Tudi ne bintu bia mushinga mukole bia kupesha bantu netu
1 Dîyi dia Nzambi ndiuwule tente ne malongesha mimpe matambe atutu banange bikole. (Mus. 12:6; 119:11, 14) Dimue dituku, Yezu wakafila bilejilu bivua bileja Bukalenge bua Nzambi mishindu mishilashilangane. Yeye kulua kuela bayidi bende lukonko elu: “Nuakujingulula malu aa onso anyi?” Bobu ne: “Eyo.” Ke yeye kubambila ne: ‘Bua bualu ebu, mulongeshi yonso wa Mikenji udi ulua mulongi wa mu Bukalenge bua mu diulu mmufuanangane ne muena bintu udi upatula bintu bipiabipia ne bikulukulu mu tshibutshilu tshiende.’—Mat. 13:1-52, Muanda Mulenga Lelu.
2 Tudi mua kumona malu a mu Bible atuvua bamanye patuakatuadija kulonga Bible ne: bintu bikulukulu. Kadi patuakatungunuka ne kulonga malu male a mu Dîyi dia Nzambi, tuakamanya malu makuabu a mu Bible atudi mua kuamba ne: bintu bipiabipia. (1 Kol. 2:7) ‘Mupika wa lulamatu ne wa budimu’ udi kabidi utumanyisha malu mapiamapia makuabu.—Mat. 24:45, NW.
3 Malu aa, ni nga kale, ni mapiamapia, tudi baanange bikole. Ke bualu kayi tudi tukeba bua batulongeshe ne tumanye tshia kuenza bua kuikala balongeshi ba Dîyi dia Nzambi, bua kuambila bantu malu malenga atudi tulonga.
4 Londa tshilejilu tshia Yezu: Bua Yezu kulejaye muvuaye umona malongesha a mu Bible, uvua uditatshisha bikole bua kualongesha bantu. Nansha pavuaye mupungile, kavua ulekela kupatula bintu bivua mu “tshibutshilu” tshiende to.—Yone 4:6-14.
5 Yezu uvua wambila bantu bavua kabayi bamanye bimpe Nzambi ne malu adiye mulongolole malongesha a mu Bible adi afila muoyo, bualu uvua mubanange. (Mus. 72:13) Uvua ‘uyisha bantu bavua basue kumanya Nzambi malu a bungi’ bualu uvua ubumvuila luse.—Mâko 6:34.
6 Widikije Yezu: Tuetu banange bikole malu a mu Bible atudi balonge anu bu Yezu, muoyo neutusake bua kualeja bantu mu Bible. (Nsu. 2:1-5) Nansha mututu imue misangu bapungile, netuambile bantu malu a mu Bible ne disanka dionso. (Mâko 6:34) Tuetu ne dianyisha dia bungi bua malu atudi balonge, netuenze muetu muonso bua kuyisha bikole, tukeba anu mushindu wa kulongesha bantu netu.