“Nuenze malu onso bua bualu bua lumu luimpe”
1. Ntshinyi tshidi bayishi ba Bukalenge basue kuenzela bakuabu? Mbua tshinyi?
1 Mupostolo Paulo uvua udiumvua ne dibanza dia kuambila bakuabu lumu luimpe. (1 Kol. 9:16, 19, 23) Bia muomumue, diditatshisha dietu bua diakalenga dia tshiendelele dia bantu netu didi ditusaka bua kudisunsula ne muoyo mujima bua kubambila lumu luimpe.
2. Patudi tuyisha, ntshinyi tshitudi ne bua kushintulula? Mbua tshinyi?
2 Yisha miaba iwapeta bantu, ne dîba diudi mua kubapeta: Mulobi muimpe katu wela ndobo anyi makondo ende anu muaba udi umusankisha ne dîba didiye yeye musue to, kadi utu ubiela miaba itu mishipa idîla ne dîba didiye mua kuyipeta. Tuetu petu, anu bu balobi anyi “bilembi bia bantu,” tudi pamuapa ne bua kushintululaku programe wetu bua kupeta bantu mu teritware wetu ne kupeta diakalenga dia pa buadi dia kukunguija ‘mishipa ya mishindu yonso.’ (Mat. 4:19; 13:47) Katuenaku mua kutangila bantu ku nzubu yabu mêba a dilolo peshi kuyisha mu njila ne mu misesu mêba a mu dindadinda anyi? Tshipatshila tshia Paulo tshivua tshia “kumanyisha bantu lumu luimpe” kulumanyishilamu; ke pakababidilaye mpunga yonso uvua umueneka bua kukumbaja bualu ebu.—Bien. 17:17; 20:20, 24.
3, 4. Patudi mu buambi, mmunyi mutudi mua kuakaja nyishilu wetu? Netupatule bipeta kayi?
3 Nyishilu webe umvuangane ne bidi bantu bajinga: Balobi ba mishipa batu ne tshibidilu tshia kushintulula mishindu yabu ya diloba bua kumona mua kukuata mishipa kampanda anyi kansanga. Mmunyi mutudi mua kuyisha lumu luimpe lua Bukalenge mu mushindu udi usankisha bantu mu teritware wetu? Tudi ne bua kutela bualu kampanda budi mu ngenyi ya bantu ba bungi ne bukalanga buonso, pashishe kuteleja ne lubatshi tshidibu bamba pa bualu abu. (Yak. 1:19) Tudi kabidi mua kubelelabu lukonko bua kumanya adibu nawu munda bua bafike ku diyikila netu. (Nsu. 20:5) Dîba adi netukokeshe mua kushintulula nyishilu wetu wa lumu luimpe mu mushindu walenga nsombelu wa yonso wa kudibu. Paulo wakalua ‘kudi bonso muena malu onso.’ (1 Kol. 9:22) Nanku bua kulenga mioyo ya bantu, tudi ne bua kuakaja nyishilu wetu bua umvuangane ne majinga a bantu.
4 Ndisankapu bunene kayi nunku dia kuambila bantu “lumu lua diakalengele”! (Yesh. 52:7) Tuenzayi bonso ‘malu onso bua bualu bua lumu luimpe’ bua tumone mua kuyisha bantu ba bungi!—1 Kol. 9:23.