Kuyisha kudi kulomba kutantamena ntatu
1 Mupostolo Paulo uvua ne disanka mu bidimu bipite pa 30 bivuaye muditue anu mu diyisha lumu luimpe. Anu bu mutubi bua mudimu mulenga wonso, uvua mupete ntatu mu mudimu wende eu. (2 Kol. 11:23-29) Kadi kakalekela kuyisha to. (2 Kol. 4:1) Uvua mumanye bimpe ne: Yehowa ke uvua umupesha bukole bua kutungunuka ne mudimu eu. (Filip. 4:13) Bu muvua Paulo mufile tshilejilu mu dinanukila mu mudimu eu, wakamba ne: ‘Nuikale bidikiji banyi, bu mundi meme kabidi muidikiji wa Kristo.’—1 Kol. 11:1.
2 Mua kutantamena ntatu lelu: Dituku dionso edi, bena Kristo netu ba bungi batu babaseka, babaluisha anyi babenga kubateleja kudi balela babu, kudi bena mudimu nabu, kudi balongi nabu. (Mat. 10:35; Yone 15:20) Imue misangu ke mutubu bakuenza pebe. Kadi udi mene mua kuikala usamakana anyi uluangana dituku dionso ne mishindu ya dijikija lutetuku anyi mateta adi akupangisha mua kutendelela Yehowa bimpe ne kunanukila. Bua kunanukila, mbimpe kuelela meji ku malu a batendeledi ba Nzambi ba kale ne ba lelu badi bapetangane ne ntatu kadi bayipite makanda.—1 Pet. 5:9.
3 Tudi mua kupeta bukole bua kutungunuka ne kuyisha tuetu tuditatshisha bua ‘kuluata bintu bionso bia mvita bia Nzambi.’ (Ef. 6:10-13, 15) Mbimpe kabidi kusambila bua Nzambi atuambuluishe tunanukile. Nzambi udi utupesha nyuma muimpe bua kutantamena ntatu. (2 Kol. 6:4-7) Bua tuetu kutshimuna Satana ne bulongolodi buende, tudi ne bua kulonda mikenji ya Nzambi bimpe bua itushintulule lungenyi. (Mus. 119:24, 85-88) Anu bu mudi muana mua kubala mukanda wa kudi tatuende udi mumunange misangu ne misangu, kubala kuetu kua Bible ku dituku ku dituku kudi kukolesha malanda etu ne Yehowa. Kuikala ne tshibidilu tshia kulonga Bible pa nkayetu nekutupe meji adi atuambuluisha bua kuluangana ne ntatu. Bualu patudi tumulonga, tudi tushila lungenyi lua Nzambi muaba wa kutulombola patudi tuangata mapangadika ne tudi kabidi tupeta bukole bua kushala balamate anu Nzambi.—Nsu. 2:10, 11.
4 Kunanukila kudi kulela malu mimpe: Anu bu Paulo, kunanukila kuetu mu diyisha nekusankishe Yehowa, nekutupeteshe tuetu ne bantu bakuabu malu mimpe. (Nsu. 27:11) Nanku, tudisuikayi bua kutungunuka ne kuyisha bua kuleja ne: ditabuja dietu ndikole, ne didi ‘ditambe ngolo udi ujimina mushinga mukole, nansha bobu bamutete ne kapia.’—1 Pet. 1:6, 7.