Mpungilu wa Distrike wa Bantemu ba Yehowa wa 2009
1. a) Tuetu babuele mu mpungilu wa distrike matuku onso asatu, mmalu mimpe kayi atuapeta? b) Tuenza tshinyi kubangila ku mpindieu?
1 Tuetu buonso tudi bindila ne muoyo kulu kulu Mpungilu wa Distrike wa 2009, bua tuetu kutuilangana kabidi ne bena Kristo netu bakuabu ‘badi bapele mu mitshima yabu’ bua kutumbisha Yehowa pamue. (Mat. 5:3) Bu mudi dituku dia Yehowa dienda disemene ne lubilu, tudi tulomba muntu yonso bua kubuela mu mpungilu matuku onso asatu bua kukoleshibua kudi bena Kristo netu bakuabu kabidi ne ku malongesha adi atukolesha bua kushala bimane mu ditabuja. (Sef. 1:14) Nuambila balongeshi benu ne bamfumu ba ku midimu ne: mpungilu eu ngumue mushindu munene utudi tutendelela Nzambi wetu. Tuadija kulongolola malu kumpala kua dîba ne muoyo mujime ne lomba Yehowa bua akubeneshe ne yeye muine neakuambuluishe.—Yesh. 50:10.
2. Bikala mpungilu utuabuela kayi wa bantu bafume mu matunga a bungi, ntshinyi tshiamuvuije bu wa bantu bafume mu matunga a bungi?
2 Mpungilu ya bantu bafume mu matunga a bungi: Bu mudi mpungilu eyi milongolola anu mu matunga makese ne bimenga kabidi, anu bantu badibu babikile ke badi ne bua kubuelamu. Tuetu mua kulonda bualu ebu, nebiambuluishe bua kakuikadi bantu bapitepite bungi bunguile to. (1 Kol. 14:40; Eb. 13:17) Nansha nanku, nekuikale mpungilu ya distrike ya bungi kabidi ikala mienza bu ya bantu bafume mu matunga a bungi, bualu bamisionere, bena ku Betele badi benzela mudimu mu matunga makuabu ne basadidi badi benda mu matunga mashilangane nebabuele mu mpungilu udi yenzekela mu matunga abu a tshilelelu.
3. Mmushindu kayi utudi mua kuleja ne: tudi banange bamue bena mu tshisumbu tshietu?
3 Tuambuluishe bakuabu bua babuelamu: Kudiku bantu mu tshisumbu tshienu badi dijinga ne diambuluisha bua kubuelabu mu mpungilu anyi? Paudi ubambuluisha bua kubuela mu mpungilu, kuena ‘utangila malu ebe nkayawu, kadi kabidi malu a bakuabu.’—Filip. 2:4.
4-6. a) Mmalu kayi a mushinga atudi ne bua kulama mu mutu patudi dijinga ne muaba wa kulala? Bua tshinyi? b) Bidi bikengela kuenza malu kayi bikale bana betu ba balume ne ba bakaji mua kusombela ku Nzubu wa Bukalenge? c) Ngamue malu kayi atudi ne bua kuenza patudi tukeba kuya mu Mpungilu wa Distrike? (Bala malu adi kazubu kadi mu dibeji 4.)
4 Miaba ya kulala: Pa tshibidilu tutu tupeta miaba ya kulala mu tshimenga tshidi mpungilu wenzekela ku mbanza ya bana betu, ku nzubu wa Bukalenge anyi ku mbanza ya balela betu. Mêna a miaba yenzekela mpungilu nebaalamike ku dibaya dia mamanyisha panyima pa dikonkonona dia malu adi mu tshisakidila etshi. Mbia mushinga bua tuetu buonso kuela meji ne muoyo mujima bua kumona muaba utuikale mua kubuelela mu mpungilu mu tshidimu tshia 2009.
5 Wewe dijinga ne muaba wa kulala kua muanetu kampanda anyi ku Nzubu wa Bukalenge, tudi tulomba bua sekretere wa tshisumbu tshienu afunde mêna a bamanyishi bonso badi bakeba miaba ya kulala ya nunku kumpala kua dîba ne kuatuma kudi badi batangila tshibambalu tshia diakidilangana mu tshimenga atshi. Sekretere neafunde malu aa pa liste au: dîna dia muntu, mulume anyi mukaji (Mul anyi Muk), bidimu bia muntu, ne malanda a mu dîku adi nawu mumanyishi ne bakuabu. Malu au neambuluishe bena mu tshibambalu tshia diakidilangana bua kupetela muntu yonso muaba udiye mua kulala. Bakulu bena mu kasumbu ka mudimu badi ne bua kukonkonona ngikadilu ya mumanyishi yonso kumpala kua kumulombela muaba wa kulala kudi bena tshibambalu tshia diakidilangana etshi. Bobu bamane kutupesha muaba wa kulala, ki mbimpe tuetu kumvuangana petu ne muena Kristo netu mukuabu anyi mulunda wetu pa nkayetu bua kusomba nende to. Wewe muenze nanku, neutatshishe bana betu badi mu tshibambalu tshia diakidilangana bikole. Kadi, muntu yeye musue kusombela kua muanabu udi kayi Ntemu matuku onso ikala mpungilu ne bua kuenzeka, kena ne bua kulomba sekretere bua amufunde ku liste wa bantu badi dijinga ne muaba wa kulala to.
