Tudi ne tshia-mudimu tshipiatshipia bua kutuadija malonga a Bible ne bantu!

¹ Mamu mukuabu wa mu Amerike uvua muena Katolike wa dilambu. Uvua ubingisha malongesha a ekeleziya wende ne muoyo mujima. Wakenza too ne luendu kuya kuendakana ku tshimenga tshia Vatican. Nansha nanku, pakakokola Ntemu wa Yehowa mukuabu ku tshiibi tshiende, wakitaba bua kulonga Bible bu muvua Ntemu au mumulombe. Bua tshinyi? Bualu uvua ujinga kumanya malu adi mu Bible bualu Ekeleziya wabu katu yeye ulomba bantu bua kulonga nabu Bible ku nzubu to. Bualu ebu budi butulongesha tshinyi? Budi butulongesha ne: katuena mua kudianjila kumanya muntu udi pamuapa mua kuitaba bua kulonga Bible netu nansha.​—Muam. 11:6.

² Ukadiku dimue dituku muelakane bua kuambila bantu ne: tudi tukeba bua kulonga Bible ne muntu yonso udi musue bua kumulonga anyi? Muntu yonso wa muaba unudi mmumanye ne: ke tshitutu tuenza anyi? Mmunyi mutudi mua kujadika se: mbamanye tshitutu tuenza? Mpa kuenza mudimu ne tshia mudimu tshipiatshipia etshi! Tshia mudimu etshi ntrakte muimpe wa mabeji asambombo, udi ne tshiena-bualu ne: Aimeriez-vous en savoir plus sur la Bible? Mpindieu, tukonkononayi trakte eu ku ka-mutu ne ka-mutu ka bualu konso.

³ “Bua tshinyi bidi bikengela kubala Bible?” Tubingila tudi trakte ufila tudi tusankisha bantu, tubakoka dikoka dia dikema. Udi umvuija ne: Bible udi ne “malu malenga a kudi Nzambi,” adi aleja mutudi mua kumulomba diambuluisha mu disambila ne mutudi mua kupeta dipa diende dia muoyo wa kashidi. (1 Tes. 2:13) Trakte udi uleja “malelela [a mu Bible] adi afila butoke,” bu mudi tshidi tshienzeka patudi tufua ne bua tshinyi kudi makenga bungiwu nunku pa buloba. Udi umvuija “mêyi a Nzambi adi mu Bible” adi atuadila muntu mabenesha mavule padiye uatumikila ne amuvudijila disanka, ditekemena kabidi ne ngikadilu mikuabu ya mushinga. Trakte eu udi wakula kabidi bua kabingila kanene katudi ne bua kubadila Bible; milayi idi itangila matuku atshilualua idi ileja tshidi tshituindile kumpala eku.​—Buak. 21:3, 4.

⁴ “Diambuluisha bua kumvua Bible”: Trakte udi wamba ne: “Tuetu bonso tudi dijinga ne diambuluisha bua kumvua Dîyi dia Nzambi.” Pashishe udi umvuija mushindu ututu tuenza bua kulonga Bible, wamba ne: “Pa tshibidilu, mbitambe buimpe kulonga Bible ku kakese ku kakese, kubanga ne malongesha a nshindamenu.” Ku lukuabu luseke, trakte eu udi uleja ne: “Bible ke udi ne dîyi dia ndekelu dia kuamba bua kukosa tshilumbu,” udi kabidi utela broshire wa Utulomba bu tshintu tshiambuluisha mulongi “bua kumvua bimpe Mifundu minsantu pa malu kabukabu.” Ka-mutu ka bualu kadi kalonda kadi kajula lukonko ludi lutua ku muoyo.

