Tuenze bua tshiuma tshietu tshia mudimu tshipatule bipeta bilenga

¹ Yezu wakafuanyikija ditekemena dia Bukalenge ne tshiuma tshia mushinga mukole. (Mat. 13:44-46) Tudi petu ne mmuenenu wa muomumue ne wa bantu ba mu tshimfuanyi tshia Yezu bavua bapane bionso bivuabo nabi bua kusumba tshintu kampanda tshia mushinga mukole anyi? Pikalabi nanku, netuteke Bukalenge bua Nzambi pa muaba wa kumpala, nansha biobi kabiyi bipepele ne bilomba didipua muoyo.—Mat. 6:19-22.

² Bu mudi mudimu wetu muenza bua Bukalenge muikale tshiuma, dijinga dietu didi ne bua kuikala dia kuwenza bua upatule bipeta bilenga. Nsombelu wetu udi uleja tshinyi? Tudi tuenza mudimu wetu mu mishindu mishilashilangane anyi? Tudi mua kuwenza pa kudifila mu bitupa bishilangane bia buambi: ku tshiibi ne ku tshiibi, makumbula mapiamapia, malonga a Bible, bumanyishi bua mu mpukapuka, ne mikuabo.

³ ‘Mmunyi mundi mua kuvudija didifila dianyi mu buambi? ’ Pankatshi pa tshidimu tshia mudimu, bidi bimpe bua muntu ne muntu kukonkonona mudimu wende, bua kumona tshidiye mua kuenza bua kupitshisha dîba dia bungi mu buambi, ne kudikonka ne: ‘Ndiku mua kudilongolola bua kuikala mpanda-njila muambuluishi ku musangu ne ku musangu peshi mene pa tshibidilu anyi? Pa kuenza amue mashintuluka, ndiku mua kutuadija mudimu wa bumpanda-njila bua pa tshibidilu anyi? ’ Aba badi batuadija mudimu wa bumpanda-njila mu dia 1 Kabitende nebikale mua kubuela mu Kalasa ka bampanda-njila tshidimu tshilualua.

⁴ Bamanyishi mbadifundile tshipatshila tshia kumanyisha bipitshidile mu mpukapuka. Mudimu eu utu upetesha bipeta bimpe bitambe pa tshibidilu. Bakuabo nebamone bua se: bidi bikengela bua buobo kulubuluka mu kupingana kukumbula bantu ne kubanga malonga mapiamapia a Bible.

⁵ Bituafika ku nkomenu wa se: didifila dietu mu buambi didi’anu bu dikese, mmunyi mutudi mua kudivudija? Aba badi bafika ku dikumbaja bipatshila binene badi batubela bua kudianjila kupangadika bua kupesha midimu ya Bukalenge muaba wa kumpala, nansha bia munyi. (Mat. 6:33) Bidi bikengela ditabuja ne dieyemena dijima kudi Yehowa. (2 Kol. 4:7) Tumulombayi amu kumulomba ne mutshima wetu wonso. (Luka 11:8, 9) Tushindikayi bua se: Yehowa neabeneshe madikolela etu malelela bua kuvudija didifila dietu mu mudimu wende.—1 Yone 5:14.

⁶ Tuyukilayi ne bana betu ba balume ne ba bakaji badi bafike ku dialabaja mudimu wabo. Tubebeje mushindu uvuabo batshimuna bipumbishi kakuyi diditekesha. Dimanya kuenza diabo dia muntu pa nkayende didi pamu’apa tshidi tshitukengela bua kutuitabijija bua kumona se: kualabaja mudimu wetu kakuena kutukolela.

⁷ Patudi tubala biena-bualu bidi biakula bua buambi mu Tshibumba tshia Nsentedi anyi mu Mudimu wetu wa Bukalenge, tukonkonone mu disambila mushindu utudi mua kutumikila ngenyi idimu. Tuenze bia muomumue patudi tusangila mu bisangilu bia tshisumbu anyi mu mpuilu. Ngenyi eyi mifila mmiangatshila mu diyuki kampanda dia mpuilu wa tshijengu wa tshidimu etshi tshia mudimu. Tshiena-bualu etshi ntshia kumpala mu mulongo wa ebi bidi ne tshipatshila tshia kutuambuluisha bua kutumika ne makankamija wonso mafila mu mpuilu eu.

⁸ Yezu wakangata mudimu wende kabiyi tuseku. Wakauvuija bu mudimu wende wa kumpala. Wakamba ne: “Tshianyi tshiakudia nkuenza disua dia eu wakantuma.” (Yone 4:34) Tudi petu ne mmuenenu wa muomumue anyi? Né bidi nanku, bushuwa netupete mishindu ya kudifila mu bitupa bishilangane bia mudimu wetu ne kuabanyangana ne bantu netu “bintu bilenga” biangatshila mu tshiuma tshietu.—Mat. 12:35; Luka 6:45.