Dituku dia kulomba bantu bua kulonga Bible
1 Kutuadijila mu ngondo wa 1 wa 2009, tshisumbu tshionso netshisungule dituku dimue dia ku ndekelu kua lumingu ku ngondo yonso dia kulomba bantu bua kulongabu Bible. Tshisumbu tshidi mua kusungula dituku dia Disambombo anyi dia Dia lumingu. Muntu udibu bayisha yeye mubenge bua kulonga Bible, numupeshe mukanda wa Bible ulongesha anyi bibejibeji bia ndekelu binudi bapete. Bakulu ne basadidi ba mudimu bonso badi ne bua kudifila bikole mu mudimu eu, ne kuambuluisha bana betu bua kutuadijabu malonga a Bible.
2 Komite wa Mudimu wa Tshisumbu neasungule lumingu ludi luakanyine bua kukeba bantu ba kulongesha Bible. Nebikale bavuluija bantu ku musangu ne ku musangu bua bikale badilongolola ne badienzeja bikole bua kukeba bantu ba kulongesha Bible padibu baya ku nzubu ne ku nzubu ne padibu bapinganyina bantu bavua bitabe bulelela.
3 Mushindu wa kudilongolola: Tangila dibeji disakidila dia Mudimu wetu wa Bukalenge wa Tshiongo 2006 ne kakanda ka Mua kutuadija mayuki mu dibeji dia 4 ne mu mukanda wa Comment raisonner mu dibeji dia 12. Badi basue badi mua kuenza mudimu ne trakte wa Kuenaku musue kupeta mandamuna a nkonko eyi anyi? Mu dibeji 3 dia Mudimu wetu wa Bukalenge wa Tshimungu 2007, badi baleja mua kutuadija kulongesha bantu bavua bangate bibejibeji. Nebenze programe bua bakulu ne basadidi bikale balombola tshisangilu tshia mudimu wa buambi tshia minite kubangila ku 10 too ne ku 15. Mu tshisangilu etshi, nebikale bakula ne bateleji bua lungenyi luimpe lumue anyi ibidi miakanyine peshi benzeja dinaya anyi manaya a tshilejilu bua kuleja mushindu wa kutuadija kulonga Bible ne bantu.
4 Kakuyi mpata, bantu bonso kabakuitaba bua kulonga Bible anyi kutungunuka ne kumulonga matuku a bungi to. Katutshinyi to, bualu Yehowa ke utu ukoka bantu badi bu mikoko mu bulongolodi buende. (Yone 6:44) Mudimu wetu kautu anu wa kukuna ntete to, utu kabidi wa kuipila ne kuela mâyi ku bintu bikadi bituadije kusasa. Nanku mudimu wetu udi kabidi wa kulongesha bantu badi basue kumanya Yehowa Bible. Kulongesha bantu Bible, nkuikala benzejanganyi ba mudimu ne Nzambi.—1 Kol. 3:9.