Mandamuna a nkonko yenu

▪ Tshidi muntu yonso mua kuenza ntshinyi bua bantu kulonga malu bimpe mu bisangilu? (Dut. 31:12)

Bua kuleja ne: tudi tunemeka bikole Yehowa ne bisangilu bidiye mulongolole, muntu yonso udi ne bua kuikala ufika mu bisangilu kumpala kua dîba, mudiakaje bua Yehowa kumulongesha. Mbimpe kuikala kusombela lua kumpala bua kushila bantu badi ne bana bakese ne bantu badi bafika mu mpukapuka bisangilu bimane kutuadija miaba ya panyima. Kumpala kua bisangilu kutuadija, telefone ikale milongolola bua kayipangishi bantu bua kuteleja to. Bantu bonso bobu ne kanemu mutantshi wonso udi bisangilu bienzeka, kakuakutamba kuenzeka bintu bidi mua kupangisha bantu bua kuteleja bimpe to.​—Muam. 5:1; Filip. 2:4.

Padi bantu bapiabapia balua mu bisangilu, mbimpe muntu udi mubamanye asombe nabu pamue. Mbimpe kusomba nabu nangananga bobu ne bana ba batekete. Bualu buabu bobu, kubuela mu bisangilu kudi mua kuikala bualu bupiabupia. Nunku bua baledi badi ne bana aba, mbimpe basombele lua kunyima bua pikalabu basue kupatuka ne bana, bantu bakuabu batungunuke ne kulonda bisangilu bimpe. (Nsu. 22:6, 15) Ki mbimpe bantu badi ne bana basombele mu tshibambalu tshikuabu nkayabu bua bana batuadije kuenza mudibu basue to. Mbimpe baledi bikale banji kupatuka mu tshibambalu tshinene bua kunyoka bana anyi kujikija majinga abu makuabu, pashishe kulua kupingana nabu.

Mudimu wa bana betu batu bakidilangana ngua kuenza bua malu enzeke bimueneka ne: mu Nzubu wa Bukalenge mmuaba udi bantu balua kutendelela. Badi bambuluisha bena mêku ne bantu badi bafika mpukapuka bisangilu bimane kutuadija bua kupeta muaba wa kusomba. Batu benza malu ne budimu ne bukalanga bua bantu basombe bimpe kabayi bapangisha bakuabu bua kuteleja to. Batu bela meji bimpe kumpala kua kupita ne bualu bua mu mpukapuka budi mua kupangisha bateleji mua kulonda bisangilu. Padi muana upangisha bantu mua kulonda bisangilu, batu bambuluisha baledi ne bulenga buonso.

Muntu yonso udi mu bisangilu udi mua kuenza bua bantu bonso balonge malu a Yehowa ne bulongolodi bupiabupia budiye musue kuenza bua kuteka ditalala ne buakane pa buloba.​—Eb. 10:24, 25.