Ukadi mudilongolole bua didia dinene dia mu nyuma anyi?

1. Mmidimu kayi itu yenzeka pa tshibidilu bua kulongolola tshibilu kampanda?

¹ Bitu bikengela kudilongolola bimpe bua kuenza tshibilu tshinene. Bitu bikengela kukeba biakudia, kubipika bimpe ne kubitekela bantu ku mesa bua kudia. Kuabanyina bantu biakudia kudi kulomba paku kudilongolola bimpe. Mbimpe kulongolola kabidi muaba wadila bantu. Bantu badibu bakidila badi pabu ne bua kudilongolola bimpe, nangananga pikalabu bafuma ntanta mule. Nansha mudibi bilomba mudimu wa bungi, kudia biakudia bimpe pamue ne balunda ne bena mu dîku kudi ne mushinga wa bungi. Mu matuku makese emu, Bantemu ba Yehowa pa buloba bujima nebadisangishe mu bisumbu binene ne bikese mu tshibilu tshia mu nyuma tshivuabu bindilandile tshia Mpungilu wa distrike udi ne tshiena-bualu ne: “Nuikale batabale.” Mudimu wa bungi udi munkatshi mua dienzeka bua kulongolola programe wa tshibilu etshi. Tuetu bonso tudi babikidibuemu. Bua tuetu kubuelamu ne kuteleja bimpe, tudi petu ne bua kudilongolola.​—Nsu. 21:5.

2. Tshidi tshikengela bua tuetu kubuela mu matuku onso asatu a mpungilu ntshinyi?

² Mua kupeta malu a bungi mu tshibilu: Ukadiku mudilongolole bua kubuela mu matuku onso asatu a mpungilu eu anyi? Pikalaku mushindu, dianjila kuyukila ne mfumuebe wa mudimu muwikala ne bua kubuelamu matuku onso, kubangila ku dia kumpala too ne dia ndekelu. Ukadi mudilongolole bua makuta a kufuta njila ne muaba wa dilala anyi? Bakulu batabalele bakulakaje, balema ne bantu bakuabu badi ne ntatu mikole bua kumanya ni badi dijinga ne bintu kampanda.​—Yel. 23:4; Gal. 6:10.

3. Bua tshinyi katuena ne bua kubuela mu mpungilu wa bantu bafume mu matunga a bungi udibu kabayi batubikile?

³ Mu matunga makuabu nemuenzeke mpungilu ya bantu bafume mu matunga a bungi. Umanye ne: bisumbu kampanda ne benyi badi bafume mu matunga makuabu ke badi babikidibue mu mpungilu eyi. Komite wa filiale mmulongolole nunku bualu ukadi mumanye bungi bua bantu budi bukengedibua bilondeshile bungi bua miaba ya kusomba ne ya kulala idiku. Bamanyishi ba lumu luimpe bobu baye kubuela mu mpungilu wa bantu bafume mu matunga a bungi uvuabu kabayi bababikile, nekuikale bantu bapite bungi mu mpungilu au.

4. Mmalu kayi atuambuluisha bua kutuadija programe wa dituku dionso bimpe?

⁴ Udilongolole bua kuikala ufika mu mpungilu kumpala kua dîba dituku dionso bua kupeta muaba wa kusomba kumpala kua ndongamu kutuadijaye. Kumpala kua mpungilu kutuadijaye, ubalaku biena-bualu bia dituku adi bidi mu programe webe ne ubielele meji. Wewe wenza nanku, nebikuambuluishe bua kulongolola muoyo webe bua malu ikalabu ne bua kuamba. (Eze. 7:10) Padi mulombodi utuambila ne: mijiki ikadi pa kutuadija, uyiteleje bimpe ne wimbe pebe musambu wa ntuadijilu, uteleje kabidi ne disambila.

5. Bena mu dîku dietu badi ne bua kuenza tshinyi bua kumvuabu ndongamu bimpe?

⁵ Bikala bena mu dîku basombe pamue mu mpungilu, baledi nebapete mushindu wa kutabalela bana babu bua bikale bateleja bimpe. (Dut. 31:12) Badi ne bua kuikala babala pabu mvese idibu bafila mu Bible yabu. Bua kuteleja bimpe menemene bidi bikengela kufunda malu a mushinga. Pashishe, malu awafunda neakuambuluishe bua kuvuluka malu manene a mu miyuki. Kuikadi uyukila malu adi kaayi ne mushinga anyi upatuka ubuela to. Wewe ne kamu ka telefone, kukashiyi buashi bua kunyanga ntema yebe ne ya bakuabu to. Padi dituku dionso dia mpungilu dijika, bua tshinyi kubenga kuyukila ne bantu bakuabu malu malenga audi mupete?