6 Kudi mikenji itudi ne bua kutumikila padibi bikengela kusombela ku Nzubu ya Bukalenge. Komite wa mpungilu wa distrike neateke mukulu bua kutangila muaba eu. Nebamupeshe muntu udi mua kumuambuluisha, ikale nangananga mukulu anyi musadidi wa mudimu udi mukumbane. Nebakosolole Nzubu wa Bukalenge mu bitupa bibidi, tshitupa tshimue bua bana betu ba bakaji ne bana babu ne bansongakaji ne tshitupa tshikuabu bua bana betu ba balume ne bantu balume bakuabu bonso. Nzubu wa Bukalenge neyikale anu bua kulala patupu. Mu munya, padi bantu bonso baya mu mpungilu, nukebe bana betu bikala balama ku Nzubu wa Bukalenge bashintulukangana bua kabalu kuiba bintu bia bantu bidimu to. Nutangile bualu ebu bimpe, anu bana betu badi batshina Nzambi ne muoyo mujima ke banudi mua kuteka bua kulamaku. Dilambila munda mua Nzubu wa Bukalenge kadienaku to. Badi mua kuasa kazubu ka kulua kupula pashishe kadi bana betu mua kulambilamu anu tshikondo tshia mpungilu. Padi mpungilu ujika, badi ne bua kupula kazubu aku. Mbia mushinga bua kulama mu Nzubu wa Bukalenge ne mu lupangu ne mankenda, mulongolola bimpe. Bidi bikengela kuikala ne budimu bua kubenga kunyanga tshintu nansha tshimue. Bana betu basombele ku Nzubu wa Bukalenge benze muabu muonso bua kuenzelangana malu bu bena Kristo balelela munkatshi muabu ne kudi bena mutumba kabidi.—1 Kol. 10:31.
7. Tutambe kuditatshisha bua malu kayi patudi tudilongolola bua kubuela mu Mpungilu wa Distrike wa 2009?
7 Midimu idi itumbisha Nzambi: Tuleje mamuma a nyuma mu malu onso atudi tuenza, tutambe kukontolola ngakuilu wetu ne bikadilu bietu patudi tuyikila ne bantu bakuabu mu tshimenga tshidi mpungilu wenzekela, tuetu benze nanku tudi tupesha kabidi bantu ba Yehowa lumu ne katuakulenduisha bakuabu to. (1 Kol. 10:31; 2 Kol. 6:3, 4) Dibuela diebe mu Mpungilu wa Distrike wa 2009 ne bikadilu biebe bitumbishisha Nzambi.—1 Pet. 2:12.
[Kazubu mu dibeji 3]
Programe Dîba:
Dinayi (Anu bua mpungilu wa bantu bafume mu matunga a bungi)
1:20 mu dinda - 4:55 mapingaja
Ditanu ne Disambombo
9:20 mu dinda - 4:55 mapingaja
Dia lumingu
9:20 mu dinda - 4:00 mapingaja
[Kazubu mu dibeji 4]
Amue malu a kukonkonona bua kubuela mu Mpungilu wa Distrike:
1. Biwikala ne bua kuenza luendu lule bua kubuela mu mpungilu, tuadija kulama mfranga ya kufuta njila ne ya biakudia buebe wewe ne bia bena mu dîku diebe bonso.
2. Kupu muoyo bua kuya ne mapa ebe a budisuile bua kukuatshisha nawu midimu ya mpungilu. Bible udi wamba ne: ‘Muntu kamueneki ku mêsu kua Yehowa bianza bitupu’ kadi ‘atumbishe Yehowa ne biuma biende.’—Dut. 16:16; Nsu. 3:9.
3. Mu mpungilu, tudi tutumbisha dîna dia Yehowa ku bienzedi bietu bimpe ne ku mankenda ne mvuadilu wetu muimpe.—1 Kol. 10:31.
4. Wikale mudilongolole bua kueleshangana diboko ne bakididianganyi ne bana betu bakuabu badi ne bujitu bua kulama bulongame. Kukuatshidi bakuabu bantu miaba ya kusomba to, anu bena mu dîku dienu anyi bantu banudi bende nabu.
5. Bua wewe kuteleja bimpe tshitupa tshia mu mapingaja, udie bintu bipepele bikese panudi mu dikisha. Biakudia bia bungi anyi bidi mua kukukutshisha bikole bidi mua kukuladika tulu.—Luka 8:18.
6. Mankenda adi atumbisha Yehowa. Ku ndekelu kua tshitupa tshionso tshia mpungilu, muntu yonso udi mua kuangulaku mabeji ne bintu bikuabu bua kubiela muaba udi mulongolola bua kubimansha bua kushiya muaba wa mpungilu ne mankenda.—1 Pet. 1:15, 16.