Keba mua kuyisha badi bakula muakulu muenyi

1. Mmpunga kayi wa mudimu udi mumueneke patudi tuyisha mu teritware udibu batupeshe?

¹ Yezu Kristo wakamba ne: lumu luimpe luvua ne bua kuambibua pa buloba bujima bu “tshimanyishilu ku bisamba bionso.” Bamanyishi bonso badi benza mudimu wa diyisha ne dilongesha bakuabu badi bavuluka mutshidi mêyi aa ne mushinga wa bungi. (Mat. 24:14; 28:19, 20) Patudi tuya kuyisha ne kuvuija bantu bayidi, tudi mua kupetangana ne bantu ba bisamba bikuabu badi bakula muakulu mushilangane ne wetu. Bobu pabu badi ne bua kumvua mukenji wa Bukalenge ne kulamata ku bulelela kumpala kua dituku dia Yehowa didi dikuatshisha buôwa kufikadi. (Mal. 3:18) Mmushindu kayi utudi mua kufika ku diyisha bantu badi bakula muakulu wa ku ba bende mu teritware udibu batupeshe?

2. Nku tshinyi kutudi mua kuidikija Yehowa patudi tuyisha bantu ba muakulu udi kawuyi wetu?

² Tumone bantu badi bakula muakulu mukuabu mudi Yehowa ubamona: Bua tuetu kuleja mutudi banange bantu bonso ba mu teritware wetu katuyi kansungansunga anu bu Yehowa, tudi ne bua kuikala ne dijinga dikole dia kuambuluisha bantu bua kumanyabu Yehowa Nzambi mulelela bimpe nansha bobu kabayi bakula netu muakulu umue. (Mus. 83:18; Bien. 10:34, 35) Nansha mutudi tutamba kudifila bua bantu badi bakula muakulu wa tshisumbu tshietu, tudi kabidi ne bua kuvuluka majinga a badi bakula muakulu mukuabu ne kubatabalela, ne kukeba mishindu ya kubamanyisha lumu luimpe lua Bukalenge. Kubenga kuyisha bantu badi bakula muakulu mukuabu kakuena kumvuangana ne disua dia Yehowa dia kumanyisha bantu ba bisamba bionso lumu luimpe to. Kadi mmushindu kayi utudi mua kuambuluisha bantu badi kabayi bakula muakulu umue netu?

3. Nkakanda kayi ka mushinga katubu batupatuile? Ne mmunyi mutudi mua kudilongolola bua kuyisha naku?

³ Yisha ne kakanda ka Une bonne nouvelle pour des gens de toutes nations: Kakanda aka kavua kalongolola bua kuyisha naku bantu ba miakulu mikuabu batudi tupetangana nabu. Wikale ne kakanda aka dîba dionso, umanye malu kabukabu adimu bimpe, wikale kabidi mudilongolole bua kuyisha naku. Bua wewe kuikala ukabulula bipepele, enzamu bimanyinu miaba idi miakulu iutu upeta mu teritware webe. Bikalaku mikanda mu miakulu ayi, bidi mua kuikala bimpe bua kuyambulaku ndambu bua kuyipesha bena miakulu ayi paudi ubabadisha malu adi mu kakanda aka.

4. Mmunyi mutudi mua kuyisha ne kakanda ka Nations?

⁴ Wewe mupetangane mu buambi ne muntu wakula muakulu uudi kuyi mumanye ne: mmuakulu kayi, anji muleja pa tshizubu tshia kakanda aku. Kabulula munda mua tshipusu muaba udi karte ka buloba bujima, udifunkune pashishe umuleje ditunga dienu pa karte, kadi umuleje bua akuleje pende ditunga diabu ne muakulu udiye wakula. Paudi umanya muakulu wabu, tangila ku tshikebelu bua kumona dibeji didibu bafunde muakulu au, nunku umuleje tshiambilu tshidibu bafunde mu maleta mafikisha bikole kulu kua dibeji adi, pashishe umuleje ne: udi musue bua kubalaye mêyi au. Padiye ujikija, mupesha trakte wa muakulu wende anyi umuleje tshiambilu tshidibu balabe dikala ditokoloke tshidi ne: Biwasua nenkutuadile webe mukanda wa mu muakulu wenu. Pashishe, umuleje miaku idi mifunda mu maleta mafikisha bikole ya ne: “Dîna dianyi”; umuambiladi diumvuike bimpe. Umuleje padibu bafunde kabidi mu maleta mafikisha bikole ne: “Kadi diebe?,” nunku windile akuandamune. Umvuangana nende bua wewe kumupinganyina.