6. Mbualu kayi bua mushinga bututu tupeta mu mpungilu yetu? Ntshinyi tshitudi mua kuenza bua bualu abu kutuambuluisha?

⁶ Mu mpungilu wa distrike tutu tupeta mushindu wa kusomba ne bana betu ba balume ne ba bakaji bimpe mu mushindu udi bena panu kabayi mua kusomba. (Mus. 133:1-3; Mâko 10:29, 30) Kuenaku mua kudienzeja bua kumanyangana ne bantu banuikale basombe nabu pabuipi mu tshikondo tshia dikisha anyi? Bua wewe kukumbaja bualu ebu, mbimpe ulue ne biakudia biwadila muaba wa mpungilu mu dikisha pamutu pa kusumba bidibu bapanyisha pambelu. Kudipangishi mushindu wa kukoleshangana mu ditabuja ne bana betu to.​—Lomo 1:11, 12.

7. Ntshinyi tshitudi ne bua kuenza bua bilamba bituavuala?

⁷ Mvuadilu: Tuvulukayi ne: Yehowa wakambila bena Isalele bua kutelela malenda ku bilamba biabu mikale ne muonji wa ble ku bizemba. (Nom. 15:37-41) Pavuabu bamona bualu ebu, bavua bavuluka ne: bavua tshisamba tshivua Yehowa muteke ku luseke bua kumutendelela. Lelu mvuadilu wetu muimpe ututu tuvuala mu mpungilu utu ututapulula ne bena panu. Mvuadilu wa nunku udi ufila bumanyishi kudi bantu badi batumona patudi tuya kudia ku restoran anyi panyima pa mpungilu. Nunku mbimpe tuatabalela bikole menemene mushindu wikala bilamba bituavuala.

8. Mmushindu kayi utudi mua kuyisha mu tshimenga tshidi mpungilu wenzekela?

⁸ Yisha: Tuetu bikale badilongolole bimpe tudi mua kuyisha bantu batudi tupeta mu tshimenga tshidi mpungilu wenzekela. Muanetu mukuabu uvua muye kudia ne mukajende mu restoran dilolo panyima pa mpungilu, wakaleja muena mudimu uvuamu kamanyinu kavua pa tshiadi, e kumukonka ne: “Ukadiku mumone bantu ba bungi bikale ne kamanyinu aka anyi?” Wakamuandamuna muvuaye mutumone e kuambaye muvuaye udikonka bua tshinyi bantu bonso bavua anu ne tua mushindu umue. Kutuadijabu kuyikila, muanetu au kumubikila bua kuluaye mu mpungilu.

9. Mmunshindu kayi utudi mua kuleja dianyisha bua bidi Yehowa mutulongoluele?

⁹ Nansha muikala bana betu mua kuenza miyuki, kuandamuna nkonko yabelabu ne kuenza manaya a bilejilu, Yehowa nkayende ngudi mutulongoluele biakudia ebi bilenga bidiye utupesha ku tshidimu tshionso. (Yesh. 65:13, 14) Netuleje mutudi ne dianyisha bua bidi Yehowa mulongolole bua kutudisha mu ditabuja ebi patuikala babuele mu mpungilu matuku onso asatu, katuyi tupitshisha kantu nansha kamue ka kudibi. Ukadi mudilongolole mu malu onso aa anyi?

[Kazubu mu dibeji 6]

Malu a kuvuluka bua mpungilu wa distrike

▪ Dîba: Matuku onso asatu mpungilu neatuadije mu dinda pa dîba dia 9:20. Bantu nebatuadije kubuela muaba wa mpungilu mu dinda pa dîba dia 8:00. Patuadija mijiki ya mbangilu, muntu yonso wa kutudi udi ne bua kusomba pa muaba wende bua mpungilu atuadije bimpe. Mu Ditanu ne mu Disambombo mpungilu neajike pa dîba dia 4:55 wa dilolo, ne mu Dia lumingu pa dîba dia 4:00 wa dilolo. Mpungilu wa bantu bafume mu matunga a bungi neatuadije mu dinayi pa dîba 1:20 wa dilolo, neajike pa dîba 4:55 wa dilolo.

▪ Dikuatshila dia miaba: Muntu udi mua kulamina bantu badiye muende nabu anyi bena mu dîku diabu miaba ya disomba.

▪ Biakudia bia mu dikisha: Tudi basue bua bana betu balue ne biakudia bia midioku bidi bidisha mubidi bu mudi: mampa, mikata, bimuma (bibote), tumbele, bitumbula anyi kato. Bintu bu mudi mâyi, kafe anyi tshiayi, nudi mua kulua nabi biela mu bintu bidi kabiyi mua kutayika to, bionso ebi mbua kuepuka njiwu. Mbakandike bua kulua ne maluvu adi akuatangana mu mpungilu. Mbimpe kulua ne biakudia ne bia kunua bietu tuetu bua katuyi kubisumba kudi bangenda muaba wa mpungilu to. Kabidi, patudi tubapangisha bua kubuela muaba udi mpungilu wenzekela, tudi tupeta mushindu wa kuleja bantu mutudi bakalanga. (Numanye ne: bapanyishi ba bintu kabena ne bua kubuela ne bintu biabu muaba udi mpungilu wenzekela nansha kakese.​—Yone 2:13-17.)

