Mandamuna a nkonko yenu

▪ Bantemu ba Yehowa badiku mua kuabanya miyuki idibu bakuate mu bande anyi bafunde anyi?

Miyuki ya mu Bible idibu batuenzela mu bisangilu idi itukankamija ne itukolesha. (Bien. 15:32) Ke bualu kayi mbimpe kujinga bua bantu bavua kabayimu bamanye pabu bivuabu bambe. Bu mudiku biamu bia bungi bia dikuata nabi mêyi lelu, mbipepele bua kukuata muyuki ne kuupesha muntu mukuabu. Kudi bantu batu balama miyuki mikuate, nansha ivuabu benze kukadi bidimu bia bungi, ne bua muoyo wa kuambuluisha balunda badi mua kubasombeshayi anyi kuyikuatulula bua kubapesha. Bakuabu mbenze miaba misunguluke ku Enternete, belamu miyuki ayi bua bakuabu bayangate.

Ki mbibi bua kukuata miyuki buetu tuetu ne bena mu mêku etu to. Bakulu badi kabidi mua kuambila muntu bua akuatshile bena mu tshisumbu badi basama ne kabayi ne mushindu wa kulua mu bisangilu miyuki. Kadi kudi malu adi atusaka bua kubenga kuabanyina bantu miyuki itudi bakuate mu bande, mu tshintu tshikuabu anyi bafunde.

Bu mudibu benza miyuki bilondeshile majinga a muaba ne muaba, tudi mua kumvua malu adibu bamba mu muyuki udibu batupeshe bibi bualu katuena bamanye tshivuabu bawenzela to. Bidi kabidi mua kuikala bikole bua kujadika uvua muenze muyuki ne dîba divuabu bawenze bua kumanya bikala malu adimu matshikale ne mushinga anyi malelela. (Luka 1:1-4) Pashishe, kuabanya miyuki mikuate kudi mua kufikisha bantu bakuabu ku ditaba butumbi budi kabuyi bubakanyine anyi ku ditumbisha bakuabu mu mushindu mubi.​—1 Kol. 3:5-7.

Mupika wa lulamatu ne wa budimu udi wenza mudimu mukole bua kutupesha ‘tshietu tshitupa’ tshia biakudia ‘dîba dijadika.’ (Luka 12:42, MML) Mu biakudia emu mudi miyuki idibu balongolola bua kuenza mu bisumbu bia Bantemu ba Yehowa bia miaba mishilashilangane ne miyuki mikuata itudi mua kupeta ku Enternete muaba wa Bantemu ba Yehowa wa jw.org. Tuikale bashindike ne: mupika wa lulamatu ne wa budimu ne Kasumbu kende kaludiki nebatupeshe bitudi nabi dijinga bua kukolesha ditabuja dietu.​—Bien. 16:4, 5.