Longesha bantu badi ne lutatu lua kubala
1. Ndutatu kayi lutudi mua kupeta mu buambi?
1 Patutu tuya mu mudimu wetu wa buambi, tutu imue misangu tupeta lutatu lua kulongesha bantu badi ne lutatu lua kubala. Ntshinyi tshitudi mua kuenza?
2. Mmushindu kayi utudi tunemeka bantu badi ne lutatu lua kubala, ne mbua tshinyi?
2 Tubanemeke: Ku mêsu kua Yehowa, tulasa tudi muntu mulonge ki ntudi ne mushinga to, kadi ntshidi muoyo wa muntu au menemene. (1 Sam. 16:7; Nsu. 21:2) Ke bualu kayi, katuikadi ne tshilele tshia kupepeja bantu badi kabayi bamanye kubala bimpe to. Tuetu tubanemeka, tubenzela malu ne lutulu, badi mua kuitaba bua tubambuluishe. (1 Pet. 3:15) Ebi bidi bisua kuleja ne: katuikadi tusumisha muntu anu bua kubalaye mvese peshi tshikoso to. Padi muntu wenda uya kumpala mu dilonga malu a mu Bible, udi mua kupeta dijinga dikole dia kumanya mua kubala bimpe nkayende bua kupetaye pende disanka dia kubala Dîyi dia Nzambi ne dîyi dia panshipanshi ‘munya ne butuku.’—Mus. 1:2, 3.
3. Mmishindu kayi ya dilongesha itudi mua kuambuluisha nayi bantu badi ne lutatu lua kubala?
3 Mishindu ya kulongesha bantu Bible: Kulongesha ne bimfuanyi mmushindu muimpe wa kuambuluisha muntu bua yeye kukuata bidiye ulonga ne kubivuluka. Udi mua kukonka mulongi tshidi meji ende bua tshimfuanyi tshidi mu mukanda unudi nulonga. Pashishe umuele nkonko mitoke bua kumuambuluisha bua kumvuaye tshidi tshimfuanyi atshi tshilongesha. Bala mvese idi ne dilongesha kampanda diudi musue kuimanyina didi mu tshimfuanyi. Udi kabidi mua kukuata mudimu ne bimfuanyi bua kuambulula ngenyi minene ya biudi mulongeshe. Kulongeshi malu a bungi musangu umue to. Umvuija tshiena-bualu ne malu manene a mu dilonga, kubueji ngenyi mikuabu idi kayiyi ipetangana ne tshiena-bualu to. Bulula Bible bua kubala mvese, wele mulongi nkonko yakujadikila ne: mmumvue mvese au. Ebi nebikoleshe dijinga diende dia kumanya kubala bua yeye kudimanyina malu makuabu a mu Bible bimpe.
4. Mmunyi mutudi mua kuambuluisha mulongi wetu bua kulengeja mbadilu wende?
4 Diambuluisha bua kumanya kubala: Bantu badi kabayi bamanye kubala anyi bavua kabayi ne mushindu wa kulonga bua kubala bimpe badi mua kumvua ne kukuata malu bimpe bitambe. Udi mua kubakankamija bua kuteleja dibala dia mikanda yetu ku tshisanji. Yeye uteleja mubadi bimpe eku wenda ulondesha mu mukanda wende, nansha mene wambulula miaku ayi ne dîyi dia panshipanshi, nebimuambuluishe bua kumanya mua kubala. Broshire wa Difila ku dibala ne difunda udi kabidi mua kumuambuluisha. Bakulu badi kabidi mua kulongolola mu tshisumbu tulasa tua kulongesha bantu mua kubala ne kufunda. Ngenyi milenga eyi idi mua kutukuatshisha bua kuambuluisha badi ne lutatu lua kubala bua bumvue “Mukanda wa Nzambi” udi mumanye mua kubavuija bena meji too ne ku lupandu.—2 Tim. 3:15.