ditabuja diabu dikole ne bua tshisumi tshivuabu natshi mu mudimu wa diyisha. (1 Tes. 1:8) Kabiyi mpata, Paulo uvua munange bana babu abu bikole bua bivuabu benza!

Tudi tuela Yehowa tuasakidila misangu yonso itudi tuela meji bua bualu buenu anu bu Paulo. Tudi banunange ne muoyo mujima! Numanye ne: Yehowa mmunange yonso wa kunudi. Bamue ba kunudi badi ne buluishi bukole kadi nudi nutungunuka amu ne kuyisha lumu luimpe. Yehowa udi usanka bikole bua dikima ne muoyo mukole binudi nabi.​—Nsu. 27:11.

Pawikale ubala bimpe, wela kabidi meji bikole bua biudi ubala mu tshitupa tshia ‘Malu a Bantemu ba Yehowa ba tshikondo tshietu’ mu mukanda wetu mulenga wa Annuaire, neumone ne: Mukalenge Yezu Kristo udi wenda ‘utshimuna, uya bua kutshimuna kabidi,’ neumone kabidi ne: tshia mvita tshionso tshidibu batula bua kuluisha natshi bayidi ba Kristo katshiakuenza bualu nansha bumue to.​—Buak. 6:2, MMM; Yesh. 54:17.

Paulo wakafundila bena Kristo ba ku Filipoi ne: ‘Ndi nsakidila Nzambi wanyi bualu ndi mvuluka binudi benze penu bua kutangalaja’ lumu luimpe. (Filip. 1:3-5, MMM) Tuetu bena mu Kasumbu Kaludiki tudi petu ne meji a mushindu umue bua bualu buenu. Mu tshidimu tshia mudimu tshia 2007, bamanyishi 6 691 790 bavua bayishe mêba 1 431 761 554 mu matunga 236 pa buloba bujima. Ndisankapu kayi bua munudi badifile muenu muonso bua kuyisha mudimu wa lumu luimpe kumpala. Elayi meji bua bantu miliyo mivule batudi badienzeje bua kulongesha, bionso ebi anu bua butumbi bua Yehowa.

Pavua Paulo mufunde musangu mukuabu kabidi, uvua muleja muvuaye umvuila bana babu luse. Wakambila bena Tesalonike ne: ‘Katuyi tulekela kuvuluka dinanukila dienu dia mu ditekemena dia Mukalenge wetu Yezu Kristo, ku mêsu kua Nzambi udi kabidi Tatu wetu.’ (1 Tes. 1:2, 3) Bushuwa, ntatu idi anu kuoku. Kadi padi ntatu itukuata, tshidi tshimpe ntshia kuyikolela. Nntatu kayi iudi nayi? Udi mutekete ku muoyo bua disama dikole didi dikupangisha bua kuenzela Yehowa mudimu mushindu uuvua musue kuenza anyi? Udiku mufuishe muena dibaka nebe unuvua basombe nende bidimu bia bungi anyi? (Nsu. 30:15, 16) Udi ukeba kubuela dibaka anu mu Mukalenge kadi kuena mupete mulume anyi mukaji wa kusela udi munange Yehowa bu wewe anyi? (1 Kol. 7:39) Udiku uluangana bua kukolesha bana bebe mu tshikondo etshi tshidi dimona kantu dikole anyi? Nansha nsombelu webe muikale wa mushindu kayi, wewe muteke malu a Bukalenge bua Nzambi pa muaba wa kumpala mu nsombelu webe, umanye ne: Yehowa ‘kêna upua muoyo mudimu webe ne dinanga diwakaleja bua dîna diende.’ Bana betu, tudi tunusengelela: “Katupungidi ne dienza dia malu mempe.”​—Eb. 6:10; Gal. 6:9, MMM.

Ntshinyi tshianuambuluisha bua kuya anu kumpala? ‘Ditekemena dia Mukalenge wetu Yezu Kristo’ nedinuambuluishe anu bu muvuadi diambuluishe bena Tesalonike. Paulo uvua muambilamu pavuaye mufuanyikije ‘ditekemena dia lupandu’ ne tshifulu tshikole tshidi tshipangisha ngenyi mibi ne dielakana bua kubuelabi mu mutu mua muena Kristo.​—1 Tes. 5:8.

Bulelela, panudi nutungunuka ne kuenzela Nzambi mudimu ne disanka, nudi nupesha Yehowa diandamuna mu tshilumbu tshia bumfumu tshivua Satana mujule. Satana udi wamba ne: bantu ba Nzambi batu benza bua kudisankisha, wamba kabidi ne: nebalekele kutendelela Nzambi padi ntatu ivula anyi padibu bamona nshikidilu wa ndongoluelu wa malu eu kayi ulua lukasa. Nunku, etshi ke tshikondo tshia nuenu kuleja mudi Diabolo muena dishima menemene. Umanye ne: padi dituku dimue dipita, malu malenga adi enda asemena pabuipi.

Anu bu muvua Paulo ne disanka dîba dionso divuaye upeta mushindu wa kuela bana babu kalumbandi bua ditabuja diabu dikole, didifila diabu bua kutungunuja mudimu wa diyisha kumpala ne bua dinanukila diabu, tudi petu ne disanka dia kunuela kalumbandi ne tunujadikila ne: tudi banunange bikole. Tungunukayi ne kuenza mudimu mulenga.

Tudi tunujingila malu mimpe a bungi mu mudimu wa Nzambi bua tshidimu etshi. Angatayi mioyo ya kudi

Bana benu,

Bena mu Kasumbu Kaludiki ka Bantemu ba Yehowa