Bisangilu bia mudimu wa buambi

1. Bua tshinyi tutu tudifila bua mudimu wa kuyisha kuenzekawu mu mushindu mulongolola bimpe?

¹ Yezu mmutushile tshilejilu tshilenga tshia mushindu wa kukumbaja mudimu wa kuamba kua lumu luimpe, mu mushindu mulongolola bimpe udi upatula bipeta bilenga. Anu bu Yezu, lelu bana betu badi balombola mudimu wa kuyisha Bukalenge badi bajinga bua wenzeke bimpe. Bua kukumbajabu dijinga edi, bisumbu bia pa buloba bujima mbilongolole bisangilu bia mudimu wa buambi mu tusumbu tua bambi ba lumu luimpe bua kuyisha.​—Mat. 24:45-47; 25:21; Luka 10:1-7.

2. Mmalu kayi adibu mua kutuambila mu tshisangilu tshia mudimu wa buambi?

² Didilongolola dilenga: Tshipatshila tshia bisangilu bia mudimu wa buambi ntshia kukolesha badi balue bua kupatuka mu buambi, kubaleja imue ngenyi mimpe, ne mushindu wa kuyisha. Badi mua kuyikidila pa mvese wa ku dituku anu pikalaye wakula bua mudimu wa buambi. Imue misangu, badi mua kutuvuluija malu a mu Mudimu wetu wa Bukalenge, mu mukanda wa Comment raisonner anyi wa Kalasa ka mudimu. Badi mua kuenzeja nansha mu minite mikese dinaya dia tshilejilu dia mua kufila mukanda kampanda mu buambi. Kumpala kua kuenzabu disambila dia ndekelu, bikale bamane kuabanya bantu bonso, ne muntu yonso mumanye muaba udi teritware wenzelabu mudimu. Minite mikese panyima pa tshisangilu tshipi etshi tshia minite mishadile ku 15, bantu bonso badi ne bua kupatuka batangile mu teritware.

3. Mbanganyi badi ne mudimu wa kulongolola bisangilu bia mudimu wa buambi?

³ Mua kulongolola tusumbu: Mutangidi wa mudimu udi ne mudimu wa kulongolola mushindu udi bisangilu bia mudimu wa buambi wenzeka. Batangidi ba tusumbu anyi babambuluishi badi ne mudimu wa kupatuka mu buambi pamue ne bena mu kasumbu kabu matuku a ku ndekelu kua lumingu. Bamue batangidi anyi basadidi ba mudimu badi ne mushindu, badi mua kupatuka mu buambi ne bena mu kasumbu kabu munkatshi mua lumingu. Batangidi ba tusumbu badi benza mudimu mu diumvuangana ne mutangidi wa mudimu bua kupeta teritware bungi bukumbane wa tusumbu tuabu kuyishila ku nzubu ne ku nzubu matuku a ku ndekelu kua lumingu. Munkatshi mua lumingu, mutangidi wa mudimu udi ulongolola malu bua kuikale muntu udi mua kulombola mudimu wa buambi mu kasumbu ne kasumbu.

4-6. (a) Ntshipatshila kayi tshidi bisangilu bia mudimu wa buambi natshi pa bidi bitangila teritware wa tshisumbu? (b) Tshia kuenza tshinyi bua kumanya malu adi akengela bua bisangilu bia mudimu wa buambi?

⁴ Muaba ne dîba. Ki mbimpe bua tshisumbu tshionso kusangila muaba umue bua bisangilu bia buambi to. Mbimpe bisangilu ebi bikale bienzekela miaba ya bungi, ku nzubu ya bana betu, bua bayishe mu teritware yonso wa tshisumbu. Badi mua kuenzela kabidi bisangilu ebi ku Nzubu wa Bukalenge. Mu bisumbu bia bungi batu benza tshisangilu tshia mudimu wa buambi tshipi mu Dia lumingu panyima pa muyuki wa patoke ne Dilonga dia Tshibumba tshia Nsentedi. Ki mbimpe bantu bikale benda mitantshi mile bua kufika mu teritware to. Nunku, mbimpe kutangila ku musangu ne ku musangu miaba itu bisangilu bia mudimu wa buambi bienzekela ni itshidi ikumbana bua kufika ku diyisha mu teritware yonso.

⁵ Mbimpe kuteka dîba dia kutuadija bisangilu ne bungi bua misangu ya kubienza munkatshi mua lumingu bilondeshile mushindu udi teritware. Nkonko idi ilonda eyi neyambuluishe bua kuela meji bimpe bua kumanya muaba mukumbane wa kuenzela tshisangilu ne dîba kabidi.

⁶ Ntshitupa kayi tshia teritware wetu tshitudi ne bua kuyisha bikole? Ndîba kayi dimpe dia kuyisha ku nzubu ne ku nzubu? Mêba a ku dilolo mmakumbane bua mudimu wa ku nzubu ne ku nzubu anyi bua kupinganyina bantu? Programe yonso idi mienza bua mudimu wa buambi nya kulamika ku tablo wa mamanyisha. Mbimpe mumanyishi yonso ikale ne dijinga dia kujikija teritware wende yonso nkong, bua afike ku diamba muvua mupostolo Paulo muambe pende ne: ‘Tshiena ne muaba [anyi teritware] mu nseke eyi [udi mushale].’​—Lomo 15:23.

