Muudi mua kuvudija mudimu webe
1. Ndijinga dikole kayi didiku mu mudimu wa buambi ne mbua tshinyi?
1 Pavua Yezu mumone bungi bua bantu bavua bitaba lumu luimpe lua Bukalenge, wakambila bayidi bende bua ‘balombe Mukalenge wa bintu bia kunowa, atume bena mudimu mu kunowa kuende.’ (Mat. 9:37, 38) Bu mutudi mu minite ya ndekelu ya mudimu wa dinowa, tudi ne bua kuenza mudimu eu ne mitalu kupita kumpala. Tuambe ne: tudi ne bua kuelangana meji a mutudi mua kuenza mudimu eu ne muoyo mujima ne kulomba diambuluisha kudi Yehowa.—Yone 14:13, 14.
2. Mmunyi mudi bamue bitabe ku dibikila dia banowi ba bungi mu mudimu?
2 Mua kuvudija mudimu webe: Yehowa mmuambuluishe bantu ba bungi badi balonda mibelu yende bua kutuadija mudimu wa bumpanda-njila. (Mus. 26:2, 3; Filip. 4:6) Bamue mbadienzeje bikole bua kuangata mudimu wa bumpanda-njila buambuluishi bua ngondo umue anyi ya bungi ku tshidimu. Eu mmushindu muimpe wa kuvudija mudimu wabu. Ba bungi mbalue mbampanda-njila ba kashidi pavuabu bamone masanka avuabu bapete mu bumpanda-njila buambuluishi.—Bien. 20:35.
3. Biwikala uvua mpanda-njila kumpala, ntshinyi tshiudi mua kuelela meji?
3 Udiku mua kulua kabidi mpanda-njila anyi?: Biwikala ukavua muenze mudimu wa bumpanda-njila, pamuapa utshidi uvuluka malu mimpe auvua mupete tshikondo atshi. Ukadiku muelangane meji ne muenze disambila bua kuenzulula kabidi mudimu eu anyi? Pamuapa malu avua makupangishe bua kutungunuka ne mudimu eu kaatshienaku kabidi to. Dîba didi mua kuikala dimane kukumbana bua wewe kuenzulula mudimu eu wa pa buawu.—1 Yone 5:14, 15.
4. Mmuabi kayi utudi nawu tuetu buonso lelu eu?
4 Mudimu wa kunowa udi munkatshi mua dienzeka ne ukadi pa kujika. (Yone 4:35, 36) Nanku, yonso wa kutudi udi mua kukonkonona nsombelu wende bua kumona ni udi mua kuakaja malu ende bua kuvudija mudimu wende. Kadi tuetu bamone bushuwa ne: katuena mua kukokesha bua kuvudija mudimu wetu, tukebe mushindu wa kuulengeja. (Mâko 12:41-44) Bantu bonso badi ne mushindu wa kuenzela Yehowa mudimu eu wa pa buawu, mba muabi!—Mus. 110:3.