Ntshinyi tshidi bantu balongela kuudi padibu bakutangila?
1. Mmalu kayi avua bayidi ba Yezu balongele kudiye pavuabu bamutangila?
1 Yezu wakamba ne: ‘Angatayi mutshi wanyi wa tshikokedi pa nshingu yenu, nuyile malu kundi.’ (Mat. 11:29) Bidi bimueneka patoke ne: uvua ulongesha bantu ku tshilejilu tshiende, ki nganu ne mukana to. Ela meji ku malu avua bayidi bende balonge pavuabu bamutangila. Uvua muntu wa malu mimpe ne munange bantu. (Mat. 8:1-3; Mâko 6:30-34) Uvua udipuekesha bikole. (Yone 13:2-5) Pavua bayidi ba Yezu bamufila mu mudimu wende wa kuyisha, bakamona ne: uvua muenji wa mudimu uvua kayi utshioka, mumanye kulongesha bantu bakuabu bulelela. (Luka 8:1; 21:37, 38) Mmushindu kayi utu bantu bakuabu batumona petu patudi mu buambi?
2. Mmunyi mudi tshimuenekelu tshietu tshimpe mua kusankisha bantu batudi tuyisha?
2 Bantu batudi tuyisha: Mvuadilu wetu mulenga, bikadilu bietu ne mutudi tuditatshisha bua bantu bakuabu bidi mua kulenga mioyo ya batudi tuyisha. (2 Kol. 6:3; Filip. 1:27) Badi bamona ne: tudi tubabadila Bible bikole. Bakuabu badi bumvua disanka patudi tubateleja ne kanemu. Tumanye ne: tshilejilu tshietu tshimpe tshidi mua kusaka bantu bua kuteleja lumu luimpe lua Bukalenge.
3. Tshilejilu tshietu tshimpe tshidi mua kuambuluisha bena Kristo netu bishi?
3 Bena Kristo netu: Tuele kabidi meji ku mushindu udi tshilejilu tshietu tshimpe mua kuambuluisha bena Kristo netu. Tshisumi tshietu mu buambi tshidi mua kubasaka bua bobu kutufuana. Anu bu mudi tshiamu tshisakisha tshikuabu, mushindu muimpe utudi tuyisha udi ubasaka bua kulengeja pabu mushindu wabu wa kulongesha. (Nsu. 27:17) Patudi tufunda mêna a bantu badi bitabe lumu luimpe ne tubapinganyina ne lukasa, bidi bisaka bakuabu bua kuenza bia muomumue. Netuikale tshilejilu tshimpe kudi bena Kristo netu patudi tuenza mudimu wa kuyisha ne muoyo mujima.—2 Tim. 4:5.
4. Bua tshinyi tudi ne bua kuikala tudikonkonona misangu yonso?
4 Tudi mua kuikala tukonkonona misangu yonso bitudi tuamba ne tuenza bua kumanya ni tudi tufila tshilejilu tshimpe kudi bakuabu. Tshilejilu tshietu tshimpe netshisankisha Yehowa ne netshituambuluishe bua kuamba anu bu mupostolo Paulo ne: ‘Nuikale bidikiji banyi, bu mundi meme kabidi muidikiji wa Kristo.’—1 Kol. 11:1.