Mpuilu wa tshijengu watuambuluisha bua kulama malu a nyuma bimpe
1. Ngumue mushindu kayi utu Yehowa utuambuluisha bua kukumbaja mudimu wa kuyisha lumu luimpe?
1 Yehowa utu utulongesha malu a mushinga ne utukolesha bua tuetu kukumbaja mudimu wetu wa kuyisha lumu luimpe bimpe. (Mat. 24:14; 2 Tim. 4:17) Umue wa ku mishindu idi Yehowa utulongeshila, nkupitshila ku mpuilu ya bijengu itutu tuenza tshidimu tshionso. Programe mupiamupia wa tshidimu tshia mudimu tshia 2010 neakuile pa tshiena-bualu tshidi ne: “Lama malu a mu nyuma bimpe,” tshiangatshila mu Lomo 8:5 ne Yuda 17-19. Mpuilu eyi neyituadije kuenzeka mu lumingu lua dia 31 ngondo wa 8 tshidimu etshi.
2. (a) Nku malu kayi kuikala mpuilu wa tshijengu mua kutuambuluisha? (b) Mmushindu kayi uvua mpuilu ya tshijengu ya bidimu bishale mikuambuluishe mu mudimu wa buambi?
2 Mushindu watuambuluishayi: Programe eu neatudimuije ku njiwu, bu mudi ya tshitanaji tshidi mua kutudia dîba dietu dionso ne kumbusha ntema yetu ku malu a mushinga wa bungi. Nebatulongeshe mua kuepuka lungenyi lua kumona malu bu udi kuyi muamone, ne netulonge kabidi tshidi kuikala muntu wa mu nyuma kumvuija. Muyuki wa bitupa bia bungi wenzabu mu Dia lumingu neuleje tshidi muntu ne muntu anyi bena mu dîku mua kuenza bua kukola mu nyuma ne kumona mua kuluisha ntatu ya lelu ne mateta adi mua kukuata ditabuja dietu. Programe eu neatuambuluishe bua kulama mioyo yetu, kuikala ne malanda mimpe ne Nzambi ne kulama mu lungenyi luetu mabenesha mimpe apeta bantu badi balama malu a mu nyuma bimpe.
3. Ndîba kayi dienzeka mpuilu wenu wa tshijengu? Udi mudisuike bua kuenza tshinyi?
3 Padibu anu banuambila dituku ne muaba wenzekela mpuilu wenu wa tshijengu, nudilongolole bua kubuelamu ne kuteleja ne ntema bitupa bionso matuku onso abidi. Nuikale bamanye ne: Yehowa utu ubenesha bantu badi bapangadija malu.—Nsu. 21:5.
4. Ntshinyi tshitudi batekemene bua kupeta mu mpuilu wetu wa tshijengu udi ulua kumpala eku?
4 Bushuwa, Yehowa ke mufidi wa dipa edi dimpe. Programe eu mulongolola kudi kasumbu ka mupika wa lulamatu neatuambuluishe bua kukumbaja mudimu wetu wa bena Kristo bimpe. Tudi tuela Yehowa tuasakidila bua malu mimpe onso adiye mulongolole bua kutuambuluisha bua ‘tulamate dijukula dia ditekemena dietu bua kaditshimbakanyi.’—Eb. 10:23-25; Yak. 1:17.