5. Mmalu kayi atudi ne bua kuenza bua bantu badi basue kumanya bulelela badi bakula muakulu mukuabu?

⁵ Longolola bua baye kumumona: Mbimpe kudienzeja bikole bua kupinganyina bantu badi banyisha lumu lua Bukalenge nansha bobu bakula muakulu mukuabu. Patudi anu tumona ne: muntu mmusue kumanya Nzambi ne Bible Dîyi diende, tudi ne bua kuwuja kabeji ka Veuillez suivre l’intérêt (S-43), diakamue kukapesha sekretere wa tshisumbu tshienu bua kukatumaye ku Betele bua bamukebele muanetu udi mumanye muakulu wende bua kuya kumumona. Pashishe, Betele neatumine tshisumbu tshia muakulu au kabeji aku. Padi tshisumbu atshi tshipeta kabeji aka, nebaye diakamue kutangila muntu au. Sekretere udi mua kupesha mutangidi wa mudimu fotokopi wa kabeji aku bua yeye kulondesha dijinga didi bantu badi bakula muakulu kampanda mua kuikala nadi. Kabeji aka nka kuenza naku mudimu anu padi muntu musue kumanya bulelela.

6. Bituapeta muntu musue kumanya bulelela kadi wakula muakulu mukuabu, mmalu kayi atudi ne bua kuenza?

⁶ Kutuadijila dîba didibu batuma kabeji ka S-43 too ne paya mumanyishi wasungulabu udi wakula muakulu wa muntu au kumumona, matuku a bungi adi mua kupita. Nanku, muanetu wa kumpala uvua muwuje kabeji ka S-43 aku udi anu mua kutungunuka ne dipinganyina muntu au bua kukolesha dijinga diende dia bulelela too ne paluabu kumumona kudi muanetu udi mumanye muakulu wende. Koku mushindu, udi mua kutuadija kulonga Bible ne muntu au. Kadi patshidibu bindile muanetu mukuabu au, mmunyi mudi mumanyishi eu pende mua kupeta mikanda ya mu muakulu wa muntu udi musue bulelela au?

7. Ntshinyi tshidibu batulongoluele bua kupeta mikanda mu muakulu wa batudi mua kupeta mu buambi?

⁷ Mikanda ya mu miakulu mikuabu: Bisumbu kabiena ne bua kulama mikanda ya mu miakulu mikuabu ya bungi nansha. Mutangidi wa mudimu yeye mumone ne: bantu ba muakulu kampanda badi banyisha bulelela badi benda bavula, udi mua kumona bikumbane bua kuikale ndambu wa mikanda ya muakulu au mu tshisumbu bua bamanyishi bikala bayisha nayi. Mikanda ya mu muakulu au yoyi kayiyi mu tshisumbu, badi mua kuyilombesha. Kadi bidi mua kunenga matuku bua mikanda ayi kushishayi kufika. Ke bualu kayi mbatulongoluele mushindu wa kupatuila malu adimu pa mabeji ku Internet muaba eu: www.watchtower.org. Kuoku aku kudi mikanda mivule idibu belaku mu miakulu nkama ne nkama idi mumanyishi yonso anyi muntu udi musue bulelela mua kudibadilaku. Kakuyi mpata, mikanda idi ku Internet eyi neyituambuluishe bua kuvudija nyota ya bulelela ya muntu udi wakula muakulu mukuabu.

8. Mmudimu kayi udi nawu tshisumbu bua kukolesha dijinga dia bantu badi bakula muakulu mukuabu?

⁸ Mudimu udi nawu tshisumbu: Imue misangu, bungi bua badi bakula muakulu wa ku ba bende aba budi mua kubanga kuvula, kadi paku kakuyi tshisumbu tshia muakulu au pabuipi to. Nanku, nudi anu mua kubikila bantu badi banyisha bulelela bua kubuelabu mu bisangilu bienu nansha mudibu bakula muakulu mukuabu. Kubakidila kuimpe kua musangelu ne dibaleja mutudi tutabalela yonso wa kudibu kudi mua kubakankamija bua kuikalabu babuela mu bisangilu pa tshibidilu. Bushuwa, ku ntuadijilu badi mua kutata bua muakulu ne bua bikadilu bia muaba mupiamupia eu; kadi kakuena tshintu tshidi mua kukanda dinanga dia bena Kristo balelela Bantemu ba Yehowa ba buloba bujima nansha. (Sef. 3:9; Yone 13:35) Utuku wakula kabidi muakulu mukuabu bimpe anyi? Biwikala uwakula ne musue kupinganyina bantu badi bakula muakulu au, suaku umanyishe sekretere wa tshisumbu tshienu bua afundile Betele bualu ebu. Bualu ebu nebuambuluishe Betele padiye ukeba mumanyishi udibu mua kutuma bua kuambuluisha bantu badi dijinga ne kumanya bulelela.

