Nanukila ne kuamba dîyi dia Nzambi
1. Mubelu wa Paulo utudi ne bua kutumikila mmubelu kayi?
1 Mupostolo Paulo wakamba ne: “Ambila bantu dîyi dia Nzambi mene; nanukila kubambila.” (2 Tim. 4:2) Tudi ne bua kutumikila mubelu eu bua tshinyi? Mmunyi mudi mubelu eu ututangila, utangila ne bantu bakuabu?
2. Bua tshinyi tutu bafue anu mu dikeba bantu batutu katuyi banji kuyisha?
2 Bantu badi mua kufua anyi kulua muoyo: Kutshidi bantu bapite bungi batutu katuyi banji kuyisha to. (Lomo 10:13-15; 1 Tim. 4:16) Kutshidi anu bantu badi banange malu mimpe mu teritware itutu tutamba kuyishila. Tuetu tushintulula matuku ne mêba a kuyisha, netupete nansha muntu mukuabu ku nzubu. Kuyisha nunku kudi kutushiya ku muoyo kutalale, katuyi ne mashi ku wetu muele.—Bien. 20:26.
3. Tudi mua kuenza tshinyi bua kuyisha bikole dîba ditudi mu buambi?
3 Nansha muvuabu bakengesha bena Kristo ba kumpala bikole, ‘bakuuja Yelushalema tente ne diyisha diabu.’ (Bien. 5:28) Tudiku petu ne dipangadika dia ‘kuambila bantu’ dîyi dia Nzambi bikole anyi? (Bien. 10:42) Patutu mu buambi, tutu tupitshisha dîba tshianana anyi? Tshilejilu patutu bindile muntu, tutuku tuenda tuyisha nansha bantu badi bapita mu njila anyi?
4. Leja mudi kunanukila mu diyisha lumu luimpe kutuambuluisha bua kushala batabale.
4 Tutambayi kuikala batabuluke: Bu mukadi nshikidilu wa ndongoluelu wa malu eu pabuipi menemene, tuikalayi batabale, batabuluke. (1 Tes. 5:1-6) Tuetu ne tshibidilu tshia kuakula bua Bukalenge bua Nzambi, ndongoluelu wa malu eu kakutufinyina panshi to. (Luka 21:34-36) Tuetu kabidi balame dituku dia Yehowa mu lungenyi, netuyishe bikole bua kusungila bantu.—2 Pet. 3:11, 12.
5. Leja mudi kunemeka muoyo wa bantu kutusaka bua kuyisha.
5 Patudi tuyisha bikole, tudi tuidikija Yehowa, bualu udi wangata mioyo ya ba bantu ne mushinga wa bungi. Bible udi wamba ne: ‘Yehowa kena musue muntu umue ajimine, kadi udi musue bonso balue kukudimuna mitshima yabu.’ (2 Pet. 3:9; Yeh. 33:11) Tukebayi bua kuyisha bantu ba bungi menemene mu teritware wetu bua dîna dia Yehowa ditumbe.—Mus. 109:30.