Tumbisha Yehowa dituku dionso
1. Ntshinyi tshidi basadidi ba Nzambi bumvua bua kuenza? Bua tshinyi?
1 Mukalenge Davidi wakaleja dipangadika diende dia kutumbisha Yehowa “ku dituku ku dituku,” tuamba ne: kashidi. (Mus. 145:2, 7, 21) Tuetu petu tudi ne malu a bungi adi mua kutusaka bua kutumbisha Yehowa dituku dionso.—Mus. 37:10; 145:14, 18; 2 Pet. 3:13.
2. Mmushindu kayi udi bena mu mêku mua kutumbisha Yehowa dituku dionso?
2 Patudi mu mêku etu: Tudi ne mikanda ya bungi idi mua kutuambuluisha bua kuyikila malu a Nzambi bimpe patudi tukonkonona mvese wa ku dituku, patudi tuenza Ntendelelu wa mu dîku anyi patudi tulongolola bisangilu bia tshisumbu. Mu mêku a bungi batu ne tshibidilu tshia kusangila buonso nansha musangu umue ku dituku bua kudia pamue. Dîba adi badi bapeta mushindu wa kuyukila batukije ne bapeta mpunga wa kutumbisha Yehowa. Miyiki ya mushindu eu idi baledi bajula idi mua kubambuluisha bikole bua kukolesha bana babu ‘bimpe ne dibela ne didimuija bia Mukalenge.’—Ef. 6:4; Dut. 6:5-7.
3. Mpunga kayi itudi tupeta ya kutumbisha Yehowa patudi ne bena Kristo netu?
3 Patudi ne bena Kristo netu: Patudi mu mudimu wa buambi anyi mu bisangilu, tudi ne mpunga milenga ya kutumbisha Yehowa pamue ne bena Kristo netu. (Nsu. 15:30; Filip. 4:8; Eb. 13:15) Bu mutudi tuetu buonso banange Yehowa, bidi mua kuikala bipepele bua kuleja dianyisha bua buimpe buende mu miyiki yetu.—Mus. 106:1.
4. Mmishindu kayi mikuabu itudi nayi ya kutumbisha Yehowa?
4 Patudi tuyikila ne bantu badi kabayi Bantemu: Nansha bikala nsombelu wetu kayi ukumbana bua tuetu kuyisha dituku dionso, kuambila bena mudimu netu, balongi netu ne bantu bakuabu badi pabuipi netu malu mu tshikoso pa bidi bitangila Yehowa ne malu adiye mulongolole, kudi mua kupesha bantu badi banange buakane ditekemena. (Mus. 27:14; 1 Pet. 3:15) Pavua muanetu wa bakaji mukuabu wenza luendu mu ndeka, wakayisha mamu uvua musombe ku luseke kuende. Mamu au kukola ku muoyo ne kumvuaye disanka, ke kupeshaye muanetu wa bakaji adrese wende ne nimero yende ya telefone bua bikale bayukila nende. Nansha mudi ntatu yenda ivula pa buloba ne nsombelu wenda unyanguka anu kunyanguka, basadidi ba Yehowa badi batungunuka ne kutuadila bantu badi basue kubateleja ‘lumu luimpe lua diakalengele.’ Lumu elu ludi lupesha bantu bakuabu ditekemena ne lubasaka bua kutumbisha Yehowa.—Yesh. 52:7; Lomo 15:11.
5. Bua tshinyi tudi ne dijinga dia kutumbisha Yehowa? Dijinga edi didi mua kupatula tshinyi?
5 Yehowa udi ne disanka padiye umvua mudi basadidi bende bamutumbisha dituku dionso. Anu mudi bifukibua bia Yehowa bidi bitunyunguluke bimutumbisha, tuetu petu tutumbishe Yehowa dituku dionso mu mêku etu, mu tshisumbu ne patudi tuyukila ne bantu bakuabu badi kabayi banji kutuadija kutumbisha Yehowa.—Mus. 19:1-4.