Keba bantu bimpe
1. Tudi mua kuenza tshinyi bua kuleja ne: tudi tuanyisha diakalenga dia kuenza mudimu wa buambi?
1 Yezu uvua wenda ukeba bantu bavua badipuekesha bua kubasamba ne lumu luimpe. (Yesh. 61:1, 2) Bu mutudi milopo anyi batumibue pa muaba wa Kristo, lelu eu tudi ne diakalenga dinene dia kumuidikija, kukeba bantu bimpe badi mu teritware wetu katuyi tutshioka.—Mat. 10:11; 2 Kol. 5:20.
2. Mmunyi muvua Paulo uyisha bilondeshile nsombelu uvuaku? Wakapeta bipeta kayi?
2 Uyishe bilondeshile nsombelu udiku: Paulo uvua ne tshibidilu tshia kuanji kuya mu nsunagoga bua kuyisha bena Yuda ne bantu bavua bitabuja ntendelelu wa bena Yuda. (Bien. 14:1) Tshilejilu, mu Filipoi, yeye ne Sila bakaya kukeba bantu ‘pa muaba uvuabu bela meji ne: Ngua kutendelela.’ Pakafikabu pa muaba au, bobu kutuadija kuyisha bantu bakaji bakapetabu, umue wa kudibu, diende Ludia, kuitabaye diakamue bulelela.—Bien. 16:12-15.
3. Pa kumusha teritware wa kuyisha ku nzubu ne ku nzubu, tudi kabidi mua kuyisha penyi?
3 Pa kumusha teritware webe wa kuyishila ku nzubu ne ku nzubu, bua tshinyi kubenga kabidi kuyisha miaba idi bantu bindila mashinyi anyi mioto, miaba idi biro bia mudimu, mu masangu a njila atu ne bantu ba bungi, miaba itu makazen ne mu bisalu? Udi kabidi mua kuyisha ku telefone anyi kufunda mikanda bua bantu badi miaba itubu babuela anu padi muena ku nzubu mukubikile. Wewe wenza mudimu ne mêsu ebe ne uyisha bilondeshile nsombelu wa mu teritware wenu, ‘neukumbaje mudimu wa Mukalenge misangu yonso.’—1 Kol. 15:58.
4. Udi kabidi mua kuenza tshinyi pikala teritware wa tshisumbu tshienu muikale mukese?
4 Bambi ba lumu luimpe ba bungi mbaye mu tshinga tshisumbu tshia mu ditunga diabu anyi tshia mu ditunga dikuabu anu bua kuvudija mudimu wabu wa buambi. Banga pabu mbalonge muakulu mukuabu anu bua kuyisha bantu bapiabapia badi nabu pabuipi, badi bafume mu ditunga dikuabu.
5. Tudi ne bua kuangata tshikondo tshietu etshi bu tshikondo kayi? Ndipangadika kayi diudi ne bua kuangata?
5 Tuetu bonso tuvuluke ne: budimi ke ‘bantu ba pa buloba.’ (Mat. 9:37; 13:38) Bu mudi nshikidilu wenda usemena pabuipi, bidi bikengela muntu yonso akonkonone bimpe nsombelu wende, makanda ende, bipedi biende, ne mishindu idiye mua kuvudija mudimu wende wa buambi. Yehowa udi utuambila ne: tuetu bateke malu a Bukalenge buende kumpala kua bionso, neabeneshe mushindu utudi tuditatshisha bua kuvudija mudimu wetu wa buambi.—Mat. 6:33.