Tuikale tulomba bantu bua kubalongesha Bible
1. Ntshinyi tshitudi ne bua kuenza bua kutumikila mukenji wa Yezu udi mu Matayo 28:19, 20?
1 Yezu wakatupesha mukenji wa ‘kuvuija bantu bayidi ne kubayisha.’ (Mat. 28:19, 20) Ke bualu kayi dîba dionso tudi basue kulomba bantu bua kubalongesha Bible, katuyi tuindila anu Disambombo anyi Dia lumingu didi tshisumbu tshietu tshisungule bua kulomba bantu bua kubalongesha Bible. Malu adi alonda aa adi mua kutuambuluisha.
2. Nnganyi utudi mua kulomba bua kumulongesha Bible?
2 Tulombe bantu bua kubalongesha Bible: Patudi tulomba bantu misangu yonso bua kubalongesha Bible, netupete mushindu wa kutuadija kulongesha nansha umue. (Muam. 11:6) Ukadiku mutete bua kubalomba buludiludi anyi? Tshilejilu, bena mu tshisumbu tshikuabu tshia mu ditunga dia États-Unis bakadienzeja mu ngondo mujima bua kulomba bantu bua kubalongesha Bible. Bakapeta disanka dia bungi bualu bakatuadija kulongesha bantu 42 Bible. Kuedi meji ne: bantu baudi uyukila nabu malu a Nzambi mbamanye ne: udi musue kubalongesha Bible. Paudi upingana musangu walonda, kuenaku mua kubalomba bua kubalongesha Bible anyi? Bobu babenge, kakuena bualu to. Udi mua kutungunuka ne kuyukila nabu. Ukadiku muebeje bena mutumba nebe, balela, bena mudimu nebe nansha balongi benu ni mbasue bua ubalongeshe Bible anyi? Udi kabidi mua kukonka bantu baukadi ulongesha Bible bikalabu ne balunda anyi balela badi basue kulonga pabu Bible.
3. Ntshintu kayi tshidi mua kutuambuluisha bua kutuadija kulongesha bantu Bible? Ndîba kayi ditudi mua kuenza natshi mudimu?
3 Tshintu tshidi mua kutuambuluisha: Trakte wa Kuenaku musue kupeta mandamuna a nkonko eyi anyi? ke tshintu tshidi mua kutuambuluisha bua kutuadija kulongesha bantu Bible. Udi mua kumupesha muntu nansha yeye witaba mikanda yetu mikuabu anyi uyibenga. Tudi mua kumupesha bantu mu bisalu, patudi tuyisha mu misesu, tufundilangana mikanda anyi patudi tupinganyina bantu batutu tuyukila nabu. Tudi mua kumushiya nansha kumbelu kudi kakuyi bantu. Udi mua kuyambula paudi wangata mashinyi bua kuya muaba kampanda, paudi uya mu tshisalu nansha ku mudimu. Dibeji dia ndekelu didi diumvuija mu tshikoso mushindu ututu tulongesha bantu ne dileja mukanda wa Bible ulongesha.
4. Mmushindu kayi utudi mua kulongesha bantu Bible ne trakte wa kupeta mandamuna a nkonko?
4 Wewe mumane kupesha muntu trakte, udi mua kumuleja nkonko idi pa dibeji dia kumpala ne kumuebeja ne: “Udi musue kupeta diandamuna dia lukonko kayi?” Pashishe nubale nende diandamuna didi mu trakte ne ubale anyi umvuije mu mêyi makese malu adi panyima pa dibeji adi umvuija mushindu wa kulonga Bible. Udi mua kumuleja kabidi muaba udi malu a bungi adi atangila lukonko alu mu mukanda wa Bible ulongesha, umupeshe mukanda ne numvuangane dituku dinudi mua kulua kutungunuka ne muyuki wenu.
5. Bua tshinyi tudi ne bua kuikala tulomba bantu bua kubalongesha Bible?
5 Teritware wetu utshidi ne bantu badi basue kumanya malu adi Bible ulongesha menemene. Patudi misangu yonso tubalomba bua kubalongesha Bible, netupete mushindu wa kuambuluisha ba bungi bua balonde njila wa muoyo.—Mat. 7:13, 14.