Mandamuna ku nkonko yenu

▪ Mmunyi mudi bakididianganyi mua kuambuluisha baledi bua bana kabenji disalu mu bisangilu?

Bana batu pa tshibidilu ne disalu, kabatu bibidile bua kushala kaba kamue mutantshi mule to. Kunyima kua bisangilu, batu babanga kunyemakana ne kuipatangana ne bakuabu bana mu Nzubu wa Bukalenge peshi miaba mikuabu itutu tuenzela bisangilu, miaba itu mashinyi imanyina ne ku muelelu wa njila. Kadi, anu mudi kasumuinu kampanda kamba, ‘muana udibu balekela nkayende udi ufuisha baledi bende bundu.’​—Nsu. 29:15.

Tudi ne dibungama dia kunumanyisha ne: kuvua bana betu bakulakaje bakatapika bibi bualu bana bavua banyemakana munkatshi muabu e kubashindisha panshi. Biakanyingalaja bantu ba bungi ne kutudisha baledi ne tshisumbu makuta a patupu. Bua kubepula ne kuepula bakuabu ku njiwu, baledi kabena ne bua kulekela bana batua eku batua eku mu Nzubu wa Bukalenge anyi pambelu pende nansha.

Bible mmupeshe baledi bujitu bua kulongesha bana badibu balela mua kunemeka muaba wetu wa kutendelela. (Muam. 5:1a) Mu bisangilu bietu bia bena Kristo, mu mpuilu minene ne mikese, bakididianganyi badi ne bujitu bua kutangila bua “bionso bienzeke anu mu buakane” ne mu “bulongame.” (1 Kol. 14:40, MMM; Kolos. 2:5) Bana betu aba badi ne bua kutangila bualu ebu ku ntuadijilu too ne ku ndekelu kua bisangilu, munda ne pambelu pa Nzubu wa Bukalenge. Bikala muana wenda utua eku ne eku anyi bikalaye ne disalu, muanetu udi wakidilangana udi mua kumuimanyika, kumuambila ne bukalanga bua tshinyi tshidiye wenza atshi ntshibi. Kabidi, udi ne bua kumanyisha muledi wa muana bualu ebu mu buimpe ne kumuambila bua atangile muanende. Ki mbimpe muledi kufiikaye munda padibu bamuleja bualu ebu to.

Tshidiku ntshia se: imue misangu bana batshidi bapuekele anyi bana ba ku mabele badi mua kudila anyi kuikala ne diyoyi mu bisangilu. Bakididianganyi buobu bafike minite mitue ku 20 kumpala kua tshisangilu kutuadijatshi, badi mua kulama nkuasa anyi bibasa bia kunyima bua baledi bikale basue kusombelapu ne bana babu batshidi bapuekele. Mbimpe muntu yonso alonde tshidi bakididianganyi bamuleja padibu bamulomba bua kushila baledi badi ne bana batekete miaba eyi.

Bikala muana wenza mutoyi, muledi udi ne bua kumupuwisha nansha kupatuka nende pambelu. Biabenga baledi kumupuwisha ne mutoyi kubangawu kutatshisha bakuabu, muakididianganyi udi mua kulomba muledi ne bukalanga bua apatuke ne muanende pambelu. Padi bapiabapia batudi tubikila balua ne bana mu bisangilu, tudi ne bua kusomba ku luseke luabu ne kubambuluisha bua kupuwisha bana padibu badila peshi benza disalu.

Bidi bitusankisha bua kumona bana ba milongo yonso ku Nzubu wa Bukalenge ne kubamona ne bulongame mu nzubu wa Nzambi. (1 Tim. 3:15) Padibu banemeka mushindu udi Yehowa mulongolole malu bua kumutendelela, badi bamutumbisha ne bantu bonso mu tshisumbu badi babanyisha.