⁵ “Udi musue bua kulamaku dîba lumingu luonso bua kulonga Bible anyi?” Trakte udi umvuija ne: nudi mua kulongolola bua dilonga dia Bible kuikaladi dienzeka pa dîba ne muaba udi mukumbanyine bua mulongi, nansha kuende anyi ku telefone. Nnganyi udi mua kulonda pende dilonga edi? Trakte udi wandamuna ne: “Dîku diebe dijima. Mulunda webe yonso uwasua bua kubikila udi pende mua kulua kulonda dilonga edi. Anyi bilondeshile tshiwasua, badi mua kulonga nebe anu wewe nkayebe.” Dilonga edi didi mua kunenga mutantshi bule kayi? Trakte udi wamba ne: “Bantu ba bungi badi balama dîba dijima ku lumingu luonso bua kulonga Bible. Biwikala mua kuenza mêba a bungi anyi anu makese patupu ku lumingu luonso, Bantemu nebadiakaje bua kukuambuluisha.” Etshi ke mamuende wa bualu! Eyowa, tudi tuitaba bua kuakaja malu bilondeshile nsombelu wa mulongi ne mulongi.

⁶ “Dilomba bua kulonga”: Ku ndekelu kua trakte kudi kazubu kashiya ka kukosa ne kuuja bua kulomba broshire wa Utulomba anyi dikumbula bua kumvuija muntu mushindu wa kulonga Bible. Tshizubu tshia broshire wa Utulomba ntshileja muaba au ne mekala atshi onso. Kuenaku umona ne: trakte eu neafikishe bantu ba muoyo muimpe ba bungi bua kuitababu bua tuetu kubambuluisha anyi? Nunku, mmunyi mutudi mua kuenza mudimu bilenga ne tshia-mudimu tshipiatshipia etshi?

⁷ Uudi mua kushila trakte eu nnganyi? Udi mua kumupesha muntu uudi usangana anyi kumushila aba badi kabayi ku nzubu. Udi mua kumufila kudi bantu paudi uyisha ku nzubu ne ku nzubu, mu njila ne miaba idi ba-ngenda-mushinga. Kumupesha bantu nansha buobu bitaba anyi babenga bua kuangata mikanda yetu. Umuele munda mua bibejibeji bietu anyi mikanda yetu mikuabu iudi upesha bantu. Udi mua kumuela mu amvelope mu mikanda yonso iudi utuminangana. Udi mua kumutumina bantu bautu uyukila nabu ku telefone. Wikale ne trakte eyi bungi bukumbane dîba dionso diudi uya bua kusumba bintu, paudi mu bise anyi mu taksi ne paudi uyisha mu mpukapuka. Umupeshe muntu yonso udi ulua kuebe. Umupeshe balela bebe, bena mutumba, bena mudimu nebe, balongi ne bantu bakuabu baudi mumanye. Enza muebe muonso bua ufile trakte eu kudi muntu yonso unuasambakena nende! Tshia kuenza pashishe ntshinyi?

⁸ Bikala muntu muitabe diakamue: Bamue bantu nebitabe diakamue bua nuenu kulonga nabu Bible. Bua nunku, dîba dionso diudi mu buambi, ikala mujadike se: udi ne broshire ibidi ya Utulomba, umue buebe ne mukuabu bua mulongi. Pikala muntu muanyishe, tuadija nende diakamue dilonga. Bulula munda mua tshizubu tshia broshire eu, ne bala ka-tshiena-bualu ka: “Mushindu wa kutumika ne broshire eu.” Pashishe uye diakamue ku dilonga dia 1 ne uleje mushindu wa kulonga. Ntshinyi tshidi mua kuikala tshipepele?

⁹ Bikala uudi uyikila nende ujinga bua kuanji kushala kuela meji: Kumpala kua matuku a bungi kupitawu, uditatshishe bua kumonangana nende kabidi. Paudi uya kumutangila, wikale ne broshire wa Utulomba mu bintu biebe. Muleja tshikebelu tshidi munda mua tshizubu. Mulekela asungule tshiena-bualu tshidi tshitamba kumusankisha. Bulula mu dibeji didi ne dilongesha didiye musungule, ne tuadijayi dilonga.

