Mamanyisha

▪ Mikanda ya kufila mu Tshisanga ne Lumungulu: Tshibumba tshia Nsentedi ne Réveillez-vous! Panudi nupinganyina bantu bavua banyishe bibejibeji, nansha bavua babuele mu Tshivulukilu anyi mu mpuilu ne mpungilu kampanda, kadi kabayi batamba kubuela mu bisangilu bia tshisumbu, nutambe kudifila bua kubapesha mukanda wa Bible utu ulongesha tshinyi menemene? Nudienzeje bua kutuadija kulongeshaku muntu nansha umue Bible ne mukanda au. Kabalashipu: Bible utu ulongesha tshinyi menemene? Muntu yeye mumane kupeta mukanda eu, bamanyishi badi mua kumushila mukanda mukuabu wonso wa mabeji 192 udi ne mabeji akadi akunzubila anyi mukanda wonso uvuabu bapatule kumpala kua 1992.

▪ Netuenze muetu muonso bua kuabanya tubeji tua kubikila natu bantu mu mpungilu wa distrike wa 2009 ne wa bantu bafume mu matunga a bungi. Bamanyishi nebabanye tubeji etu tua pa buatu mu teritware yabu. Mudimu wa diabanya eu neutuadije mbingu isatu kumpala kua mpungilu wabuela tshisumbu tshienu kuenzekaye.

▪ Bamanyishi buonso nebapetele tumanyinu tua kuasa pa tshiadi mu tshisumbu tshiabu. Bana betu babuela mu mpungilu ya bantu bafume mu matunga a bungi nebikale pabu ne tumanyinu tua mushindu umue eu.