9. Ndîba kayi didibi bikengela kukanguila bamanyishi kalasa ka muakulu? Badi bakatuadija mushindu kayi?

⁹ Kalasa ka muakulu: Paudi uyisha bantu badi bakula muakulu mukuabu, mbimpe ubakankamije bua kubanga kubuela mu bisangilu mu tshisumbu tshia muakulu au pikalabi bikumbana bua kuenza nanku. Kadi pikalaku kakuyi mushindu, bamue bamanyishi badi mua kulonga muakulu mukuabu bua kuambuluishabu bantu badi dijinga ne kumanya bulelela abu. Kuoku kakuyi tshisumbu tshia muakulu au pabuipi, Betele udi mua kuangata dipangadika dia kukangula kalasa ka muakulu au bilondeshile bungi bua bantu badi bawakula. Biobi bilomba bua kuenza nanku, Betele neafundile bisumbu bia muaba au bua kubileja dijinga adi ne bua kufilabi dimanyisha dia bualu bua kalasa ka muakulu aka. Bonso badi balomba bua kubuela mu kalasa ka muakulu au badi ne bua kuikala ne tshipatshila tshia kubuela mu kasumbu anyi tshisumbu tshidi tshitangila muakulu au bua kutantshishamu mudimu.

10. Ndîba kayi didibu mua kutuadija kasumbu ka muakulu mupiamupia? Mmalu kayi adi akengela kukumbaja?

¹⁰ Mua kuenza kasumbu kapiakapia: Kumpala kua kuenza kasumbu ka muakulu mupiamupia, kudi malu manene anayi adi akengela kukumbaja. 1) Kudi ne bua kuikala bantu bungi bukumbane badi banyisha bulelela mu muakulu au ne bafuane kulua kuvulangana. 2) Kudi ne bua kuikala ndambu mukese wa bamanyishi badi bamanye muakulu au anyi benda bawulonga. 3) Kudi ne bua kuikala nansha mukulu anyi musadidi wa mudimu umue mukumbane udi mua kulombola kasumbu aku ne kuenzejaku nansha tshisangilu tshimue lumingu luonso mu muakulu au. 4) Kudi ne bua kuikala kasumbu ka bakulu kadi kitaba bua kutangila midimu ya kasumbu ka muakulu au. Padi bantu bakumbajaku malu anayi aa mu mushindu muakanyine, dîba adi kasumbu ka bakulu kadi mua kufundila Betele malu adi atangila kasumbu aku ne kulomba bua Betele abateke bu tshisumbu tshidi tshitangila mudimu wa kasumbu ka muakulu muenyi au. (Tangila mukanda wa Bulongolodi, dib. 106-107.) Mukulu anyi musadidi wa mudimu udi ulombola kasumbu aku nebamubikile bu “mutangidi wa kasumbu” anyi “musadidi wa kasumbu” udi ne bujitu bua kukalama pa makaya ende.

11. Bua tshinyi kuyisha bantu badi bakula muakulu muenyi mu teritware wetu ndisanka dinene?

¹¹ Kubanga kulongesha bantu ba mu teritware wetu badi bakula muakulu muenyi mbumue bua ku malu manene a mu mudimu wetu wa diyisha wa buloba bujima udi Yezu Kristo Tshilejilu tshietu wenzeja. Nanku, yonso wa kutudi akumbaje wende mudimu ne tshisumi tshionso bua tumone mudi Yehowa utungunuka ne kuzakeja bisamba ne kubueja mu nzubu wende bintu bidi binangibue kudiye. (Hag. 2:7) Tuetu beleshangane diboko mu mudimu eu, netupete disanka dia bungi. Tuenzayi bua Yehowa atubeneshe mu bionso bitudi tuenza mu buobumue bua kuyisha bantu badi bakula muakulu muenyi badi mu teritware ya bisumbu bietu, bamanye ne: nansha mudi miakulu ipangisha bantu malu a bungi, Nzambi udi mua kubadiundisha kuyabu kumpala!​—1 Kol. 3:6-9.