¹⁰ Pinganyina diakamue bauvua mushile bibejibeji: Biwikala uvua mushiye trakte ne bibejibeji kudi muntu, udi mua kuamba mushindu eu paudi umupinganyina: “Musangu mushale utuvua bamonangane nebe mvua ne disanka dia bungi bua kukushila tshibejibeji tshia Tshibumba tshia Nsentedi. Pamu’apa uvua mumone ne: mutu wa bualu mujima wa tshibejibeji etshi udi ne: Tshibumba tshia Nsentedi tshidi tshimanyisha Bukalenge bua Yehowa. Bua lelu, ndi musue kukumvuija tshidi Bukalenge ebu ne mushinga udibu mua kuikala nawu kuudi ne kudi dîku diebe.” Pashishe ubulule broshire wa Utulomba mu dilongesha 6. Banga ne tshikoso tshia kumpala, balayi ne nuyukile bilondeshile dîba didi nadi muntu unudi nuyikila nende. Kunyima numvuangane nende bua kulua kumumona dituku dikuabu bua kujikija dilongesha adi.

¹¹ Kujikiji trakte yonso, ikala nayi diba dionso bungi bukumbane: Mutangidi wa mudimu ne bana betu badi ne mudimu wa kutangila mikanda nebalame bungi bukumbane bua trakte wa: Aimeriez-vous en savoir plus sur la Bible? mu tshisumbu dîba dionso. Ulame ndambu mu kabuta kebe ka ku bianza, mu mashinyi ebe, ku muaba webe wa mudimu, mu kalasa, ku mushiku wa lupangu luudi, mmumue ne: kuikala nende muaba wonso udiku mua kumueneka mushindu wa kumupesha bantu bakuabu. Bushuwa, ikala ne ndambu mu tshibuta tshiebe tshia buambi bua dîba dionso diudi usambakena ne muntu uudi mua kuyukila nende pa Bible wewe kumupesha trakte eu.

¹² Yehowa abeneshe mudimu mukole utudi tuenza: Tshipatshila tshia bena Kristo bonso ntshia kulongesha muntu mukuabu bulelela. (Mat. 28:19, 20) Utu ulombola dilonga dia Bible pa tshibidilu anyi? Bikalabi nanku, udiku mua kupeta dîba bua kusakidila dikuabu mu programe webe wa ku lumingu ku lumingu anyi? Biwikala kuyi ulombola dilonga nansha dimue, kadi pabi tshidibi se udi ujinga bua kulombola nansha dimue. Nanku lomba Yehowa bua abeneshe mudimu mukole uudi wenza bua kupeta pebe muntu uudi mua kulonga nende. Pashishe udienzeje bua kuenza malu bilondeshile disambila diebe.​—1 Yone 5:14, 15.

¹³ Tudi ne tshia mudimu tshipiatshipia tshia kutuadija natshi malonga a Bible ne bantu! Ibidilangane natshi. Tshiabanyina bantu bonso tshianana kuyi ubafutshisha kantu. Nunku tuetu bonso ‘tuenze malu mimpe, tuikale babanji mu midimu mimpe, tupeshangane bintu ne tuikale badilongolole bua kuabanyangana ne bakuabo’ bitudi balonge pa bidi bitangila Dîyi dia Nzambi.​—1 Tim. 6:18.

[Kazubu mu dibeji 8]

MIABA ITUDI MUA KUFIDILA TRAKTE

▪ Kudi bantu batutu tuyukila nabu matuku onso

▪ Padi muntu witaba bua kuangata mukanda wetu

▪ Padi bantu kabayi ku nzubu

▪ Patudi tupinganyina bantu

▪ Patudi tupetangana ne muntu mu njila mutudi tuyisha

▪ Patudi tuyisha miaba idi ba-ngenda-mushinga

▪ Patudi tuyisha mu mpukapuka

▪ Patudi tufundila bantu mikanda

▪ Patudi mu bise anyi mu taksi

▪ Padi muntu ulua kututangila ku nzubu

▪ Patudi tuyukila ne balela betu, bena mutumba, bena mudimu netu, balongi netu ne bamanyangana nabu bakuabu