Udi mudilongolole bua kuyisha padi mpunga umueneka anyi?

1. Ntshilejilu kayi tshidi tshileja bulenga bua kuyisha padi mpunga umueneka?

¹ Kuyisha padi mpunga umueneka kudi mua kupatula bipeta bilenga bia dikema. Mu Bible mudi bilejilu bia bungi bia diyisha dia mushindu eu dikala ne bipeta bilenga. (Yone 4:7-15) Tshia kuenza ntshinyi bua tuetu kuikala badilongolole bua kuyisha padi mpunga umueneka?

2. Mmushindu kayi udi mvuadilu wetu ne didilengeja mua kutuambuluisha bua kuikala pabuipi bua kuyisha?

² Mvuadilu wetu ne didilengeja: Tuetu bikale ne mvuadilu muimpe misangu yonso ne tudilengeja bimpe, netupete mushindu wa kuyisha padi mpunga umueneka katuyi bundu. (1 Tim. 2:9, 10) Tuetu tudiumvua bundu bua bitudi bavuale ne bua mutudi badipenta, muoyo wetu neukuatshike bua kuyisha bakuabu. Kadi, tuetu bikale badiakaji bimpe, tshimuenekelu tshietu tshimpe tshidi mua kujula bantu dijinga bua kumanya bua tshinyi tudi bashilangana ne bakuabu. Tshilejilu, mulume ne mukaji bavua Bantemu bavua bavuale bimpe pavuabu mu luendu, buobu kusomba kumpenga kua tatu mukuabu mizilma. Pakamonaye muvuabu bavuale, wakabakonka ne: Nutu bena Kristo anyi? Lukonko elu luakafikisha ku muyiki wa malu a mu Bible wa mêba asatu majima.

3. Mmunyi muudi mua kutuadija muyuki mu dilonda tshilejilu tshia Yezu?

³ Tuadija muyiki: Pavua Yezu mupetangane ne mukaji muena Samalea ku tshina tshia mâyi tshia Yakoba, wakatuadija muyiki anu ne dilomba dia mâyi a kunua. Tuetu petu tudi mua kutuadija muyiki ne bualu kampanda bukese anyi kujula lukonko lupepele. Nansha mudi dielakana mua kutufikila imue misangu, tuetu beyemena Yehowa neatupeshe “dikima” dia kutuadija muyiki ne bantu.​—1 Tes. 2:2.

4. Mmushindu kayi utudi mua kudilongolola bua kuyisha padi mpunga umueneka?

⁴ Keba mpunga ya kutuadija muyiki: Bamanyishi ba bungi badi bapeta mishindu ya kutuadija kuyisha padi mpunga umueneka. Tangila tshidi nsombelu webe, ne ela meji kudi bantu baudi mua kupetangana nabu dituku adi. Wambula mikanda ne bibejibeji bikumbana ne Bible webe wa mukese. Wikale ne mbabi ne utabalele bantu badi bakunyunguluke. Wewe mudianjile kuela meji bua mishindu iudi mua kupeta bua wewe kuyisha mu bule bua dituku, newikale mudilongolole bua kuyisha bimpe.​—Filip. 1:12-14; 1 Pet. 3:15.

5. Bua tshinyi tudi ne bua kulongolola mudimu wa kuyisha padi mpunga imueneka?

⁵ Tudi ne malu mimpe abidi adi aleja mushinga wa kukeba mushindu wa kuyisha padi mpunga umueneka, ke dinanga dia Nzambi ne dia muntu netu. (Mat. 22:37-39) Pa kumona mudibi bia lukasa bua kuyisha, kuyisha padi mpunga upeteka mbualu butudi ne bua kulongolola. Tudi ne bua kuikala badilongolole bua kukeba mpunga ya bungi miakanyine bua tuetu kuyisha bantu bakuabu lumu luimpe lua Bukalenge patshidi dîba koku.​—Lomo 10:13, 14; 2 Tim. 4:2.