▪ Makuta: Tudi mua kuleja dianyisha bua mpungilu mitulongoluela patudi tufilaku ku budisuile kakese katudi naku ku Nzubu wa Bukalenge anyi mu mpungilu bua kutungunuja mudimu wetu wa pa buloba bujima.

▪ Njiwu ne masama a tshimpitshimpi: Bena mu tshibambalu tshia diambuluisha babedi badi badilakana bua mutu bana betu bababikila too ne bua tumalu tukese. Pikala disama dia tshimpitshimpi dikuate muntu mu mpungilu, nudi mua kuleja muanetu umue wa ku bakididianganyi udi pabuipi bua aye diakamue kumanyisha bena tshibambalu tshia diondopangana, nunku bobu nebatangile bukole bua disama bua bobu kumuambuluisha.

▪ Dikuata mêyi ne bindidimbi: Katuena mua kuasa tshiamu nansha tshimue ku nshinga ya nzembu ya biamu bidibu benza nabi mudimu muaba wa mpungilu nansha. Nuenze mudimu ne bintu ebi mu mushindu wa kubenga kushiya bakuabu mu ditanaji.

▪ Dikuata foto: Paudi ukuata foto dîba ditudi munkatshi mua mpungilu, kutemeshi midilu anyi flashe to. Kubikidi bakuatshi ba foto ba pambelu bua balue kukukuata foto mu mpungilu to. Wewe mubamone benda bakuata foto mu mpungilu, kudikuatshishi foto kudibu nansha.​—Yone 2:13-17.

▪ Telefone ya ku bianza: Wenze muebe muonso bua kamu kebe kakapangishi bakuabu bantu bua kuteleja to.

▪ Mankenda: Bidi bimueneka ne: bana betu batu baya kusumba biakudia kudi bapanyishi ba bintu ke batu bimansha mabeji, tubudimbu, tutotola (tutolutolu) ne bintu bikuabu bia buena ebi panshi. Muntu yeye musumbe biakudia kudi basumbishi ba bintu (bu mudi mbombon, bisukuita, tuto, makopo a misanyi anyi bintu bikuabu), yeye ke udi ne bua kuela bizubu bia bintu ebi anyi dibeji didi dibikutshile mu tshipanza tshidibu babilongoluele pamutu pa kubimansha panshi. Kadi tuetu bamone bintu bu mudi tubudimbu anyi mabeji panshi, tubiangule tubiele mu tshintu tshia kuela bintu bia butshiafu. Bana betu, tuenzayiku muetu muonso bua kulama muaba utudi tuenzela mpungilu ne kumpenga kuonso ne mankenda. Muntu yonso wa kutudi udi ne bua kulama muaba utudi tuenzela mpungilu ne mankenda. Muntu yonso yeye uditatshisha bua bualu ebu, ku dilolo dionso muaba wa mpungilu neushale amu ne mankenda. Tudi basue kuleja ngikadilu ya Nzambi wetu wa tshijila utudi tutendelela.​—1 Pet. 1:15, 16; Ekes. 19:10; Dut. 23:14.

▪ Miaba itudi batudile: 1) Kanusombi anyi kanuladi bantu ba bungi mu nzubu padi muntu udi munuakidile kayi muanyishe to. 2) Wewe mumone ne: kuakuya muaba uuvua mulombe bua kutudila, manyisha kumpala kua dîba. 3) Kumpala kua wewe kulamba, lomba dianyisha kudi muena nzubu anyi kudi bana betu badi batangila malu a miaba ya kulala ku Nzubu wa Bukalenge bua bakuleje tshia kuenza. 4) Kunyangakaji bintu bidibu banutekele bonso ne benyi nebe to. Enza malu ne nkatshinkatshi. 5) Batendeledi ba Nzambi bonso badi ne bua kuikala ne mankenda. Ikala ushiya muaba uuvua mulale ne mankenda, kabidi mulongolola bimpe dituku dionso. Bikalabu balongolole bua bana betu badi bafume kule kutudilabu ku Nzubu wa Bukalenge, badi ne bua kumulama ne mankenda. 6) Nuleje muanetu udi munuakidile anyi bana betu bakuabu banudi nabu muaba umue ngikadilu mimpe ya nyuma wa Nzambi.​—Gal. 5:22, 23.