Mandamuna a nkonko yenu

▪ Padi bantu basue bua babenzele muyuki wa dibaka diabu ku Nzubu wa Bukalenge, badi ne bua kuyikila malu kayi ne bakulu?

Bibilu bia mabaka bidi biumvuanga ne mikenji ya mu Bible bidi bitumbishisha Yehowa. Bu mudi bantu bamanyina bulongolodi buetu ku malu atu enzekela ku Nzubu wa Bukalenge, miyuki ya mabaka idibu mua kuenzelaku idi ne bua kutamba kunemeka mikenji ya mu Bible bikole. Kadi bua ‘malu onso kuenzekawu bilengele ne malondangane biakane,’ mbimpe bakulu ba mu Nzubu wa Bukalenge au bayikile amue malu ne bena dibaka badi balomba Nzubu wa Bukalenge bua muyuki wa dibaka diabu.​—1 Kol. 14:40.

Bena dibaka badi basue bua muyuki wa dibaka diabu wenzekele ku Nzubu wa Bukalenge badi ne bua kuanji kufundila komite wa mudimu wa tshisumbu kampanda tshia ku bitu mu Nzubu wa Bukalenge mukanda wa dilomba dianyisha. Baufunde kumpala kua dîba, baleje dituku ne dîba didibu basue ne: babashile nzubu. Bikala bamanye ne: bakulu kabakushintula programe ya bisangilu bua kubashila muaba to. Bena dibaka aba badi ne bua kuikala bena Kristo ba tshitembu, badi batumikila mikenji ya Yehowa.

Badi ne bua kuyikila ne bena komite wa mudimu au kumpala kua kuangata dipangadika bua malu a kuenza; bionso ebi anu bua kubenga kupendesha Nzambi wetu wa kunemeka. Nansha mudi bakulu kabayi benzeja bena dibaka aba bua kuenza anu tshiabu tshidibu bobu bamone, padi tshintu kampanda katshiyi tshimpe, badi ne bua kuitaba tshidi bakulu babambila. Anu mijiki idibu basungula ya mu bande yetu ya Mélodie du Royaume ke itubu mua kuela anyi misambu idi mu mukanda wetu wa misambu. Bakulu aba ke badi mua kubitabila bua kushintulula mutubu balonge bibasa anyi kulengeja Nzubu wa Bukalenge ne bintu bikuabu. Bakuatshi ba bindindimbi ne foto kabena ne bua kunyanga lumu luimpe lua tshibilu etshi to. Bakulu nebabitabile bua kuambulula bintu bidibu basue kuenza ku Nzubu wa Bukalenge anu biobi kabiyi bipumbisha malu makuabu adi bisumbu bilongolole to. Kabateki tubeji tua dibikila natu bantu ku tshibasa tshia mamanyisha to. Kadi bakulu badi mua kumanyisha bantu mu Tshisangilu tshia Mudimu ne: nebenze muyuki wa dibaka ku Nzubu wa Bukalenge dituku kampanda.

Nansha mudi bantu bonso badibu basungula, bu mudi bua kulonga bantu mu bibasa kabayi ne bua kuikala batambule, mukantshi muabu kamuena ne bua kuikala bantu batu benza malu manene adi Bible ukandika anyi badi bantu kabayi mua kuitaba bua kubamona benza mudimu au. Muyuki wa dibaka ngua kuenza kudi mukulu kampanda udi mukumbane, bikalayiki. Bu mudi bakulu bamanye kulongesha Dîyi dia Nzambi bimpe, bobu ke badi mua kufila mibelu ya mu Bible tshikondo etshi.​—1 Tim. 3:2.

Bu mudi malu enzabu alenga lumu lua mukulu udi wenza muyuki, bidi bikengela bena dibaka bamuambile pende muikalabu basue bua malu enzeke. Neayikile nabu bua kumanya ngikadilu wabu pavuabu batantshilangana; bamuambile bulelela, kabamushimi to. Pikala umue wa kudibu uvua mu dibaka kumpala, udi ne bua kufila bijadiki bidi bileja ne: udi ne dianyisha dia Bible ne mbulamatadi dia kubuela mu dibaka dikuabu. (Mat. 19:9) Nenku tshilejilu, udi mua kuleja mukulu eu mukanda wa dishipa dia dibaka dia kumpala.

Padi bena dibaka bayikila bimpe ne bakulu ne bumvuangana kabidi, tshibilu etshi netshisankishe bantu bonso.​—Nsu. 15:22; Eb. 13:17.