7. Mmidimu kayi idi nayi muanetu udi ulombola tshisangilu tshia mudimu wa buambi mu kasumbu?

⁷ Dilombola tshisangilu tshia mudimu wa buambi: Bana betu badibu bapesha mudimu eu badi ne bua kudilongolola bimpe bua kuleja ne: badi banemeka tshidi tshisumbu tshilongolole. Tshisangilu etshi tshidi ne bua kutuadija pa dîba, tshikala ne ngenyi idi ikolesha bantu ne tshikale tshipi, tuamba ne: minite 10 anyi 15 patupu. Muntu udi utshilombola ikale ne teritware wa kasumbu wenzelabu mudimu kumpala kua tshisangilu kutuadija. Nansha mudibi kabiyi bimpe bua kuindila bantu balua panyima pa dîba, mbimpe kushiya mukenji bua bamanye muaba unudi baye kuenzela mudimu. Minite mikese panyima pa tshisangilu, bantu bonso badi ne bua kuikala mu njila batangile muaba wa mudimu. Tshisangilu tshidi tshilongolola bimpe ne tshidi ne ngenyi mimpe ngetshi tshidi tshiambuluisha muntu yonso bua kuenzaye mudimu wende dituku adi bimpe.​—Nsu. 11:14.

8. Mushindu kayi udi bantu badi babuela mu bisangilu bia mudimu wa buambi mua kueleshangana diboko ne bana betu badi babilombola?

⁸ Dibuela mu tshisangilu tshia mudimu wa buambi: Dieleshangana diboko didi ne mushinga. (Eb. 13:17) Kuoku mushindu, muanetu udi ulombola tshisangilu udi ne bua kuambuluisha muntu yonso udi ukeba muntu wa kupatuka nende. Mbimpe bamanyishi badi ne dimanya dia bungi bikale babuela mu tshisangilu etshi bua bambuluishe bapiabapia anyi bantu badi ne dimanya ndambu. Bantu batu banyisha bua kuyisha ne bamanyishi bashilashilangane, batu mua kuya kumpala bikole. (Nsu. 27:17; Lomo 15:1, 2) Muntu yonso enze muende muonso bua kufika kumpala kua dîba. Tuetu tunemeka bisangilu ebi, ne tuangata bena Kristo netu ne mushinga, netudienzeje bua kufika kumpala kua dîba.​—2 Kol. 6:3, 4; Filip. 2:4.

9. Tela mishindu idi mpanda-njila mua kutua tshisangilu tshia mudimu wa buambi nyama ku mikolo.

⁹ Diambuluisha dia bampanda-njila: Ditua dia bapanda-njila nyama ku mikolo dia programe eu didi ne mushinga wa bungi ne didi dikolesha bantu bonso. Tudi bamanye ne: bampanda-njila batu ne malu a bungi a kuenza. Pa kumusha dilongesha bantu Bible, dipinganyina bakuabu, programe wabu wa ku dituku udi ne malu makuabu, bu mudi: kukumbaja majinga a dîku ne kuenza mudimu wa bianza. Nunku, bampanda-njila kabena mua kuikala mu tshisangilu tshionso tshia mudimu wa buambi to, nangananga kuoku tshisangilu dituku dionso. Kadi, bampanda-njila badi mua kubuela mu bimue bisangilu ebi lumingu luonso. Tuikale bamanye ne: bisangilu bia mudimu wa buambi bidi biambuluisha bua kulongesha tshisumbu tshijima, ne dimanya dia Bible dia bampanda-njila ne dia mudimu wa buambi bidi mua kuambuluisha bakuabu bikole. Dipatuka dia mu buambi misangu ya bungi ndibambuluishe bua kupeta dimanya dia bungi dia mua kuyisha. Badi mua kuabanyangana dimanya edi ne bantu bakuabu. Bu mudibu bayisha ne muoyo umue ne babuela mu bisangilu ebi, badi tshilejilu tshimpe tshia kuidikija. Ke bualu kayi tudi tuanyisha bikole padibu babuela mu bisangilu ebi.

10. Bua tshinyi mbimpe mumanyishi yonso wa lumu luimpe atue tshisangilu tshia mudimu wa buambi nyama ku mikolo?

¹⁰ Mudimu wa bungi wa kushiya lumu luimpe lua Bukalenge udi wenzeka patudi tuya ku nzubu ne ku nzubu anu bu muvua Yezu ne bayidi bende benza pabu. Bisangilu bia mudimu wa buambi bidi bienzeka bua tuetu kupeta mushindu wa kukoleshangana ne kuenza mudimu wetu bimpe menemene. Bamanyishi bonso badi ne bua kutua programe eu nyama ku mikolo bikole. (Bien. 5:42; 20:20) Nanku mbimpe bua muntu yonso kuakaja malu adi akengedibua bua kuikala ubuela mu tshisangilu etshi. Tuetu tuenza malu aa, tudi mua kutekemena diambuluisha dia Yehowa ne muoyo mujime ne tudi tusankisha kabidi muoyo wa Mulombodi wetu Yezu Kristo patudi tuyisha lumu luimpe lua Bukalenge bua Nzambi.​—Mat. 25:34-40; 28:19, 20.