Kudilongela Bible ne kumulonga mu dîku kudi ne mushinga wa bungi
1. Ndijinga kayi dia pa buadi didi nadi bena mu Kasumbu Kaludiki buetu tuetu mu tshikondo etshi, ne bua tshinyi?
1 Anu bu muvuabi mu bidimu lukama bia kumpala, Kasumbu Kaludiki kadi kela meji a bungi bua diakalengele dia bantu ba Yehowa. (Bien. 15:6, 28) Bu mudi dikenga dinene dienda anu disemena pabuipi bikole, mbitambe buimpe bua mumanyishi yonso wa Bukalenge ikale ne malanda makole menemene ne Yehowa. Ntshinyi tshiwenza pa muaba wa dîba diuvua uya mu Dilonga dia Mukanda dia Tshisumbu? Pa dîba adi, bantu bonso badi ne bua kutendelela mu dîku. Tuetu bafile dîba edi ne meji ku malu a Nzambi, nebituambuluishe bua kumanya Dîyi dia Nzambi bikole ne malongesha mimpe adimu neatuambuluishe.—Mus. 1:1-3; Lomo 11:33, 34.
2. Mmushindu kayi utudi mua kulongolola ntendelelu wetu wa mu dîku dilolo?
2 Ntendelelu wa mu dîku ku dilolo: Bamfumu ba mêku badi ne bua kuambula bujitu buabu kumpala kua Yehowa; bua nanku badi ne bua kuikala benza bua ne: bikale ne programe muimpe wa dilonga dia Bible mu mêku abu lumingu luonso ne bikala bamunemeka. (Dut. 6:6, 7) Bana betu batshidi bajike badi kabayi ne mêku nebikale ne bua kudilongela Bible ne kuenza makebulula dîba adi. Mbitambe buimpe bua tuetu bonso ‘kudisumbila tshikondo’ tshia kulonga Dîyi dia Nzambi ne kuelangana meji adi mua kulama malanda etu ne Yehowa bimpe nansha mudi ‘matuku aa mabi.’—Ef. 5:15, 16.
3, 4. Nngenyi kayi idibu batupesha ya mua kupeta malu a kulonga? Tuikale ne tshipatshila kayi?
3 Malu a kulonga: Index des Publications anyi ditadi dia Watchtower Library bidi mua kunuleja miaba ya kupeta malu adi mua kunuambuluisha mu tshikondo tshia dilonga dienu dia Bible. Badi mu mêku badi mua kulonga biena-bualu bitu bipatuka mu Tshibumba tshia Nsentedi, bu mudi bia “Malu ambuluisha dîku dienu,” “Longesha bana bebe” ne “Buenu nuenu bansonga.” Nansha mu Réveillez-vous! kabidi mutu biena-bualu bia “Les jeunes s’interrogent. . . ” ne biena-bualu bikuabu bimpe bitu biakula malu a kukema adi mu bintu bidi Nzambi mufuke.
4 Kubala Bible mu dîku ne lutulu kudi mua kuambuluisha bena mu dîku bonso bua kulamabu mikenji ya Nzambi mu ngenyi yabu ne mu mioyo yabu. (Eb. 4:12) Matuku makuabu nudi mua kutangila bande ya video ya bulongolodi buetu ne kuyikila malu adimu. Bidi bikengela kunana lungenyi bua kumanya mua kudisunguila tshinudi ne bua kulonga ne mushindu wa kutshilonga. Kuenaku mua kukonka ba mu dîku diebe tshidibu basue kulonga ne mushindu wa kutshilonga anyi?
5. Bua tshinyi kudilongela Bible ne kumulonga mu dîku kudi ne mushinga wa bungi mu nsombelu wetu mpindieu?
5 Mushinga wa kulonga: Tuetu bakoleshe malanda etu ne Yehowa nebituambuluishe bua ‘kuimana, kumona lupandu lua Yehowa.’ (Ekes. 14:13) Baledi badi dijinga ne Nzambi bua abaludike bua bobu kukolesha bana babu bimpe mu ‘tshikondo etshi tshikonyangale ne tshia tshishiku.’ (Filip. 2:15) Bana badi dijinga ne diambuluisha bua kumanya mua kupitabu ne nsombelu udi wenda unyanguka mu tulasa lelu eu. (Nsu. 22:3, 6) Mulume ne mukajende badienzeje bua kukolesha ‘mionji yabu isatu’ ne Yehowa. (Muam. 4:12) Tuibake ‘ditabuja dietu ditambe tshijila’ bua kuenza malu ne meji mu dîba didi ditushadile edi.—Yuda 20.